MATHI 17

Jisu Keyhun Thyüpe Kecha Thyükela

(Mk 9:2-13; Lk 9:28-36)

1Lo jon tsero siki Jisu le Pitor, lo Jakob,lo tsügü sikezengü Johan nyugun pe a-sinlo njüo tsüdan zen kecha thyü sen-o kazüthun ketetso nme ge küla. 2Tson-o a-le anyugun yhühyu ka a-keyhun no kecha thyüla, lo a-mhun le yhüko hontse benchvüla, lo a-phinya ko chon pe keben hontse la. 3Tson-o hire, Mosa lo Elia au le tsünyu ryüo anyugun yhühyu ka a-zen kenthon. 4Tsontsin Pitor le Jisu ka, “Npugü, ngun kengüo hinyu bin yatselo gwati le; Nkendo yatselo, ale hinyu hi then kenshen thyü shüti, nme le n genyu, nme le Mosa genyu, lo nme le Elia genyu.”

5Lo a-le jozo nsen ketseka hire, nmhu benchvü tsekethyü sü ryüo anyugun jepvülo; tsükatsü hire, nmhu tsüge tha zo keryü le hihontse: “Higü hile A nyu A kesogü le, Ale a-shwi pe a kenyü sa kehügü le; hagun a-jo nyülo nye,” tsonshü.

6Lo senthyükelo dan le jo tsü shalo ntsin chetsügü kazünyu nkhün kü tinla; lo nshvusa la. 7Lo Jisu le ryüo anyugun kesüo, “Soryü lo, lo nshvunya chi.” 8Tsontsin anyugun le anyugun yhütyü koshü ntsin Jisu nti anyugun zen kebin a-me temi nme-e hyu mvula.

9Tsüselo anyugun le kazüthun ge tsenryü kezhü ka Jisu le anyugun ka Temi Nyugü le kesinyu dan nyu rhünni solo kemvuthen hagun tha kehyu hi nme-e pe temi nme kae zo nya nye; tsonkethyü zola.

10Tsontsin senthyükelo ju le a-ketso-o, “Tsonlo nyuthyüo Elia le ryü ri mvuloshvu tsekethyü lesükesha tsin ju le zohü nla?”

11Tsontsin a-le anyugun ka, “Elia le ryüo tha aphu thyü kegwa thyüni shüti ketsin. 12Ai ale hagun ka zoshü ti, Elia le himhundyü ryü laso, lo tsüka mele a-shalo mvula; ai a-ge anyugun kendo dan thyüla. Temi Nyugüe tsühontse anyugun ben ka kenjün thyü ti.”

13Tsüsiki a-le Johan baptist gü rüla anyugun ka zokeshü senthyükelo ju le rüchün lo.

Tero Gwakemvu No Zenkehünyu Nme Thyü Ngwakeshü

(Mk 9:14-29; Lk 9:37-43)

14Tsüselo anyugun le me dan nyu ryü ntsin temi nme le Jisu ki ryüo a-mhundyü ka khosenlo njüo, 15“Npugü, Nle anyugü shwinjün shü lo; kechamvule a-le zoma thyüo kenjünthyü kebin genyu, lo a-le ntsoka tse mah nyue chetsüla kvuri, lo ntsoka tse zü nyue yüla la tse kehü genyu. 16Lo ale a-zen-o nle senthyükelo ju ki gun, ai anyugun le thyü ngwa loho laso,” tson.

17Tsontsin Jisu le annyugun ka, “Hire, joketsin zokemvu lo hagun nyun nshün kemvu ju, A no jon ditsü dithen laki hagun zen bin tila? A no jon dikho hagun ge akekheni bin tila? A-zen-o hika ryüo akishü re.” 18Tson-o Jisu le tero gwakemvu gü kesüshü, tsontsin tsüle a-ge chwila; lo tsükanyu ponyu gü thyü ngwa whü tselo la.

19Tsüsika senthyükelo ju npvü Jisu ki ryüo a-ka, “Agun we nyuthyüo a-hü loho la ola?”

20Tsontsin a-le anyugun ka, “Hagun ketenyen kerho genyu le. Ale hagun ka zo tsentsü shüti, hagun ketenyen le hennyon tsi tsülaki-e binlo kethyü we, hagun le kazüthun higü ka, ‘Nle hinyu ketu sen-o luki gülalo!’ tsonshüe a-le tin lati; lo hagun le thame thyülo keho ndi lati. 21Ai kehi lo tyütsü mvuo nyen kethyü nti genyu hihontse ketyü hi hülo hünyo; thakecha nme genyu honlo hümvu.”

Jisu Le A-kesi Lo Rhünnikeso Rüla Zonikeshü

(Mk 9:30-32; Lk 9:43-45)

22Tsüselo anyugun le Galil nyu kebin ka Jisu le anyugun ka, “Temi Nyugü tenpe me ben nyu shüla ti. 23Tson-o meno a-dushvu lati; lo a-le jonshen nyü rhünniso lati.”

Tsontsin anyugun le anyugun nyun gwamvu sa lola.

Kershvuka Khajana Pe Ketsü

24Tsükatsü anyugun le Kapernaum nyu ryülo, lo duli keshvu shvukequen kehü ju le Pitor ka ryüo, “Hagun senkethyü gü le duli keshvu shü hü le mvula,” tson-o ketsoshü.

25Lo a-le. “Ele, shü hünyo,” tsonshü.

Tson-o a-le kanyu yüryü ntsin Jisu le a-ka, “Simon, kazü hinyu rajanyu le senyuka a-ngun nmvue khajana lohü nla? Phennyünyu ka le tesin ka la?”

26Lo a-le, “Tesin kale,” tsonshü ntsin Jisu le a-ka, “Tsonyatselo phennyünyu we tha hoshü mvue gwa ado tsüle.” 27Ai anyugun no shesela lo keshvu genyu nle züda ki tsüo zü nyu hükhuvü shweshü chi! tson-o tsehü nsülo kerigü mün nyu nle raka nme hyulo ti; lo tsü khipe nnyi genyu tsüdan tsüla nye, tsonshü.

Currently Selected:

MATHI 17: REGSBSI

Highlight

Copy