LEVINYU 17
17
Tezi Kenshün
1Npugü le Mosa no 2Aaron, a-nyudan lo Israel nyu aphu tsüshü lotse tejvu hidan khishü. 3-4Israel nyu nme le Npugü kehü Phika gü khenpvü ka mvuo bin kecha liki hiki methu nmvue tanyü nmvue tenyü dushvu pe Npugü rüshvu yatselo a-le tejvü gü borho laso. A-le tezitsun laso lo a-lope Sunggigü temi nme tse rüchün sinmvu lati. 5Johokeshü higü kon le Israel nyu le phenchvüki senru dushvu kehü tsü ntso ka we sen Npugü ki ryülo nrün genyu. A-nyu le ntsoka we tsüdan sen Phika gü khenpvü ka Püshükeda gü ki ryüo tsü dushvu pe kepvüshe kerüshvu thyüti. 6Püshükeda güle tezi gü shwenpe Phika gü khenpvü ka kershvubin te lizin hizin shüla lo a-keshvu rope a-rün kenyü thyüpe Npugü ki shüti. 7Israel nyu no phenchvüki anyugun senru dushvu pe tero rüshvuo Npugü mhundyü nyu pütsü kemvutho thyü sinlo haso. Ryükejü gwenkho aphu ka Israel nyu le tejvu higü then mvu loshvu.
8Israel nyu nmvue tesin anyudan nyu kehü ligü higü rope kerüshvu nmvue kerüshvu kecha lihie 9Phika gü khenpvü ka mvuo kecha ki Npugü rüshvu yatselo tsügü le Sunggigü temi letse rüchün sinmvu lati.
10Israel nyu nmvue tesin hagun dannyu keyhun nyu ligü higü tezi lihie tyüyatselo Npugü le a-ntsun ti lo tsügü le a-temi letse rüchün sinmvu lati. 11Yhun kehü lihie a-keyhun ronzin le tezi günyu bin, tsügenyu Npugü le temi dan kemu sentinla nrün genyu tezi aphu run pe kershvubin ge shü lalo tse johoshü. Kerhün le a-ge kebin, Tezi tsüle kemudan sentin lahü. 12Tsü genyu Npugü le Israel temi nmvue tesin a-nyu dan nyu kehü nyue no tezi tyünya lotse shü.
13Israel nyu nmvue tesin hagun dan nyu kehü nyu ligü higü thyü nmvue tegü kenshün hüo bolo yatselo a-zi runpe kazü nyu shü lao nnyo pe henla mvuloshvu. 14Yhunkehü lihie a-keyhun ronzin le tezi günyu bin, tsügenyu Npugü le Israel nyu no tezi tyü nya lo ligü higü tezi ketyü gü we a-temi letse rüchün sinmvu lati tse zoshü.
15Ligü higü Israel nyu nmvue tesin-e nyukhu a-npfü kesi nmvue thale tün kela thyü ketyü güle a-phinya thula lo zülu la mvuloshvu lo nshünmvu bin-o ngwün gü tio tsü siki nshün loti. 16A-le tsonmvu yatselo a-kemu genyu kenjün thyü mvu loshvu.
Currently Selected:
LEVINYU 17: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
