LEVINYU 18
18
Kejakemvutho Thyünya Lotse Kethyü
1Npugü le Mosa ka zoshü 2Israel nyu ka zoshülo, “Ale Npugü hagun Sunggigü.” 3Hagun le gwengwa a-kazünyu yhun keryü Ijipt nyu nmvue ale ntsoka hagun zen-o gü kejü Kanan nyu dan jvu then nya. 4A tejvu dan zen lo lo a-johokeshü thyü lo. Ale Npugü hagun Sunggigü. 5Ale rhikeshü lo tejvu khi keshü dan thenlo; tson yatselo hagun le rhün loti. “Ale Npugü.” 6Npugü le tejvu hidan khishü. Nshvunye nme zen-o peche tenu jvu thyü nya. 7Njvu zen peche tenu jvu thyüo Npvü nshwenya. Nle npvü njvu nshwe nya. 8Nle npvü nu kechadan zen peche tenu jvü thyüo Npvü nshwenya. 9Nlügi kame nyu nmvue ka cha ki yhun soryü metse nle zen-o peche tenu jvu thyünya. 10Nle ntsugi zen peche tenu jvu thyünya, tsüle nnpvü nkenshwe. 11Nle njvu nyugi zen peche tenu jvü thyünya, tsügi ko nlügi. 12-13Nle npvü lügi nmvue njvu sikezengi zen peche tenu jvu thyünya, tsüle nnyü lo njvuso. 14Nnyo nu zen peche tenu jvu thyünya, a-le njvu genyu. 15Nmonyu zen peche tenu jvu thyünya 16nmvue ntsasikezen nu zen nya. 17Nle zen-o peche tenu thyü kela gi nyugi nmvue a-nyenyu nyugi zen peche tenu jvu thyünya, anyugun le nshvunye thyü bin logwa lo tsüle serikemvu. 18Nnu le rhün kebin ka a-sikezen gi lope nnu nme thyü ni nya.
19Tenunyu nme le tenunyu jvu thyü kebin ka a-zen peche tenu jvu thyünya, a-le nshün kemvu genyu. 20Nle me nunyu zen peche tenu jvu thyüo nthyü nrhu lanya. 21Nnyenyu nme-e khipe Molek tero gü kerüshvu thyüo Npugü Sunggigü zan kenshwe thyü nya. 22Temi nme le tenunyu zen zhü kethyü hontse pechenyu zen zhü loshvu; Sunggigü le tsü shwintsü. 23Peche nmvue tenunyu nme le senru zen-o peche tenu jvü thyülo nthyü nrhu lati.
24Tha hidan hi nme thyüpe hagun npfü hagun thyü nrhula nyalo, kechamvule ale hagun mhundyünyu hüpe shwe kebin tsipwen dan aphu hipe anyugun nrhu kela genyu. 25Anyugun tho le kazü gü nrhula tsügenyu Npugü le shaja pe kazü gü tsüo tsünyu keyhun nyu kenilaso. 26-27Anyugun le kentsükenche tho hidan aphu thyüo kazü gü nrhula, ai hagun we tsüdan thyünya. Israel nyu nmvue hagun dannyu kebin tesin dan metse hagun aphu Npugü tejvu gü lo a-johokeshü dan thenlo, 28tson yatselo kazü gü le hagun mhundyü keyhun temi dan kenikela hontse hagun kenila loho. 29Ligü higü kentsükenche hidan kethyü güle Sunggigü temi nme letse rüchün sinmvu lati tse hagun le shabin nyo.
30Npugü le zo, “Ale johokeshü gü zenlo lo hagun mhundyü keyhun nyu dan jvu then nya, Ale Npugü hagun Sunggigü.”
Currently Selected:
LEVINYU 18: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
