LEVINYU 19
19
Kenshün Lo Kenjü Tejvü Dan
1Npugü le Mosa ka zoshü 2Israel temi dan ka zoshü lo tseo, “Nshün lo, ale Npugü hagun Sunggigü ale nshün kethyü genyu. 3Ale johokeshü hontse, hagun nmeme tse a-jvü lo a-pvü rühvulo lo Sabbath zen mvuloshvu. Ale Npugü hagun Sunggigü.
4“Akheo tero kecha rüshvu nya; tegi pe teromen thyüo tsü rüshvunya. Ale Npugü hagun Sunggigü.
5“Hagun le kepvüshe kerüshvu senru dushvu kethyü ka ale khipe hagun ketsü jvü thenlo, lo ale hagun kerüshvu loti. 6Senru gü dushvu kethyü jonnyü lo sendu gü thyü gü tyüla mvu loshvu. Thyü lihie jonshen keti nsen bin lo rola mvuloshvu, 7tsüle nshünmvu laso, lo ligü higü tsü tyüya tselo ale kerüshvu tsü lo loho. 8Ligü higü tsü ketyü güle thyü kenshün pe atsü kela tsüpe kedukeru thyü kela genyu kemu pfüti, lo a-le atemi letse rüchün sinmvu lati.
9“Nle nlow gvü kethyü ka a-temhun tsü gvü nya. 10N vain low nyu rani gü vain sha nmhin kela dan fü kequen nmvue che kela dan jün nya; khepe kendinyu lo tesin dan tsüla lo. Ale Npugü hagun Sunggigü.
11“Rühu nmvue mesalo nmvue nku nya. 12Nle then kemvui yatselo azan zo-o swe nya, tsüle azan nrhula hünyo. Ale Npugü hagun Sunggigü.
13“Nle me nshwe nmvue a-hon selo nrün ndi. Nle jonshe chün pe tsümvuo khejeme khinbin lo nrün ndi. 14A-yhütingwa kemvunyu swe tsünya nmvue tha pe yhükepo nyu mhundyü ka shüo no a-pha nsü nya. A nshvulo; Ale Npugü hagun Sunggigü.
15“Nle jokera kethyü ka kenjü lo ketsinnyu jopenlo; kendi gü njün nmvue kenya gü nshvunya. 16Nkuo temi nme rüla zo nshvunya, lo temi peha no sila titseo a-jünkera kebin ka nle a-chye lo kegwa rüla shabin yatselo zoshü. Ale Npugü.
17“Nle me rüchün nshvunya, ai a-genyu kemu thyüla mvu nrün genyu hai kenthon penlo la mvuloshvu. 18Temi nme ge hagun khünzo ni nmvue a-nrhizin bin nya, ai nkazon nyu so pe n npvü nkeso hontselo. Ale Npugü.
19“A johokeshü dan zenlo. N senru no senru a-zan kecha chon nya. Low nme nyu ntsi kecha kenyhun pe shünya. Kechacha kethyü kenyhun pe kedo phi ben nya.
20“Do gi nme le temi nme thenu thyü bin lo tsügü le a-min thyü lao a-hoshü kela thyü mvu kebin ka kechanyu nme le zen zhüla yatselo shaja pe au tsüti ai dushvu lo nrün ndi, a-le do gi genyu. 21A-le tejvu gwenrho kela kerüshvu genyu tanyü tse nme sen-o ale kehü Phika gü khenpvü ka ryüti, 22lo Püshükeda gü le tsü pe kemu sentinla nrün a-rora thyü lao Sunggigü le a-kemu jüpe tsüti.
23“Hagun le Kanan kazü nyu ryülo-o terasha bin lihie sen yatselo, chenkeri chenshen tsüle terasha gü le nshünmvu tse rüchün mvuloshvu. Tsü gwenkho ka hagun le tyünya. 24Chenzi chen terasha tsü aphu thyü kenshün pe atsüo Npugü chenkeno tsinshü mvuloshvu. 25Ai chenpvün chen hagun le terasha gü tyü logwa. Hagun le hi aphu thyü yatselo hagun rasha le nsha kvu loti. Ale Npugü hagun Sunggigü.
26“Tezi pe kesin-o thyü nme tyünya. Temvu nme thyü nya. 27Hagun peshwehun nmvue hagun mün hü tsela nya 28hagun ge thazü nmvue kesi genyu hagun thyü rüthüo chechü nya. Ale Npugü.
29“Nnyu gi dan no kerüshvuka nyu keyüla chün ketyünyu thyüo keja pfünya, nle tson yatselo rani tero kecha ki güo serikemvu le kazü gü sü lati. 30Sabbath thenlo, lo a-kershvubin gü rühvulo. Ale Npugü.
31“Kesinyu kapu nthon kehü nyu ki gü tha ketso nya. Nle tsü thyü yatselo nshünmvu lati. Ale Npugü hagun Sunggigü.
32“Püshünyu mhundyü solo lo rühvulo. A rühvuo ajo zenlo. Ale Npugü.
33“Hagun kazü ka kebin tesin dan ge a-zükemvu thyünya. 34Israel nyu ge thyü kehü hontse anyugen thyülo, lo n npvü nkeso hontse anyugun solo. Hagun ko gwengwa me Ijipt ki tesin thyü kehü tsü rüchünlo. Ale Npugü hagun Sunggigü.
35“Nkuo kethon, kensu, nmvue kechonkerho kenda ka mesa nya. 36Kesükü, kensu lo thakendo ka ketsin senlo. Ale Npugü hagun Sunggigü, Ijipt nyu hagun zenchwi keryü güle. 37A tejvü lo a johokeshü aphu zenlo. Ale Npugü.”
Currently Selected:
LEVINYU 19: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
