LEVINYU 4
4
Shamvuo Mukela Genyu Kerüshvu
1Npugü le Mosa no, 2Israel temi dan ka ligü higü shamvuo Npugü johokeshü lihie borho kela nyu no tejvu hidan then ti tse zoshü lotse shü.
3Püshükengun gü le kemu thyükela genyu kemu khvu le temi dan ge bin la yatselo, a-le methu tsebwe a-ge tetsin nme kendi senryüo a-kemu rora thyüpe Npugü ki shüti. 4A-le methutse gü zen phika gü khenpvü ka ryü, a-ben pe tsügü pe ge shüo Npugü mhundyü nyu tsü dushvu ti. 5Tson-o Püshükengun gü le methu tse gü zi peha sen-o phika gü nyu yüti. 6A-le a-zenkero pe tezi günyu ntsen lo njüo kesunphi kenshü gü mhundyü nyu gwen tsenyü ge kezen shüti. 7Tson-o a-le tezi peha pe phika günyu tharünkegwa kershvubin qvün ka a-to dan ge shü ti. A-le tezi nsenkebin tsü jape phika khenpvü ka rope rüshvu kehü kershvubin gü phasin ka shü lati. 8Ale methu tse gü ge a-keshvu aphu, a-ri kerho, 9a-kisha lo tsü ge a-keshvu lo a-sen kegwatsin khilo ti. 10Püshükeda gü le, a-le kepvüshe kerüshvu genyu senru dushvu kelo ka a-keshvu pe shü kehü hontse keshvu hidan khipe rope kershvubin thyü kehü bin ge ro lati. 11Ai a-le methu tse gü a-gi, a-thyü aphu, a-pe, apha lo a-sen a-ri sin, 12aphu sen-o kensenbin tegwen ki gü jonbü jala kehü bin kenshün nme ka tesen soge ro lati.
13Israel nyu temi süda le shamvuo Npugü johokeshü borho-o kemu thyüla yatselo 14kemu gütsü shalo nyemhun süda güle kemu ro kethyü methu tse bwe nme san ryüti. A nyugun le tsü sen-o Npugü kehü phika gü ka ryüo; 15sharhinyu dan no ben shwe pe tsügü pe ge shüo tsüka dushvu loti. 16Püshükengun gü le methu tse gü zi peha sen-o phika günyu yügü 17a-zenkero pe tsünyu ntsenlo-o kesunphi gü mhundyü nyu gwen tsenyü ge kezen shüti. 18A-le tezi peha pe phika günyu tharün kegwa kershvubin qvün ka a-to dan yün shüti lo a-sen jape, phika gü khenpvü ka kebin rope kershvubin gü phasin ka shü lati. 19Tson-o a-le tsü keshvu aphu pe kershvubin ge ro lati. 20A-le kemu ro kethyü methu tse gü pe kethyü hontse methu tse higü ko pe tson lati lo hihontseo a-le temi dan kemu genyu rora thyüo anyugun kemu jü lati. 21Tson-o a-le methu tse gü sen-o kensenbin tegwen ki gü a-npfü a-kemu ro kethyü methu tse gü tsü hontse ro lati. Hile süda gü kemu sentin kela kerüshvu.
22Kekvu kesen nyu nme le shamvuo Npugü johokeshü nme borho lao mula yatselo, 23a-le mukela shalo nyemhun a-no tetsin nme kendi tenyü tse nme sen ryüti. 24Lo a-le a-ben pe tsü gü pe ge shüo, rope kerüshvu thyü kehü senru dushvu kehü kershvubin teso zin tsü dushvu loti. Hile kemu sentinla nrün kerüshvu. 25Püshükeda güle a-zankoro pe senru gü zika ntsen lo-o pe kershvubin qvün ka a-to dan yün shü lo a-sen jape kershvubin phasin ka shü lati. 26Tson-o a-le kepvüshe kerüshvu genyu senru dushvuo a-keshvu kero hontse tsü keshvu aphu pe kershvubin ge ro lati. Hihontseo püshükeda gü le kekvukesen gü kemu rora thyü lao a-kemu jüpe tsüti.
27Mija nyu nme le shamvuo Npugü johokeshü nme borho lao mula yatselo, 28a-le mukela shalo nyemhun a-no tetsin nme kendi tenyü lü nme senryüti. 29A-le a-ben pe tsügü pe ge shüo rope kerüshvu thyü kehü senru dushvu kehü kershvubin tesozin tsü dushvu loti. 30Püshükeda gü le a-zenkero pe senru gü zi nyu ntsenlo-o pe kershvubin gü qvün ka a-to dan yün shü lo a-sen jape kershvubin gü phasin ka shü lati. 31Tson-o a-le kepvüshe kerüshvu genyu senru dushvu kethyü ka a-keshvu khila kehü hontse a-keshvu aphu bolati, lo a-rün Npugü no a-kenyü nrün genyu pe kershvubin ge ro lati. Hihon tseo püshükeda gü le temi gü kemu rora thyü lao a-kemu jüpe tsüti.
32Temi nmele kemu ro kethyü genyu tanyü senryü yatselo, tsüno tetsin kendi lü nme mvuloshvu. 33A-le a-ben pe tsügü pe ge shüo, rope kerüshvu genyu senru dushvu kehü kershvubin tesozin tsü dushvulo. 34Püshükeda gü le a-zenkero pe senru gü zi nyu ntsen lo-o kershvubin qvün ka a-to dan yün shüti, lo a-sen jape kershvubin gü phasin ka shü lati. 35Tson-o a-le kepvüshe kerüshvu genyu tanyü dushvuo a-keshvu khi kela hontse a-keshvu aphu khi lati, lo a-le tsü pe ketyüketsü pe Npugü ketsü kesin-o kershvubin ge ro lati. Hihontse püshükeda gü le temi gü kemu rora thyüo a-kemu jü pe tsüti.
Currently Selected:
LEVINYU 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
