MATHI 26

Jisu Shwikerüchün Tedo Rhikethyü

(Mk 14:1-2; Lk 22:1-2; Jn 11:45-53)

1Lo Jisu le jo tsü zothü shü ntsin, a-le senthyükelo ju ka, 2“Jonhvu sika nkenkegun nga nrün hagun ko shabin ti, lo tsünyü me no Temi Nyugü pe krus ge hüla lo tseo tenshü ti.”

3Lo tsükatsü peshü ju, lo temi dan nyu peshü kengun ju le gungü Kaifa tsekethyü peshü kengun tsin gü kanyu kequenlo. 4Tson-o anyugun le tedo pe Jisu gwen-o ten pe dushvu kela rüla kenthon. 5Ai anyugunle, “Nga jonka loho, temi dan nyu kevü soryü lalo keshvu genyu, tson so.”

Bethani Nyu Terüzü Pe Jisu Nyenkethyü

(Mk 14:3-9; Jn 12:1-8)

6Lo Jisu le Bethani nyu Simon nyun le ketyügü kanyu kebin ka; 7tenunyu nme le terzü a-min ketsen alabaster khin mesen-o a-ki ryü; tson-o a-le me zen-o ho kebinka tsü jape a-pe ge shü. 8Ai senthyükelonyu dan le tsü shwi pe anyugun yhüthyü-o, “Nyuthyüo tha nke pe hihontse hü nla? 9Hilo pe pisa kechon heilo njüo pe kendinyu cheshü logwa.”

10Ai Jisu le tsü shalo njüo anyugun ka, “Hagun le nyuthyüo tenu higi kevü hü nla? A-le age thakegwa nme thyüshü laso. 11Kendinyu we hagun zenzin bin ti; ai awe hagun zenzin bin loho. 12A-le terzü hilo pe amin ge keshü tsüle akesun ronye ndoshü kenyü genyu. 13Ale hagun ka zo tsentsü shüti, kazü aphu ka jolokegwa hi zope me senkethyü aphu ka tenunyu higi rüla rüchünlo nrün genyu a-le thyükeshü rülae pe sin-o zohü ti.”

Judas Le Jisu Tenkeshü A-kendo Kela

(Mk 14:10-11; Lk 22:3-6)

14Tsükatsü tseryü kenyhunche dan nyu temi nme, Iskariot Judas tsekethyü gü le, peshükeda ju ki gungü anyugun ka, 15“Hagun le nyu pe atsü nyü bin nla? Ale a-ten pe hagun ben nyu shülo,” tsonso.

Tsontsin anyugun le raka shenryü swü pe a-tsüshü. 16Lo tsü gerhonyu a-le Jisu ten pe anyugun ben ka shüti tse ndo ton binlo la.

Jisu Le A-sikethen dan Zen-o Nkenkegun Nga gü Nga Kethyü

(Mk 14:12-21; Lk 22:7-14,21-23; Jn 13:21-30)

17Tsüselo kebu no shümvuo tensü ketyü nga jon keri nyü senthyükelo dan le Jisu ki ryüo, “Nle agun no dikipon nkenkegun nga ndo keshü nkendo tila nno tyü nrün genyu?”

18Tsontsin a-le. “Hagun rünyi nyida gü nyu gungü temi nme ka, ‘Senkethyü gü le agwünkho pen bin laso, ale senthyükelo ju zen-o nka nyu nkenkegun nga nga ti,’ tse hü nle, tsonshü nye.”

19Tsontsin senthyükelo ju le gungü Jisu le anyugun ka zokeshü hontse thyülo njüo anyugun le nkenkegun nga tsü ndolo.

20Lo khejeki thyülo ntsin a-le senthyükelo mitseryü kenyhunche dan zen dunlo. 21Lo anyugun le tyütsü kebin ka a-le anyugun ka, “Ale Hagun ka zo tsentsü shüti, hagun dan nyu temi nme le aten shüti.”

22Tsontsin anyugun nyungwamvu sao a-ka, “Npugü, tsüle ale le? Ale le?” tson kü sola.

23Tsontsin a-le anyugun ka, ayi kentsin-o ngüka a-ben lope khun nyu keshü gü tsüle aten shüti. 24Temi Nyugü le a-rüla zope bin kenjü hontse tinla titse bin laso; ai Temi Nyugü tenshü nrün gü we chi, thyülo tiso! Temi tsügü nnyu ryü kemvu we a-genyu gwakvu nrün.

25Tsükatsü a-tenshü nrün gü, Judas le a-ka, “Rabi, tsüle ale le?” tsonshü.

Tsontsin a-le a-ka, “Ele, tsonla.”

Npugü Kerüchün Chvü Ketyü

(Mk 14:22-26; Lk 22:14-20; 1 Kor 11:23-25)

26Lo anyugun le tyütsü kebin ka Jisu le tensü khipenlo njüo jochüshüo boshwenlo-o, khipe senthyükelo dan tsüshüo anyugun ka, “Khipe tyülo lo, Hile athyü gü le,” tsonshü.

