LEVINYU 7
7
Thonikethyü Kerüshvu
1Gwenrho kela genyu kerüshvu jvü le hi, tsüle nshünsa. 2Hi genyu kerüshvu senru tsüpe kershvubin tesozin rope kerüshvu nyukhu dan dushvu kehü bin ka dushvuti, lo tsü zi shwe pe kershvubin te lizin hizin aphu ka shüti. 3A-keshvu tsü aphu khipe kershvubin ge rüshvu lati: a-ma ge keshvu, a-rikerho, 4a-kisha lo tsüge kebin keshvu, a-sen kegwatsin. 5Püshükeda güle a-keshvu aphu pe kershvubin ge ketyüketsü kerüshvu hontse rope Npugü ki shü lati. Tsüle gwenrho kela genyu kerüshvu. 6Püshükeda kami peche ligü higü tyü logwa, ai kenshün bin ka tyü mvuloshvu, tsüle nshünsa.
7Gwenrhokela genyu kerüshvu lo kemu rora kethyü au jvu le nme: tsü thyü gü tsüle Püshükeda rora thyü keshü gü hon. 8Rope kerüshvu kethyü senru gü gi tsüle rora thyü kebin püshükeda gü hon. 9Shyeni pe kerüshvu maphun ka tsenkelo nmvue keshvula nmvue ketsenkhun ka tsenkelo lihie tsüpe Sunggigü rüshvu keshü Püshükeda gü hon. 10Ai terzü pe kerhün kela nmvue a-kesin-e shyeni pe kerüshvu ketegi aphu tsüle Aaron nyenyu püshükeda ju hon lo tsü pe anyu kenjün ketun lo mvulo shvu.
Kepfüshe Kerüshvu
11Kepfüshe kerüshvu pe Npugü ketsü jvu le hidan hi: 12Temi nme le chenkeno kerüshvu hi thyü pe Sunggigü ki shü ya tselo, a-le pe kerüshvu thyü nrün senru gü pe kebu no shü kemvu tensü kesin-o hoshüti: tho pe oliv terzü ka kerhün pe kethyü tensü thün nmvue oliv terzü pe yün kethyü tensü kerüpvü nmvue oliv terzü lo tho kerhün kethyü tensü pe sin ti. 13Tsünyeki, a-le kebu pe keshü tensü thün me pe sin-o rüshvu ti. 14A-le tensü kechacha tsü jün me pe Npugü ketsü thyü lati; tsü le senru gü zi shwe pe kershvubin ge keshü püshükeda gü hon. 15Khipe rora kethyü jonnyü senru gü thyü tsü tyüla mvuloshvu; tsü no bin-o lonyü gü tinya.
16Temi nme le zoshwishü kenjü thyüpenlo nmvue a-npvü a-kenyü ka kerüshvu hontse kepvüshe kethyü kerüshvu senryü yatselo, khipe rüshvu kethyü jon nyü tyü bula kemvui ai nsen kebin tsüsinyü tyü logwa. 17Ai thyü nsen bin-o jonshen ti yatselo pe rola mvuloshvu. 18Ai jonshen nyü tsü peha tyü yatselo Sunggigü le temi tsügü kerüshvu lo loho. Kerüshvu tsügü sümvu lati, tsüpe nshünkemvu thyü lati lo ligü higü tsü ketyü güle kemu khvu pfüti. 19Thyü güle lihie nshün kemvu kesü layatselo, tsü tyü loho ai pe rola mvuloshvu. Nshün kethyü nyu aphu thyü gü tyü logwa, 20ai lihigü nshün kemvu gü le tsü tyülo, a-le Sunggigü temi letse mvu lati. 21Lo lihigü temi nmvue senru ge nshünkemvu le kebin kesüo kerüshvu higü thyü tyü yatselo a-ko Sunggigü temi letse mvu lati.
22Npugü le tejvu hidan pe Mosa tsüshü, 23Israel temi genyu. Methu, tanyü nmvue tenyü keshvu tyü nya. 24Senru a-npvü sikela nmvue tehenthyü le tün kela keshvu tyünya ai pe thakecha lihie thyü logwa. 25Ligü higü senru pe ketyü kerüshvu thyüpe Npugü ketsü thyü keshvu tyü yatselo a-le Sunggigü temi letse mvu lati. 26Israel nyu le lika hika yhun hü-e anyugun le tegü nmvue thyü zi tyü loho. 27Ligü higü tejvu hi gwenrho kethyü gü le Sunggigü temi letse mvu lati.
28Npugü le tejvu hidan pe Mosa tsüshü, 29Israel temi genyu. Ligü higü kepvüshe kerüshvu sen keryü güle tsü peha pe jwe kerüche thyü senryü Npugü tsü mvuloshvu, 30ketyüketsü kerüshvu hontse a-npvü tsü senryü mvuloshvu. A-le senru gü keshvu lo a-nyü senryü jwe kerüche thyü pe Npugü tsüti. 31Püshükeda gü le a-keshvu pe kershvubin ge roti ai a-nyü le püshükedanyu dan hon. 32Kerüshvu kethyü senru gü pha nzhü gü pe 33tezi lo a-keshvu sin-o kepvüshe kerüshvu thyü keshü püshükeda gü tsü lati. 34Senru gü nyü tsüle jwe kerüche lo a-pha nzhü gü tsüle Npugü le Israel temi ka khikelo tsüpe püshükeddanyu tsü laso. Ryükejü gwenkho aphu ka Israel temi le higü hi pe püshükedanyu tsümvu loshvu. 35Ketyüketsü pe Npugü kerüshvu ka pe Aaron lo a-nyenyu ketsü le hi, anyugun kejü pe püshükeda thyü kelo nyü. 36Tsüjon nyü Npugü le Israel nyu no kerüshvu hon tsü pe anyugun tsü lotse johoshü, ryükejü gwenkho aphu nyu Israel nyu le tejü higü then mvulo shvu.
37Hidan hile rope kerüshvu, shyeni pe kerüshvu, kemu rora, gwenrhokela genyu kerüshvu, khikhokelo kerüshvu lo kepvüshe kerüshvu tejvü dan. 38Kazü kesi Sinai kazüthun ge Npugü le Israel nyu no kerüshvu thyü lo tse zo keshü jonnyü jo hidan pe Mosa tsüshü.
Currently Selected:
LEVINYU 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
