LEVINYU 6
6
1Npugü le tejvu hidan pe Mosa tsüshü. 2Temi nmele a-pvünyu Israel nyu le thape a-no ntsen kebin rani pe tsümvula, nmvue a-hon rühu lola, nmvue a-sa lola, 3thakemhen peha hyulo-e nkuo a-le hyulo mvu letse swen lao, Npugü mhundyü nyu mula yatselo kerüshvu nme thyü ti. 4-5Temi nme le hihontse kethyü ka mula yatselo, a-le ketsin kemvu ka lihi hyulo-e tsü tho niti. A-le mvukela shakelo nyü a-sun lo tsünyeki tsime ge nki sin pe tsümvu loshvu. 6A-le thonikethyü kerüshvu tanyü nmvue tenyü tse a-ge tetsin kendi nme sen-o püshükeda gü ki ryüti. Tsüle me hakho ka a-mi tho shüti. 7Tson-o temi gü kemu genyu püshükeda gü le a-rora thyü lao a-kemu jüpe tsüti.
A-pentha rope Kerüshvu
8Npugü le Mosa ka zoshü 9Kero kerüshvu jvu hidan pe Aaron lo a-nyudan ka zoshü lo. Rope kerüshvu no khensin kershvubin ge bin, lo mah gü no rozin bin ti. 10Lo Püshükeda güle linen mirün ben linen nyao kershvubin ge jonbü khüpe kershvubin kho ka shü lati. 11Lo a-le phinya kelu lo-o jonbü gü sen kensenbin tegwen ki gü bin kenshün nme ka shü lati. 12Kershvubin gü ge mah no rozin bin mvulo shvu, tsü no nmhü la nya. Lonyü tsen Püshükeda gü le tesen pe tsüge shüo, rope kerüshvu ndalo-o kepvüshe kerüshvu keshvu pe roti. 13Mah gü no kershvubin ge rozin bin mvulo shvu, tsü no nmhü lanya.
Shye Kerüshvu
14Shyeni pe kerüshvu tejvu le hi. Aaron nyu püshükeda gü le kershvubin gü mhundyü nyu shyeni kerüshvu thyü pe Npugü tsüti. 15Tson-o a-le tho jenthüngwa, terzü lo tharün kegwa khilo-o tsü aphu pe Npugü rüshvu kebin zansü tsüpe kershvubin ge roti. Kerüshvu rün hi le Npugü le a-kenyü. 16-17Püshükeda nyu le a-sen tyüti. Tsüpe kebu no shümvu tse tensü thyülo-o Npugü kehü phika gü kamhun ka kenshün bin nyu tyü lati. Npugü le tsü pe ketyüketsü kerüshvu ka püshükeda nyu jün thyü laso. Tsüle kemu rora lo thonikethyü kerüshvu hontse nshünsa. 18Ryükejü gwenkho aphunyu Aaron tsipwen pechenyu aphu ketyüketsü kerüshvu ka tsü le anyugun jün thyüo tyü logwa. Kechanyu le ketyüketsü kerüshvu tsü kesü yatselo tsü kenshün kekvu le a-nthyünyü lati.
19Npugü le tejvu hidan pe Mosa tsüshü. 20Aaron tsipwen nyu khikho pe püshükeda tho nyu keshü genyu. A-khikho kecha thyükelo jonnyü (khenyütsen ketyüketsü kerüshvu hontse) a-le tho kilogram nme senryü, lonyü peha lo ngwen ki peha tse pe Npugü rüshvuti. 21Tsüpe terzü kerhün-o ketsekhun nme ka tsen-o boshwe pe shyeni kerüshvu hontse tharün kegwa thyüpe Npugü ki shüti. 22Ryükejü gwenkho aphu nyu Aaron tsipwen ligü higü Püshükengun tho thyü kebin gü le kerüshvu hi gü thyü ti. Tsü robu pe rora thyüpe Npugü ki shüti. 23Püshükeda nyu le shyeni kerüshvu tsü keshanyue tyülo nrün ndi, tsü aphu rola mvu loshvu.
Kemu Genyu Kerüshvu
24Npugü le Mosa ka zoshü 25Kemu rora jvu hidan pe Aaron lo a-nyudan tsüshü lo tse. Kemu rora genyu senru tsü pe kershvubin tesozin rope kerüshvu senru dan dushvu kehü bin ka dushvuti. Hile nshün sa kethyü kerüshvu nme. 26Püshükeda senru gü pe rora kethyü güle Npugü kehü phika gü kamhun nyu kenshün bin nme nyu tsü tyüti. 27Temi nmvue tha lihie senru gü thyü kesü keshü gü le tsügü kenshün kekvu le nthyü nyü lati. Senru tsügü zi le phi nye la yatselo, kenshün bin ka tsü thula mvuloshvu. 28Nnyola lihi ka thyü gü nilo tsü boren la lo tegi la ka nilo, tsü shon lao zü pe chwela mvulo shvu. 29Püshükeda kami peche ligü higü kerüshvu higü tyü logwa; tsüle nshünsa. 30Ai a-zi peha sen phika nyu ryüo kemu sentinla nrün lothothyü yatselo, senru gü thyütyü nyao tsü rola mvuloshvu.
Currently Selected:
LEVINYU 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
