MATHI 27
27
Jisu Pe Pilat Ben Nyu Shükela
(Mk 15:1; Lk 23:1-2; Jn 18:28-32)
1Tsüselo tsangbenlo ntsin peshükeda ju lo temi dan nyu pelü kethyü aphu Jisu dushvula nrün genyu gungü kenthon. 2Tson-o anyugun le a-ben phinlo njüo a-zen gungü rünyi ahng gü Pilat ben nyu shüla.
Iskariot Judas Kesi
(Apo 1:18-19)
3Tsükatsü Jisu tenkeshü gü Judas le mele Jisu nmu lo a-nkhin kela shalo njüo a-nyun kenjünthyüo raka shenryü tsü sen gungü peshükeda dan lo pelü kethyü ju tse tsüni-o anyugun ka, 4“Ale mu kemvunyu nme khipe meno boshvu titse kethyü ale mu laso.” Tson-e anyugun le a-ka, “Agun kendo mvu, nle n npvü khilo.”
5Lo tsükatsü a-le raka tsü shwen pe Kershvuka nyuki shülao tinla; tson-o a-le gungü khvüshon sila.
6Tsüselo peshükeda ju le raka tsü khilo njüo, “Hile tezi min genyu khipe raka khin nyu shü kenjü tejvü mvu.” 7Tson-o anyugun le gungü kenthonlo njüo tsü lope lobu nme heilo-o tsü nyu, tesin sun ti letse la. 8Tsügenyu nthu keti-e lobu tsügütsü le, “Tezi low,” tse hünyo.
9Tsükatsü nduka Jeremia sidyükeshagü le, “Israel nyu nyenyu le pe a-min thyü titse kenthon kelo raka shenryü tsü khipe 10la kethyü gü kazü hei,” tson kenjü jo tsüno penlo.
Pilat Le Jisu Ketsokethyü
11Tsükatsü Jisu le gungü ahng mhundyü ka binlo ntsin, ahng tsügü le a-ketso-o, “Nle Judanyu Raja gü ole?”
Tsontsin Jisu le, “Ele, Ale tsügü le.” 12Tson-e peshükeda ju lo pelü ju le a-nkhin kesoka a-le thame zoni mvula.
13Tsükatsü Pilat le a-ka, “Me le kemu ditsü laki pe n ge shübin nla, nle thame shamvu ol?”
14Tson-e a-le thame zoni shü mvula; tsügenyu ahng no a-dun thyüla.
Jisu Hüla Lotse Hokum Hoshükela
(Mk 15:6-15; Lk 23:13-25; Jn 18:38—19:16)
15Lo nga tsügü nyu tsü ahng gü le temi dan no do anyugun kendo nyu nme hokeshü tejvü le bin. 16Lo tsükatsü Baraba tsekethyü temi süda gü kesha nme le dothyü bin. 17Tsügenyu anyugun le gungü kequenlo ntsin, Pilat le anyugun ka, “A no digü khipe hagun tsülo hagun kendo mon? Baraba tile, Jisu Khrista letse kehü gü mon?” 18Kechamvule anyugun le a-shwi kerüchün genyu a-khipe a-ben nyu keshü a-le sha kebin genyu.
19Tson-o a-le ketso kethyü bin ge kebin ka ahng nu le me nipe a-ki shüo a-ka, “Nle kenshün tsügü ge thame thyü nya nye; kechamvule ale nthu aminki a-genyu kenjünthyü sa kelasi genyu.”
20Tson-e peshükeda ju lo pelü ju tse le Baraba hilo, ai Jisu we dushvula lotseo temi dan thukeyhun shü. 21Tson-o ahng gü le anyugun ka, “A no au digü pe hagun ketsü hagun kendo ti la?”
Tsontsin anyugun le, “Baraba khishülo,” tson sola.
22Tsontsin Pilat le anyugun ka, “Tsonlo ano Jisu Khrista tse kehü gü lope nyu thyüla mon?”
Tsontsin anyugun le aphu tse, “A khipe krus ge hü lalo,” tsonla.
