MIKAH 6
6
Npugü le Israel Zen-o Jokekera
1Npugü le Israel zen-o jokekera nyülo.
Solo, Oh Npugü, tson-o kekerajo khishü; kazüthun lo rincho dan no nkhwen nyü shülo.
2Hagun kazüthun dan, kethonthen kazükenko thyü kehüdan, Npugü le kekerajo zokebin nyülo! Npugü le a-temi dan nmu-o jokera bin nyo. A-le Israel kenkhin jo senryü jü.
3Npugü le zo, “Atemi dan, ale hagun gen nyu thyüshüla? Ale dihontse hagun khvu kensu thyüshüla? Ajo kenishü. 4Ale Ijipt nyu hagun zenchwiryü; ale hagun le dothyükebin ka hagun kenishwishü; ale Mosa, Aaron lo Miriam nishüo no hagun tson tsin. 5Atemi dan, Balak, Moab rajagü le hagun nkela nrün genyu tedo rhi lo Balaam Beor nyugü le dihontse a-jo kenishü yo rüchün shülo. Akakia kensenbin Gilgal ki kegun tsoka nyu thyü layo rüchün lo. Tsüdan rüchün shülo ale hagun kenilo nrün genyu dihontse thyü yo shalo gwa.”
Npugü le Senmvulo Shvukebin
6Ale tsangge kehü Npugü Sunggigü rüshvu nrün genyu nyu senryü mon? Ano methu nyu kegwatsin dan senryüo rope a-rüshvu tile? 7Ale tanyü yie yie nmvue oliv terzü rinyu zü ketsun hontse senryülo Npugü le a-kenyüla tile? Ano anyurigü lope akemu ro thyü tile? 8Nmvu, Npugü le kegwa gü pe n gun ka zo laso. A-le n gun ka lonyü kebin le higü: nyule njüyo tsü kethyü, sozin kehü pe tesha kethyü, lo yhun tsenyo-o n gun Sunggigü zen-o kepvüshe kethyü.
9Npugü nshvu kethyü tsüle tha kesha nme. Ale nyida gü ko-o, “Nyülo, hagun nyida nyu kequen kehü dan! 10Temi gwakemvunyu ka nyu nkuo hyukelo kenya le bin. Anyugun le ale ntsükehü kenku kenda sen hü. 11Ketsin kemvu nyu tha ndo lo sülo kehü nyu ale dihontse tsünyu kemu jülo mon? 12Hagun dan nyu kenya nyu le rhokedyü nyu kekhün, lo hagun aphu kenkunyu. 13Tsügenyu ale hagun kemu genyu hagun nke lo kecha la nrün binzen laso. 14Hagun le tyüti, ai ketegvü loho-- hagun le nnyon binti. Hagun kanyükarun pvütin ti, ai ntsenlo mvu lati; hagun ntsen kelo lihi-e ale terinyu nke lati. 15Hagun le shyeni tsipe shüti, ai a-sha gvü loho. Hagun le oliv zü thün ti, ai sen loho. Hagun le terasha zu thyüti, ai tsü loho. 16Hile thyü ti hagun le Raja Omri lo a-nyugü Raja Ahab, tho gwakemvu then kethyü genyu. Hagun le au do then hü gwenzin laso, tsügenyu ale hagun nkelao temi aphu no hagun sümvu lati. Lihiki-e temi dan le hagun kemeni ti.”
Currently Selected:
MIKAH 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
