MIKAH 4
4
Npugü Le Gwaketho Sen-o Kazü Aphu Sogon Nrün
(Is 2:1-4)
1Kenkhin ki
Kershvuka le kebin kazüthun tsüle
aphu nye tetsotsin-o,
rincho aphu so tetso lati.
Senye kechon le tsünyu ryüti,
2tsüdan temi le zoti,
“Ngun Npugü rincho gü ki
Israel Sunggigü Kershvuka nyu gü tile.
Kechamvule a-le ngun no thyü nyü
kebin dan pe n gun senthyü shüti;
ngun le a-le kejükelo tsongü nyu güti.
Kechamvule Npugü senkethyü le
Jerusalem kinyu ryü;
Zion nyu a-le a-temi senthyü hü.”
3A-le senye dan jaka kenya kehü pen shüti,
a-khoka lo nithenkie kekvu keda kesen nyu dan.
Anyugun le zhethon dan pe dyü chala,
nywi pe ketsevü thyü lati.
Senye dan le teri nyu gü nimvu,
nmvue teri genyu gwen ndo loho so.
4Temi aphu yhun bwenye tse
a-npvü a-vainlow lo kherobin nyu binti,
lo temi nme-e athyü nshvu loho.
Kekvutsin Npugü le higü zoshü laso.
5Senye aphu a-npvü a-tero rüshvu lo tsüdan jozenti, ai agun le kethonthen agun Npu Sunggigü rüshvu lo a-jo thenti.
Israel Le Me Kazünyu Ranio Ryüti
6Npugü le zo, “Ale shaja pe tsüo me kazünyu kenjünthyü kela nyu kokequen nilo nrün jon le ryühü. 7Anyugun le terothonyu thyü ka zen-o nithen laso, ai ale nsenkebin nyu zen-o keshün binzen ti, lo anyugun le senye keda thyüti. Ale tsü genrho Zion kazüthun gen bin-o kethonthen anyugun keda thyü ti.”
8Lo Jerusalem, Sunggigü le bin-o tanyükhwenyu hontse a-temi nrikehü bin gü, nle nduka hontse Rajaphün nyidagü thyü niloti. 9Nle nyuthyüo nra tetso hü nla? Nyugenyu nle tenunyu le kenjünthyü kebin hontse binla? Tsüle nraja ndi lo ntsontsin kehünyu le sikela genyu ole? 10Jerusalem temidan, tenunyu le nyuzen gükejü hontse kenjünthyüo nralo, kechagenyumvu hagun le nyida gü khelao tegwen ki yhuntin lati. Hagun le Babilon ki güti, ai tsünyu Npugü le hagun shwikerüchün nyu ben nyu hagun keniloti. 11Senye kechon le hagun when titse kequen loso. Anyugun le zo, “Jerusalem nkela mvuloshvu! Agun le nyida higü kenke hyuti!” 12Ai senye tsüdan le Npugü nyun ki nyu le bin yo shamvu. Anyugun le shyeni ra nrün genyu kequenlo kehü hontse shaja pe tsüti tse anyugun khokequen kenjü tsü shalomvu.
13Npugü le zo, “Jerusalem temidan, güo shaja pe hagun shwikerüchün nyu tsülo! Ale hagun thyüpe methutse kenko tegi tse lo lazo tsen kepvü hontse shüti. Hagun le senye kechon boshwe lo anyugun le me kemvu thyüo hyu kelo kenya tsüpe jwe thyüo pe kazü apentha Npugü ahigü tsüti.”
Currently Selected:
MIKAH 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
