MATHI 25

Lünyu Mi Tseryü Jokejvü Zokeshü

1“Tsangge keda le lünyu mi tseryü le makenben khin pen-o senhügü tson shwi titse kegun hontse. 2Lo anyugun mi pvün le a-do gwamvu, ai mi pvün we a-do gwa. 3Lo a-do kendi dan we makenben khin khikelo ka mazü sen sinlo mvula. 4Ai a-do kegwa ju we anyugun makhin nyu mazü khipe shü sin senlo. 5Tson-o senhügü le ryü ntsüla ntsin anyugun aphu ngüo zhü kü tinla.

6“Ai tsanglu tsangzüki me le nra sen-o, ‘Hire, Senhügü le, hagun ryüo a-tson shwilo,’ tson ryü. 7Tsontsin lünyu tsüdan aphu sogü anyugun makhin ni boshwi külo. 8Tsükatsü a-do gwakemvu ju le a-do kegwa ju ka, ‘Hagun mazü pe agun tsüta; agun makenben le nmhü güzhü la sele.’ 9Ai a-do kegwa ju le anyugun ka, ‘Tsonshü yatselo agun-e lo hagun-e tse gungü tilomvu lati ado; tsügenyu hagun npvü gungü jwen kehünyu ki hielo yatselo gwakvu ti.’ 10Tson-o anyugun le hielo titse gunla ntsin senhügü le ryüla; tson-o ndo sen kebin dan zen-o senhü keho nyu gunla, tson-o ka khinlo la.

11“Lo tsüka lünyu kechanyu dan tsüko ryüo, ‘Npugü, Npugü, ka khinshye pe agun tsüshü ta,’ tsonso. 12Ai a-le anyugun ka, ‘Ale hagun ka zo tsentsü shüti, ale hagun shamvu,’ tsonla.”

13Lo Jisu le jo kenkhin zo-o. “Tsügenyu hagun khwen binlo nye, hagun le a-tsangkeben jon gü nmvue tegikevü jagü shakemvu genyu.

Gonyu Mishen Jokejvü

(Lk 19:11-27)

14“Tsüntimvule temi nme le rünyi kecha nme ki gun titse-o a-gonyu koshüo a-hon pe tsüdan ben nyu keshü a-keme. 15Tsükatsü a-le anyugun do kegwa keshvu rüchün shwi titseo rakakhin shapvün pe nme tsüshü, khin hvu pe nme tsü lo khin me pe nme tsütse shüo tinla. 16Tsüselo khinpvün hyukelo gü le a-nyu kenkhi thyüo sen gungü tsü pe hathyüo kecha khinpvün chwilo. 17Lo khinhvu khikelo gü ko khinhvu chwilo. 18Ai khinme hyukelo gü we sen gungü kazü tsoshüo a-npugü raka tsü pe sun la.

19“Lo jon kethon thyü kela siki tsü anyugun npugü le ryüo anyugun ha kethyü tsü rüchün so. 20Tsükatsü rakakhin pvün hyukelo gü le rakakhin kecha pvün pe sin sen ryüo, ‘Npugü, nle rakakhin pvün pe aben nyu shü; lo hire, ale rakakhin kecha pvün chwilo so.’ 21Tsontsin a-npugü le a-ka, ‘Gwa binnyo, nle tego kegwa joketsin kezo nme; nle tha keshanyu kae joketsin zobin kelo genyu, ale nno tha kechon so bin ti; ryüo n npugü zen-o nsherhün binlo gwün re,’ tson.

22“Lo raka khinhvu hyukelo gü ko ryüo a-ka, ‘Npugü, nle raka khinhvu pe aben nyu shü; hire, ale raka khin kecha khinhvu chwinilo so.’ 23Tsontsin a-npugü le a-ka, ‘Gwa bin nyo,’ nle tego kegwa joketsin kezo nme; nle tha keshanyu kae joketsin zobin kelo genyu, ale nno tha kechon so keda thyü ti, ryüo n npugü zen-o nshekerhün thyü binlo gwün re!’

24“Tsüselo raka khin nme hyukelo gü ko ryüo a-ka, ‘Npugü, nle temi nyun kerü nme, nle gwünshü kemvu ki-e gvü hünyo, lo nle kezenshü kemvu ki-e jün kequen kehü ale sha. 25Ale n nshvuo nraka tsü sen gungü kazü hensin ki sun pe binla; nhon le hi ma re,’ tsonshü.

