LEVINYU 2
2
Shye Kerüshvu
1Ligü higü shyeni pe Npugü rüshvu titse lo, a-le tsü dun shwelo. Oliv terzü lo tharün kegwa jape tsü ge shüo, 2senryü Aaron nyu püshükeda dan tsüshü mvuloshvu. Lo Püshükeda güle tho jenthün gwa, terzü lo tharün kegwa aphu pe kershvubin ge ro-o tsü aphu pe Npugü rüshvukebin zansü thyü shüti. Ketyüketsü kerüshvu rün hi Npugü le a-kenyü. 3Shyeni pe kerüshvu thyü kensen tsüle püshükedanyu hon; tsüle ketyüke tsü pe Npugü kerüshvu ka khikelo genyu nshünsa. 4Kerüshvu tsüle maphun nyu tsen kelo tensü yatselo, kebu no shükemvu mvulo shvu. Tsüle oliv terzü pe tho kerhüo kethyü tensü kesü nmvue tensü kerüpvü oliv terzü pe yün kethyü logwa.
5Kerüshvu gü tsüle ketsen khun ge tsen kelo tensü yatselo; tho pe oliv terzü ka kerhün ai kebu shükemvu ti. 6Nle tsü pe rüshvu kethyü ka boren lo njüo terzü jape shülo.
7Kerüshvu gü tsüle tensü yatselo tho lo oliv terzü ketsenkhun ka tsenlo mvuloshvu. 8Tsü senryü Npugü rüshvuo püshükedagü tsüshü, lo a-le tsü sen kershvubin ka güti. 9Püshükeda gü le tsü aphu pe Npugü rüshvu tse kethyü zansü peha khilo-o pe kershvubin ge ro shüti. Ketyüketsü kerüshvu rün hi Npugü le a-kenyü. 10Kerüshvu thyü kensen tsüle püshükeda nyu hon; tsüle ketyüketsü pe Npugü kerüshvu ka khikelo genyu nshün sa.
11Hagun le shyeni pe Npugü kerüshvu lihikae kebu no shü lo nrün ndi; hagun le ketyüketsü pe Npugü kerüshvu ka kebu nmvue khuzü sen nya. 12Chen kechwi hagun logvü lokeri sen Npugü ki ryüti; ai tsü pe kershvubin ge ro nrün genyu mvu. 13Ketyüketsü kerüshvu aphu ka tsi pe shülo, tsi le Sunggigü hagun jaka kejozenkelo gü sun genyu. (Hagun kerüshvu aphu ka tsi pe shü mvulo shvu.) 14Nle logvü lo keri sen Npugü rüshvu keryü ka shvukela nmvue dun kela pe rüshvulo. 15Oliv terzü lo tharünkegwa pe sinlo. 16Püshükedagü le ketyüketsü, terzü lo tharün kegwatsin aphu rope ketyüketsü pe Npugü rüshvu kebin zansü thyüti.
Currently Selected:
LEVINYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
