MARK 1
1
Johan Baptist Gü Senkethyü
(Mt 3:1-12; Lk 3:1-18; Jn 1:19-28)
1Sunggigü Nyugü Jisu Khrista Jolokegwa le hihontse. 2Nduka sidyükeshagü lesü nyu, thu kenjü le hihontse:
“Hire, ‘Nmhun kehyu mhundyü Ale A lilonyu
nishü ti;
a-le ntson nda shüti.’
3Tehen nyu nra sen-o,
‘Npugü tson ndolo;
tson kehükhwen tsüle
a-le le!’ ”
4Tsühontse Johan me baptaiz thyü kehügü le tehen nyu ryüo kemu jülo nrün nyunkelukelo baptism pe me senthyü. 5Tsükatsü temi kechon le Judia kazünyu lo Jerusalem nyu aphu a-ki ryüo a-npvü a-kemu dan zoshwishüo Jordan züri nyu a-ben ka baptaiz thyü külo.
6Lo Johan tsü le Ut hü no kedo phi ben, thyügi senkephin lope a-sen phin pvü, lo tsekhvü lo khuzü tyü hü. 7Tsükatsü a-le me senthyüo, “Anyeki kegon nme le a siki ryü zhü; ale nkhüntsü gü a-phaje kephin-e shwü kümvu. 8A we zünyu hagun baptaiz thyü hünyo, ai A-we Kenshün Kapu nyu hagun Baptaiz thyü ti.”
Jisu Le Baptaiz Thyükelo, Lo A-semen Kethyü
(Mt 3:13—4:11; Lk 3:21-22; 4:1-13)
9Lo tsükatsü Jisu le Galil kazü Nazaret rünyi nyu chwio Jordan ri nyu Johan benka baptaiz thyülo. 10Tson-o a-le zünyu chwiryü ntsin, tsangge Kapu le nsu hontse a-ge tsükeryü hyulo. 11Lo tsükatsü tsangge thakhwen nme le, “Nle A nyu A kesogü, Nle Akenyü tsingü.” tsonkethyü zo ryü.
12Lo tsonshü ntsin Kapu le a-nipe tehen nyu shüla. 13Tson-o Satan no tehen nyu jon henzi a-semen; lo tsügwünkho ka a-le tehenthyü ju zen bin hü; lo tsangge lokethyünyu dan le a-lothyü bin hü.
Jisu Le Galil Kazünyu Me Senthyü Keso
14Lo mele Johan tenlo kela sika Jisu le Galil nyu ryüo Sunggigü Jolokegwa zope me senthyü. 15“A-gwünkho le ryü laso!” a-le zo-o, “lo Sunggigü keda le a-kho nni laso! Hagun nyun kelulo-o jolokegwa gü tenyenlo chi,” tsonhü.
Jisu Le Tsehü Ketennyu Mizi Kokelo
(Mt 4:12-22; Lk 4:14-15; 5:1-11)
16Tson-o Galil züda sekipon keryü ka Simon lo a-sikezengü Andria au le joh pe züda nyu shweshü güzhüo hyulo; au le tsehü ketennyu genyu. 17Tsontsin Jisu le au ka, “Hai asithen lota, lo ale hai no temi keten nyu thyü tin lati,” tsonshü. 18Lo tsonshü ntsin au le au joh khe whü tselao a-sithen tinla.
19Lo tsükatsü a-le ketu din npha ntsin Zebedi nyugü Jakob lo a-sikezengü Johan au ko run nyu au joh nkhvü bin-o hyulo. 20Tsontsin a-le au ko so, lo au le au pvü lo me jonshe zen kehü au gonyu ju no run nyu bin, ai au we Jisu sithen tinla.
Nshünkemvu Kapu Le Zenkehü Nme Rüla
(Lk 4:31-37)
21Tsüsika anyugun le Kapernaum nyu gunlo; tsontsin a-le Sabbath jon nyü sinagog ka nyu yüo me senthyü. 22Lo tsükatsü a-le lesü keshatsin nyu hontse anyugun senthyü keshü genyu anyugun le a-senkethyü jo genyu anyugun dunthyü sala.