26“Ai a-npugü le a-ka, ‘Nle serikemvu thathyü kentsü tego gü, ale gwünshü kemvu bin ki gvü kehü, lo kezenshü kemvu bin ki jün kequen kehü nle sha hü ola? 27Nle tsügenyu araka tsü sen gungü pisa ka nyu shü njü kethyü we ale gun keryü ka raka lo a-kechwi sin-o hyu keloi. 28Tsügenyu hagun a-ben nyu raka khin tsü se sen gungü raka khin tseryü sen kebin gü tsüla chi.’ 29Kechamvule temi ligühigüe tha le kebin gü khipe tsü sinshü ti, tsontsin a-le chonsa loti, ai kendigü we a-ben nyu kebin keshanyu tsüe khini sen tinla ti. 30Lo me no tego tha lihi kemvu gü shwe pe tegwen kezün ki shüla ti; tsünyu chü lo hüketa tse bin ti.’

Me Ketso Nrün Kekhintsin Nyü Rüla

31“Tson-e Temi Nyugü le zoshwe zonye sen-o tsangge lokethyü aphu pe a-sin keryü ka, tsükatsü a-le a-Raja bin zoshwen zonye kethyü nyu binti. 32lo temi aphu zenryüo a-mhundyü ka kequen loti; tson-o tanyü kekhwenyu le tenyü dan nyu tanyü hükholo la kehü hontse, a-ko me khoka pe danhvu thyüla ti. 33Lo a-le tanyü dan we pe a-njüzin shülo ti, ai tenyü ju we pe a ngwazin shü lati. 34Tsükatsü raja gü le a-njüzin kebindan ka, ‘Apvü le jochü pe hagun ketsü ju, hagun ryüo kazü thyülo nyemhun ka raja bin ndo pe hagun khwen kebin gü gwenlo gwün re. 35Kechamvule ale nnyon kebin ka, hagun le tha pe atsü, ale teri kebin ka hagun le zü lope ano tsülo; ale tesin thyü kehü ka hagun le a nsinlo. 36A kenben kehü ka hagun le phinya pe ahenshü; ale hobin kethyü ka, hagun le ryüo a shwishü, ale dothyü kebin ka, hagun le ryüo a nthon kethyü genyu.’

37“Tsükatsü kentsenyu ju le a-ka, ‘Npugü ale nyu tsekethyü ka nle nnyon kebin hyuo, tha pe ntsüshü la? Nmvue teri kebin hyuo tha pe nla shü la? 38Lo ale diche ka nle tesinthyü kehü hyuo n nsinlo la? Nmvue nle phinya ben mvu kebin ale shao dicheka phinya pe nhenshü la? 39Lo agun le dicheka, nle ho kebin lo dothyü kebin shao ryüo n nthon la? 40Tsükatsü raja gü le anyugun ka, ‘Ale hagun ka zo tsentsü shüti, hagun le a sikezen nyu keshen hidan nme ge-e thyükeshü tsüle, age thyükeshü keme!’ tsonla ti.

41“Lo tsükatsü a-le a-ngwazin kebin nyu dan ka, ‘Hagun keswekesü kepvü dan, hagun hinyu tin sen-o tero gwakemvu gü lo a-lokethyü nyue sin tse genyu ndo pe bin kenjü gü kethonthen bin kehü mah nyutsü gunla chi. 42Kechamvule ale nnyon kelo ka, hagun le tha pe ano tyü mvu; ale teri keloka, hagun le tha pe ano tsülo mvu. 43Ale tesin thyü kehü ka hagun le a nsinlo mvula; ale akenben kehü ka hagun le phinya pe a henshü mvula; lo ho lo dothyü kebin kae hagun le ryüo a nthon mvukela genyu.’

44“Lo tsükatsü anyugun ko a-ka, ‘Npugü, agun le dicheka nle nnyon kehü lo teri kehü, lotesin thyü kehü, lo nkenben kehü, lo ho, lo dothyü kebin hyuo n leyi mvula ola? 45Lo tsükatsü a-le anyugun ka, ‘Ale hagun ka zo tsentsü shüti, keshen tsin temi hidan ge thyüshü kemvu tsü le age thyüshü kemvu keme.’ 46Tsüselo tsüdan le kethonthen shaja kethyü nyugun la ti; ai kentsen nyu ju we kethonthen kerhün nyu gunla ti.”

Currently Selected:

MATHI 25: REGSBSI

Highlight

Copy