LEVINYU 5
5
Kemu Rokethyü Ka Then Nrün
1Kemu rokethyü ka thakon hidan thenti. Temi peha no ryüo jokera bin nyu a-kesha kehyu ketsin tsü zoshü lotse koshüe zomvu laya tselo a-le khvu tsü pfü mvu loshvu.
2Temi peha le shamvuo nshün kemvu, nyukhu simi kesüla yatselo, a-le nyuthyü layo shalo nyemhun nshünmvu lo mu laso.
3Temi peha le shamvuo nshün kemvu temi ge chwikeryü lihie kesüla yatselo, a-le nyuthyü layo shalo nyemhun nshünmvu laso. 4Temi peha le tharüchün petsü kegwa thyümvuo swe la, thakon lihie, tson yatselo a-le tsü shalo nyemhun a-le mu laso.
5Temi nmele mula yatselo, a-no kemu gü tsü zoshwila mvu loshvu; 6lo a-kemu chün tanyü nmvue tenyü lü nme senryü Npugü tsüti. Püshükeda güle temi gü kemu genyu a-rora thyüti.
7Temi güle tanyü nmvue tenyü nme khishülo ho yatselo a-kemuchün genyu nsu nmvue paro kenyhun senryü ti nme le kemu ro kethyü lo kecha gü le rope kerüshvu genyu. 8A-le tsü sen-o püshükeda gü ki ryüti, lo püshükedda güle tegü kerigü pe kemu ro thyüti. A-le a-pe süthü mvuo a-gunda chwese lati, 9lo a-zi peha kezen pe kershvubin gü te gwenshü ti. Lo a-sen tsü jape kershvubin gü phasin ka shü lati. Hile kemu sentin kela kershvu nme. 10Tsüsika a-le tegü kenyhun gü tsü pe tejvu then-o rope kerüshvu thyüti. Hihontse püshükeda gü le temi gü kemu rora thyüo a-kemu jü pe tsüti.
11Temi nme le nsu nmvue paro kenyhun khishü loho yatselo, a-kemu genyu tho kilogram nme senryüti. A-le oliv terzü nmvue tharünkegwa nme pe tsüge shü loho, tsüle shyeni kerüshvu mvu le kemu rora genyu. 12A-le tsü sen püshükeda gü ki ryüti, tsü aphu pe Npugü tsü kela zansü, püshükeda güle jenthüngwa khipe ketyüketsü kerüshvu hontse kershvubin ge ro lati tsü le kemu sentin kela kerüshvu nme. 13Hihontseo püshükeda gü le temi gü kemu genyu rora thyüo a-kemu jüpe tsüti. Shyeni pe kerüshvu ka hontse; tho nsen kebin tsüle püshükeda gü hon.
Thonikethyü Kerüshvu
14Npugü le tejvu hidan pe Mosa tsüshü. 15Temi nme le shamvuo thyü kenshün pe Npugü ketsü hon khishü mvula yatselo, a-le tsü thoni kethyü tanyü nmvue tenyü tse tetsin kendi nme senryü Npugü rüshvu ti, tsüle me ha khoka a-mitho ti. 16A-le khishü mvukela gütsü shü lo tsüsoki tsime ge nki pe shümvu loshvu. A-le tsü pe püshükeda gü tsüti lo püshükedda gü le senru pe temi gü kemu rora thyüo a-kemu jüpe tsüti.
17Temi nme le shamvuo Npugü johokeshü nme gwenrho-o kemu thyüla yatse-e, a-le mu laso lo a-le kemuchün tha mvulo shvu. 18A-le kerüshvu mi thyüni kethyü chün tanyü nmvue tenyü tse tetsin nme kendi sen-o püshükeda gü ki ryü mvulo shvu. Tsüle me hakho ka a-mi tha ti. Püshükeda gü le temi gü le shamvu tse thyüzü kela kemu genyu tsü rora thyü lao a-kemu jü pe tsüti. 19Tsüle a-le Npugü mhundyü ka mu kela genyu kerüshvu min thyüni kethyü.
Currently Selected:
LEVINYU 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
