LEVINYU 3
3
Kepfüshe Kerüshvu
1Ligü higü methu nme pe kepvüshe kerüshvu thyü yatselo, tsü le a-tse nmvue a-lü tetsin nme kendi ti. 2Temi gü le a-ben pe senru gü pe ge shüo Npugü kehü Phika gü khenpvü ka tsü dushvu ti. Lo Aaron nyu püshükeda dan le tezi gü shwe pe kershvubin gü te lizin hizin a-phu ka shüti 3lo senru thyü hidan pe ketyüketsü kerüshvu thyü pe Npugü ki shüti: a-ri ge keshvu aphu, 4a-kisha lo tsüge kebin keshvu lo a-sen kegwa tsin. 5Püshükeda gü le hi aphu pe rope kerüshvu kesin-o kershvubin ge ro lati. Ketyüketsü kerüshvu rün hi Npugü le a-kenyü.
6Tanyü nmvue tenyü nme sen-o kepvüshe kerüshvu thyü yatselo, tsüle tse nmvue lü-e logwa ai tsüno a-ge tetsin nme kendi mvulo shvu. 7Temi nme le tanyü nme pe rüshvu yatselo, 8a-le a-ben pe tsügü pe ge shüo phika gü mhundyü nyu tsü dushvu loti. Püshükedagü le a-zi shwe pe kershvubin lizin hizin aphu nyu shü ti, 9lo senru gü thyü hidan pe ketyüketsü kerüshvu thyü pe Npugü ki shüti: a-keshvu, a-senru khoka a-ma duthü kelo ge keshvu, a-ri kerho aphu, 10a-kisha lo tsüge keshvu dan, lo a-sen kegwatsin. 11Püshükeda güle hi aphu pe kershvubin ge ketyüketsü kerüshvu hontse rope Npugü ki shü lati.
12Temi nme le tenyü nme pe rüshvu yatselo, 13a-le a-ben pe tsügü pe ge shüo phika gü mhundyü tsü dushvu loti. Püshükeda gü le a-zi shwe pe kershvubin te lizin hizin aphu nyu shü lati, 14lo thyü hidan pe ketyüketsü kerüshvu thyü pe Npugü ki shüti: a-ri kerho aphu, 15a-kisha tsü ge kebin keshvu, lo a-sen kegwatsin, 16Püshükeda gü le hi aphu pe kershvubin ge rope ketyüketsü kerüshvu Npugü kenyü thyü lati. A-keshvu aphu Npugü hon. 17Israel nyu nme no a-keshvu nmvue a-zi tyü nya. Israel nyu le lika hika yhun hü-e kethonthen hipe tejvu nme thyüo then hüti.
Currently Selected:
LEVINYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
