MATHI 28

Jisu Le Rhünniso Kela

(Mk 16:1-10; Lk 24:1-12; Jn 20:1-10)

1Lo Sabbath jon penlao jon keri nyü lonyü nshwe ka Maria Magdalin lo Maria kecha tenunyu nme au sika nrishü titse ryü. 2Lo hire, kazü le nnu pe kemvu mvu thyüla; kechamvule Npugü lokethyü nyu nme le tsangge tsüryüo sika khenpvü ka tso gü tsü boketola njüo tsüge binlo la. 3Lo a-shwi pe tsangkekechwe hontse, lo a-phi a-nya le chon pe khetso hontse. 4Lo a-kenshvu genyu rikhun nyu aphu kesinyu hontse tinla. 5Ai tsangge lokethyü nyu güle tenunyu ju ka, “Hagun nshvu nya nye. Hagun le mele khipe krus ge hü kelagü Jisu fü keryü ale shabin laso. 6A-le hika ndi so; kechamvule a-le nduka zokeshü hontse rhüniso kelasi genyu. Hagun n pharyüo Npugü pe shü kethyü bin nrishü tare. 7Tson-o whütse gungü a-le senthyükelo nyudan ka, ‘A-le kesinyu dan nyu rhüni so laso,’ tson kethyü zoshü nye. Lo hire, a-le hagun mhundyü rio Galil nyu gunzhü laso; hagun le gungü tsünyu a-hyu loti. Hire, ale hagun ka zoshüla sele.”

8Lo tsonshü ntsin anyugun le nshvulo anyugun sherhün rilao sika tsü nken whütse chwigü jo tsü lope a-le senthyükelonyu dan ka zoshü.

9Tson-o anyugun le tin gunzhü ntsin Jisu le anyugun zen ketenolo njüo anyugun ka, “Kegwagü thyülo,” tsonshü. Tsontsin anyugun le tsügü a-pha nyu a-rüshvu. 10Lo tsükatsü Jisu le anyugun ka, “Hagun nshvu nyao gungü a sikethen nyu danka anyugun no Galil nyu ryülo tse zoshü nye, anyugun le tsünyu ahyulo ti,” tsonshü.

Rikhunnyu dan Jolo

11Tsüselo anyugun le gunkezhü ka, hire, rikhun nyu peha le rünyi nyida gü nyu ryüo tha thyü kela aphu pe peshükeda ju ka zoshü.

12Tsükatsü anyugun le gungü peshünyu ju zen kehyulo njüo kenthon-o anyugun le raka kechon khipe shüpahünyu tsüo anyugunka, 13“Hagun, a-le senthyükelo ju le anyugun npvü khejeki agun le zhü kebin ka ryüo rühu pen tinla sele.” tsonla nye. 14Lo jo higü le ahng gü nyetin ka gunla yatse-e agun le agun npvü a-nthon loti; hagun no hagun nyun kenjünthyüla loho.

15Tson-o anyugun le anyugun ka kezo hontse zola; lo jo tsüle ryüo nthu keti-e Judanyu dan nyu zo ryü bin zun.

Tseryü Nmeche dan Le Jisu Hyukelo

(Mk 16:14-18; Lk 24:36-49; Jn 20:19-23; Apo 1:6-8)

16Tson-e senthyükelo tseryü nmeche ju le Jisu le nduka anyugun ka zokeshü hontse Galil nyu kazüthun ge gunla. 17Tson-o anyugun le gungü a-hyulo ntsin anyugun le a-rüshvu; ai peha le tenyen tsentsü mvula. 18Tsükatsü Jisu le anyugun ki ryüo anyugun ka, “Tsangge lo Kazü nyue kekvu aphu pe Atsü laso. 19Tsügenyu hagun gungü temi ligü higüe no a sikethen nyu thyülo lotse zoshü nye, lo Pvügü, lo Nyugü lo Kenshün Kapu zan nyu anyugun Baptaiz thyü shülo. 20Lo anyugun ko no ale hagun ka zokeshü tsü aphu thyü lo zenlo nrün genyu anyugun senthyüshü nye. Lo hire, Ale nthenteyhen nyu ki-e hagun zenzin hüti.”

Currently Selected:

MATHI 28: REGSBSI

Highlight

Copy