CHEKECHÜ 4
4
Chekela Siki Jerusalem Rüla
1Agun suna kenshwen le zünla;
Kershvuka gü nyu tso dan le tsonda
nyu kezen laso.
2Zion selo dan le agun mhundyü ka suna
minketsen hontse hü le,
Ai ntsoka we tsü dan lope nnyonla kedukeru
hontse laso.
3Teken-e a-nyu no a-hontsü hü,
ai atemi dan we Ostrich gü hontse
a-nyu ge a-jvü gwamvu laso.
4Anyugun le anyu nyu dan no nnyon
lo terio sila hü;
ntsenyu dan le chvü hie nme-e pe
anyugun tsü hümvu.
5Gwüngwa chvü kegwatsin tyü kehü
tsonda nyu khün sibin;
Yhun ketegvü kehü nyu le kerhubin
nyu chvü fü hü laso.
6Atemi dan shaja le Sodom nyu
keyhun nyu nyeki tsenkvu laso.
tsü dan le whütse Sunggigü
ben nyu chela.
7Agun raja dan le rhumvu lo nshün
pe khetso hontse,
mero lo nko lo anyugun thyüe
ben.
8Ntsoka we si pe anyugun mhun metsen,
anyugun gi le nko pe tesen kesi hontse;
anyugun ru jepvüo shakemvu nyu
hontse tsonda nyu keto bin.
9Teri nyu sikela nyu le kenkhin ki chvü
ndio khünsi kela nyu nyeki gwakvu.
10Kenke atemi ge keryü tsü le kerü
keshvu senryü;
tsü le anyenyu so kehü mejvü nyu
le anyenyu bü tyü.
11Npugü le a-nyun kenthün süni mvu;
a-le Zion nyu mah nnyü shüo tsü
roshe pe kazü nyu shüla.
12Temi nme-e lo sin rünyi ki senye kekvu
kesen nyu-e;
Mele Jerusalem khinrun nyu yülo titse
tenyen mvu.
13Ai tsü le tsonla, a-sidyükezonyu le
mula.
lo püshükedanyu le thyüzüo kemu kendi
nyu no sikela genyu.
14A-sharhi dan le yhükephonyu hontseo
tsonda nyu ho,
lo tezi lope anyugun nyeo temi nme-e
no anyugun kesülo mvula.
15Temi dan le nrasen-o zo, “Tinla lo.”
“Hagun le rhu laso! A kesü nyalo!”
Tsügenyu anyugun le anyugun nsin kelo
min ndio senye kecha cha ka ko ho.
16Npugü le anyugun phin rüchün sinmvu la;
a-le anyugun hü kezen laso.
A-le agun püshükeda lo sharhi dan
sümvu laso.
17Agun le keche hyulo kemvu gü tsü
nri loho la kemvuthen nri ryü.
Agun le keche pe agun tsü lo keho
senye gü ka kekeche khwen bin.
18Kenrhinyu le agun nri lo lao agun le
tsonda nyu-e gülo mvula.
Agun jon le güla; kenkhin gü le
ryü laso.
19Logi le tsangneki shwa tsüryü kethyü nyeki
nmhen-o anyugun le agun hü tsüryü.
Anyugun le rincho ge agun hü zen
tsüryü;
agun le shabin kemvu ka kazü kesi nyu
agun tenlo.
20Anyugun le Npugü le kejükelo raja gü,
agun keyhun bin gü ten lola,
Agun hü keryü nyu aphu ka agun ntsen kelo
nrin kehü gü.
21Edom lo Uz temi dan, hagun dyü gwalo,
thyülo kegwathen hagun kenyülo.
Hagun kenke ko ryüjü nyo; hagun ko hagun
kenyhün kezekego-o kejokepvü thyüti.
22Zion le a-kemu tho laso; Npugü le agun no
me kazü ki dothyü sin loho so.
Ai Edom, Npugü le shaja pe ntsü ti;
a-le nthyü kezü khishwi shüti.
Currently Selected:
CHEKECHÜ 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