23Lo a-le, “Nyuthyü ola? A-le nyu gwakemvu thyüshü ola?”
Ai anyugun le sen ketsintsin tseo, “Alope krus ge hü lalo,” tsonla.
24Tson-o Pilat le kvu kelogü mvule tha kekevü chon ketsin ni kela genyu, a-le temi dan mhundyü nyu zü lope a-ben tseo anyugun ka, “Temi kenshün higü dukeshvu kipon we ale nshün lo njü machi nye; hagun npvü hagun ge lenye.”
25Tsontsin temi tsüdan aphu a-ka, “A-zi no anpvü age-e lo anyenyu ge-e ryülo!”
26Tsüselo a-le Baraba khipe anyugun tsüla, lo Jisu vülao khipe krus ge hüla lotseo khipe anyugun ben nyu shüla.
Shüpahünyu Le Jisu Shwinyü Kethyü
(Mk 15:16-20; Jn 19:2-3)
27Tsükatsü ahng gü shüpahü dan le Jisu zen-o süda bin nyu yügü shüpahünyu aphu no ryüo a-hunpvülo. 28Tson-o anyugun le a-phi a-nya rhola njüo phi kenhon nme pe a-no benlo. 29Lo tsehü perün thyü pe a-pe rünshü, lo terithün nme pe a-ben njüzin shü; lo anyugun le a-mhundyü ka khonyilo njüo a-shwinyüo a-kelu-o a-ka, “Hire, Judanyu Rajagü, Kvukelogü thyülo ta.” 30Tsüselo anyugun le nsü pe a-mhun di, lo terithün khipe a-pe vü. 31Lo anyugun le a-khipe keyüthyü kela siki a-ge a-phi a-nya rhola njüo a-npvü a-phinya lope a-no sen nilo njüo krus ge a-hüla ti tseo a-nrhisü zen gunla.
Krus Ge Jisu Hükela
(Mk 15:21-32; Lk 23:26-43; Jn 19:17-27)
32Lo anyugun le chwizhü ntsin Simon tsekethyü Kurinnyu nme hyulo; tsontsin anyugun le a-no Jisu krus penlo tseo a-kemvu thyüo a-tenlo.
33Tsüselo anyugun le gungü Golgatha tsekethyü a-kon le me, “Pekhunru Bin,” letse kethyü kazü nme tilo. 34Lo anyugun le vain zü pe kekhü ka keri kethyü pe a-no tsülo lotse shü; ai a-le tsü khipe ntsin shwio tsümvu la.
35Lo anyugun le a-khipe krus ge hüla njüo a-phi a-nya pe henshwio kenjünlo. 36Tson-o anyugun le tsünyu bin-o a-khwen bin. 37Tsüntimvule anyugun le a-pe soge a-kenkhin jo thuo “HILE JUDANYU RAJA GÜ JISU LE,” tsonkethyü thushü. 38Tsükatsü kerühunyu mihvu no a-sin-o hü, nme no a-njüzin lo nme no a-ngwazin tse hü.
39Lo tsükatsü kensinkenshye nyu aphu a-shwinyüo, a-pe pvü kengüo a-ka, 40“Nle Kershvuka borhola njüo jonshen nyü thyülo titse kehügü! Nle n npvü nkenilo ta! Nle Sunggigü Nyugü yatselo, krus ge tsenryülo!”
41Tsühontse peshü ju-e lo lesükeshatsin ju lo pelü dan ko tse a-shwinyüo, “A-le me kechanyu we kenilo hünyo; ai a-npvü we a-kenilo ho: 42A-le Israel nyu Raja gü le a-no ntsoka krus ge tsenryülo, tson yatselo agun le a-tenyenti. 43A-le Sunggigü tenyen hü kethyü le; Sunggigü no a-shwi pe a-kenyü yatselo, no ntsoka a-kenishü ta. A-le, ‘Ale Sunggigü Nyugü le,’ tsonkehü genyu.”
44Tsüntimvule a-sin pe krus ge hü kethyü hvu-e tsühontse zope a-kesü sola.