23Lo tsügwünkho ka tsü nshünkemvu kapu no nchünndyü zen kehü nme le anyugun sinagog ka nyu bin, 24lo tsügü le nra sen-o, “Nazaret nyu Jisu, n gun kengüo nyu tsethyü mon? Nle a gun boshvula titseo ryü ole? Nle segü yo tsekethyü ale nsha! Nle Sunggigü Kenshün gü le,” tsonso.
25Ai Jisu le a-kesüo, “Nle matse bin chi; tson-o temi gü ge tinchwila chi,” tsonshü.
26Tsontsin nshünkemvu kapu le a-nthyü nnyü sashüo nra sen-o a-ge chwila. 27Tson-o anyugun no anyugun dunthyüla, tson-o khinyunyu ketso-o, “Dihontse lala? Senkethyü keshün nme hile! Temi higü kekvu le nshün kemvu kapu ge-e tha zoshülo tsüdan le a-jo zen kehü hile!” tson.
28Tson-o Galil kazü liki hiki aphu a-zan kechwi zope sü gunla.
Jisu le Temi kechon Thyüngwa Keshü
(Mt 8:14-17; Lk 4:38-41)
29Tsüsika anyugun le sinagog ka tsünyu chwiryülo ntsin anyugun le Jakob lo Johan tse zen-o Simon lo Andria au ka nyu yüla. 30Tsükatsü Simon nu a-jvü le rüka bin, lo mele tsügi rüla pe Jisu ka zoshü. 31Tsontsin a-le ryüo a-ben sülo njüo a-penso shü ntsin a-le rüka mvula; tson-o a-le sogü anyugun lothyü tinla.
32Lo yhüko chela ntsin mele kehokenyü nyu lo tero gwakemvu no nchünndyü kehünyu aphu zen-o Jisu ki ryü. 33Tson-o rünyi tsünyu temi aphu ryüo kakhin ka kequenlo. 34Lo kethyükenyü le a-gwün kehünyu aphu thyü kesherhün shü, lo tero gwakemvu kechon hüla.
Jisu Le Me Senthyü Chwikela
(Lk 4:42-44)
35Lo lonyü tsangben metse kemvuka a-le so-o me kendi bin ki gü hi tinla. 36Lo tsüsika Simon lo a-zen kehü ju le a-sithen gunla. 37Tson-o anyugun le a-hyulo njüo a-ka, “Temi aphu nfü hünyo.”
38Tsontsin a-le anyugun ka, “N gun ketu sen-o rünyi hidan nyeka güla je. A no gü tsüdan kako senthyü shü nrün genyu; kechamvule ale tsügenyu hika keryü genyu.”
39Tson-o a-le Galil kazü aphu nyu anyugun sinagog ka nyu gungü me senthyü lo tero gwakemvu gü-e hüla.
Nyu Le Ketyünyu Nme Thyüngwa Keshü
(Mt 8:1-4; Lk 5:12-16)
40Tsüntimvule nyu le ketyü nyu nme le a-ka ryüo a-mhundyü nyu khosenlo njüo a-ka, “Nle nkendo yatselo, nle athyü kesherhün shü logwa.”
41Tsontsin a-le a-nyun kenjünthyülo njüo a-ben shwen pe tsügü kesüo a-ka, “Nkethyü no gwalo chi,” tsonshü. 42Lo tsontsin a-ge nyu le ketyü tsüle ndila, tson-o a-thyü ngwa shü. 43Lo a-le a-kesinni shüo a-nio a-ka, 44“Nle temi nme kae thame zomvu titse kethyü rüchün tonlo chi; tsüntimvule nle peshükedagü ka gun-o nmin lope a-hishü chi; tson-o anyugun no shalo nrün genyu nthyü nshünlo kela phoukerho nduka Mosa le zokenjü jvü gü thyüla chi,” tsonshü.
45Ai a-le gü tsü rüla zosa shüla, lo liki hiki temi no shasa gunla, tson-o Jisu no ndo-o rünyi nme nyue yülo shvu lao gungü temi kendi bin ki hü gwünzin tinla. Lo mele likipon hikipon a-ki ryü.
Currently Selected:
MARK 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