27Tsüsika a-le honpen gü ko khipen lo-o jochü shüo, pe anyugun tsüo anyugun ka, 28“Hagun hi tsü külo nye; kechamvule hile temi kechon kemu jülo nrün genyu tsun chwikeryü kejozen kelo azigü genyu. 29Ai ale hagun ka zo tsentsü shüti, ale Apvü Raja nyu vain zü keshün tsü kemvuthen ale nthu gerho vain-bin higü ge hi tsüsin loho so.”

30Tsüselo anyugun le lü nme thyüshüo Oliv kazüthun ge gunla.

Pitor le Jisu zan zomvula Nrün Zokeshü

(Mk 14:27-31; Lk 22:31-34; Jn 13:36-38)

31Tsükatsü Jisu le anyugun ka, “Aphu ntsoje akhelao tin kü lati, ‘Ale tanyü kekhwen gü vüshüti, tsontsin tanyü dan le tin tsenchvü lati,’ tson thu pe bin kenjü genyu. 32Ai ale rhün niso kelo siki ale hagun mhundyü rio Galil nyu gunti.”

33Pitor le a-ka, “Hidan le aphu nkhe külae awe le nkhe loho.”

34Jisu le a-ka, ale nka zo tsentsü shüti, “Ntsoje tero kekhun mhundyü nle gwünshen ge azan zomvu lati.”

35Pitor le a-ka, “A no sila lotse-e ale nzan zomvula loho le.” Lo senthyükelo nyu aphu tsonzo küla.

Jisu le Getsemane chwi Nyu Kehikethyü

36Tsüselo Jisu le anyugun zen-o Getsemane tsekethyü bin nme ki gungü a-le senthyükelo nyu ju ka, “Ale lika gungü kehi thyü tin kela ka hagun hika bin tse nye.” 37Lo a-le Pitor lo Zebedi nyuhvu pe a-sinlo-o gungü a-nyun kenjünthyü, lo a-nyun keyhunkerunla. 38Tsükatsü a-le anyugun ka, “A nyun kenjünthyü pe si güzhü laso; hagun le hinyu azen-o khwen binlo nye.”

39Tson-o a-le anyugun mhundyü rikhe gungü nkhüntsülo-o kehithyü-o hihontse zo, “Apvü, thyü logwa yatselo, honpen hino a nrhila ta! Ai akendo hontse nya, nkendo hontselo,” tsonshü.

40Tsüsika a-le rani sen-o senthyükelo nyu ki ryü laryü anyugun le zhü bin-o hyulo ntsin a-le Pitor ka, “Kha, hagun le tegi kevüja nme-e azen-o khwen bin loho se ole? 41Hagun kesemen nyu yüla lo kenshvu genyu khwen binlo, lo hibin lo, Kapu gü we thyünyü sa bin nyo, ai thyümin le kvu mvu.”

42Tson-o tsüsika ko nigungü hi-o, “Apvü, ano hi tsümvu tse khela loho yatselo; nkendo thyülo chi.” 43Tsonshüo rani ryü ntsin anyugun le zhü kebin hyunilo, anyugun le anyugun yhütyü ko loho tse kebin genyu.

44A-le gwünshen ge gü ka ko anyugun khela njüo gü ngüka hontse hini shü. 45Tson-o a-le senthyükelo nyu ki ryüo anyugun ka, “Ntsokhin hagun le zhü rüyü bin zun le! Hire, Temi Nyugü ten pe kemunyu ben nyu shü titse bin laso. 46So-o ngun tinla je! Hire, atenshü nrün gü le ryüo tilo bin laso.”

Jisu Ten Kelo

(Mk 14:43-50; Lk 22:47-53; Jn 18:3-12)

47Lo a-le jozo kebin ka, tseryü kenyhun che dan nyu nme gü Judas le peshükeda ju lo temi dan nyu thakeshanyu dan ka zhethon lo senkethü kepen temi dan zen ryüla. 48Lo tsü mhundyü a-tenshü nrün zansü nme thyü pe anyugun hi-o, “Ale a-mbokeshü gü tsü le nye, a-tenlo chi,” tsonshü la.

49Tsontsin a-le whütse Jisu ki ryüo a-ka, “Salam, Rabi,” tson-o a-mboshü.

50Tsontsin Jisu le a-ka, “Apvü gü, nle thyü titse ryü kebin gü tsü thyülo chi!”