Jisu Kesi
(Mk 15:33-41; Lk 23:44-49; Jn 19:28-30)
45Lo tegi tseryü kenyhun che kevü ka gungü tegi kenshen kevü keti kazü aphu nyu zünti tsela. 46Tson-o tegi kenshen kevü gwünkho ka Jisu le nra sen-o, “Eloi, Eloi Lama Sabakthani,” a-kon le, A Sunggigü, A Sunggigü, Nle Nyuthyüo A Khela la?
47Tsontsin tsüka kebinnyu jo tsü keshanyun dan le, “Temi higü le Elia ko bin laso.” 48Tsontsin anyugun nme le tin whütse gungü spunj khipe keshonzü ka ntsenlo njüo pe kheyi pun ka shü pe a-lashü.
49Ai temi kechanyu we a-ka, “Matselo, Elia le a-kenishü titse tsüryü tile mvuyo shwi bin shwi!”
50Tsüselo Jisu le nra sen-o a-kapu hoshü la.
51Tsontsin hire, Kershvuka nyu phi lope khinthü kenjü gü tsü le a-pesun ka nrhen tsügü a-pha keti nrhen ketunkü kenyhun thyüla; lo kazü nnula, lo tsoe ko baba tse sola, 52lo sikae pe küla; kesinyu kenshün nyu kechon min tsüno rhüni so ryüla. 53Tson-o tsüdan no anyugun sika nyu chwiryüo rhün nikelo siki anyugun le rünyi kenshün gü nyu yüo temi kechon no anyugun hyu.
54Tsükatsü tsiso kedagü, lo a-zen-o Jisu rikhun kebinnyu ju tse, kazü nnu kela lo tha aphu thyü kela shwi pe nshvurila njüo, “Hile Sunggigü Nyugü ketsin le.” 55Lo Galil nyu Jisu sithen-o a-lothyü kehü tenunyu kechon le perezin bin-o nri bin. 56Lo tsüdan dan nyu Maria Magdalin, lo Jakob lo Joses au jvü Maria, lo Zebedi nyuhvu jvüe sin bin.
Jisu Pe Sun Kela
(Mk 15:42-47; Lk 23:50-56; Jn 19:38-42)
57Tsüselo ngwünki Arimathia nyu keryü a-zan le Josef letse kethyü kenyanyu nme le ryü, lo a-ko Jisu sikethennyu nme, 58temi tsügü le Pilat ka gungü Jisu min hi. Tsontsin Pilat le khilo lo tse zoshü. 59Lo Josef le a-min tsü pen gungü linen phi kenshün nme pe jelo njüo pe a-npvü a-sika tso nme run kenjü nyu shüla. 60Tson-o tso keda nme keto pe sika tsügü kakhin nyu nkela njüo tinla. 61Lo Maria Magdalin lo Maria kechagi ko tse sika tsümhundyü nyu bin-o hyu.
Rikhun Kejükelo
62Lo tsüsinyü tha ndonron kethyü sinyü peshükeda ju lo Farisinyu dan tse kengü gungü Pilat ka zo. 63Kedagü, mesa kehü temi higü le a-kerhün ka, “Ale jonshen nyü rhün nisolo ti, tsonkethyü zokehü agun le a-jo tsü rüchünlo laso. 64Tsügenyu jonshen keti a-sika khwen sa binlo tsekethyü njo hoshülo, a-le senthyükelo dan le ryüo rühu pen tinlao temi ju ka, a-le kesinyu dan nyu rhün niso laso, tsonla yatselo kenshvu genyu; tson yatselo thakekevü kenkhin gü le kerigü nyeki gwamvu kvula ti.”
65Tsontsin Pilat le anyugun ka, “Rikhun zenlo njüo hagun npvü thyü lo kegwathen khwensa binlo chi.”
66Tsontsin anyugun le gungü tso so ge mohor vülao rikhun lope tsünyu shüla, tson-o sika tsü khwen petsü sa lola.
Currently Selected:
MATHI 27: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