Tsüselo anyugun le ryüo Jisu tenlo. 51Tsükatsü hire, Jisu zen kehünyu nme le a-ben sen gü a-zhethon sütholo njüo pe peshükeda tsingü gonyu nme duso ntsin a-nyetin duthüla. 52Tsüka Jisu le a-ka, “Nle nzhethon lope a-khin nyu shünilo lachi. Kechamvule zhethon sen kehünyu aphu zhethon genyu nke küla nrün genyu. 53Hagun kerüchün le, ale Apvü ka hishülo, A-le ntsokae tsangge lokethyünyu legion tseryü kenyhunche kelae nishü loho letse bin ole? 54Tsonla yatselo dihontse ketsinlesü jo no penlo tila?”

55Lo tsügwünkho katsü Jisu le temi dan ka, “ Hagun le kerühunyu keten hontse zhethon lo senkethü pen-o aten titse ryü zhü ai la? Ale khenyütsen Kershvuka nyu bin-o me senthyü bin hü, ai tsüka hagun le atenlo mvula. 56Tson-e sidyükeshanyu dan le thu pe bin kenjü ketsinlesü jo no penlo nrün genyu hihontse thyükelo gwünzin.”

Tsonshü ntsin senthyükelo nyu dan le a-khelao tin küla.

Süda gü Mhundyü Nyu Jisu Ketsokethyü

(Mk 14:53-65; Lk 22:54-55,63-71; Jn 18:13-14,19-24)

57Tsüselo Jisu tenzen kehü dan le a-zen-o peshükengun gü Kaifa ki gunla; lo tsünyu tsü lesükesha tsin dan lo peshü dan tse gungü tsünyu kequen bin. 58Lo Pitor le a-ti sarimvu tse a-sithen gungü peshükeda tsin gü kamhun tilo njüo dihontse tiyo tsekethyü nri titseo yügü rikhun kebin nyu dan nyu binlo. 59Tsükatsü peshükeda ju lo süda kehun gü aphu Jisu dushvula titseo tedo rhio a-ge kenku jo füso. 60Lo kenku jünkezo kechon le ryü, ai a-kemu nme-e hyulo mvula. Tson-o kekhin ki mihvu le ryüo, 61“Temi higü hile himhundyü, ‘Ale Sunggigü Kershvuka gü borholao jonshen nyü thyünilo gwa,’ tson zo le.”

62Tsontsin peshükeda tsingü le solo njüo a-ka, “Nle thame zomvu ti ole? Hidan le nka tha zokebin hile nle nyuthyü letse bin nla?” 63Tson-e Jisu le ntsema tse nila. Tsüselo peshükeda tsingü le a-ka, “Ale rhünzin bin kehü Sunggigü zan sen-o swe-o zoti, nle Sunggigü Nyugü Khrista gü le nmvu la? pe agun ka zoshülo.”

64Tsontsin Jisu le a-ka, “Njo gü tsüle; ai ale hagun ka zoshü ti, Hisiki hagun le Temi Nyugü le Kekvu gü ben njüzin kebin, lo tsangge nmhu ge keryü hyuti.”

65Tsontsin peshükeda gü le a-phi sürhen-o, “A-le Sunggigü kenkhin jo zo laso, ngun le jünkezo kecha füsin-o nyu thyü se mon? Hire, hagun aphu tse a-le Sunggigü kenkhin jo kezo shalo laso; hagun le nyu rüchün bin nla?”

66Tsontsin anyugun aphu tse, “A-le sila zü le,” tson sola.

67Lo tsükatsü anyugun le nsü pe a-mhun di, lo jenthün thyü pe a-jen; lo peha le a-benje pe a-vü, tseo a-ka, 68“Hire, Khrista, segü le nvüshü la? Agun ka sidyükesha jo zoshü ta.”

Pitor Le Jisu Zan Zomvukela

(Mk 14:66-72; Lk 22:56-62; Jn 18:15-18,25-27)

69Tsükatsü Pitor le kamhun tegwen ki kehü ka, lünyu nme le ryüo a-ka, “Nko Galilnyu Jisu zen hü amon?”

70Ai a-le anyugun mhundyü nyu nmvu letseo, “Ale njo tsü shamvu.” 71Lo tsüsika ko a-le nigü kasü ki kebin ka, lünyu kecha nme le a-hyushüo a-ka, “Temi higü hiko himhundyü Nazaret nyu Jisu zen hü le,” tson ni.

72Tson-e a-le nmvu letse swe-o, “Ale temi tsügü shamvu le.”

73Lo tsüsi kheka tsünyu kebin nyu nme le ryüo Pitor ka, “Nko temi tsügü kethen nyu nme ketsin le; njo nyu nshalo la sele,” tson ni.

74Tsontsin a-le sweni ni tseo, “Ale temi tsügü shamvu le.”

Lo tsügwünkho toka tsü tero le khun chwiryüla. 75Tsüsiki nyu Pitor le himhundyü Jisu le a-ka, “Nle tero kekhun mhundyü gwünshen ge arüla zomvula ti,” tse kezo jotsü rüchünlo. Tson-o a-le kamhun ki chwigü chüsa tinla.

Currently Selected:

MATHI 26: REGSBSI

Highlight

Copy