CHEKECHÜ 3
3
Shaja, Nyunkelu Lo Sidyü
1Sunggigü le shaja pe tsükela tsü le
nyu yo tsekethyü kehyu gü tsü le ale sha.
2A-le ahü pe kezün nyu shü ntsun
ketsin la.
3Lo shwikenjün ndi shütse
avü nini shü.
4A-le athyü amin khe pe kedukeru thyü,
lo aru dan bosela.
5A-le alope kenjün kethyü lo gwün keshvu
do nyu khinla.
6A-le tenge tse ano kentsü kenche kesi
kezün nyu yhun.
7A-le tegi ron pe aphinla; ale tinlo nrün
nrinlo keho donyu nme le.
8Ale nra tetso-o keche hi, ai Sunggigü
le nyümvu letse la;
9Ale kezekego-o tsonchü; tsokhwe le
ale lihiki gü-e atson khin.
10A-le thyügwen hontse atson khwen;
a-le shünyho hontse a gwün ryü.
11A-le ajon pe tson teki shü, asüthü
sürü lao akhela.
12A-le a-tho levü khilo-o a-thotsi
lope a ntsen
13A-le a-thotsi kvu pe amin shwen
ntsun sala.
14Temi dan le jon gwün ashwinyü; ale
anyugun aphu mhundyü ka shwikenyü nme.
15A-le kenjün kethyü kekhü pe
atsü ala.
16A-le amhun sü pe kazü gen shon
lo tso ketepen dan ge ahü vürü la.
17Ale phu kesherhün, nyun kebwen
lo shekerhün le nyuyo nmhinla.
18Ale yhunthon sari kemvui so; Npugü
nyu akenrin le ndi laso.
19Akenjün kethyü lo aka kendi kerüchün
le terün kekhü le.
20Ale tsü rüchün zin kethyü ka
ashese la.
21Ai ale tha nme hi rüchün kelo ka
akenrin hyuni lo:
22Npugü sozin kehü lo shwikenjün le
ntsokhin bin zun,
23Tsü le lonyü kegwa lo yhüko chwiryü
tsentsü kehü hontse.
24Npugü le ahon, tsügenyu a-ge akenrin
le bin hü.
25Npugü le a-tenyen kehü nyu aphu
genyu gwa,
26Tsügenyu nhenhio a-khwen kelo le ngun
genyu gwatsin- tsü le ngun kenishü
lotse a-khwen kethyü.
27Lo ngun selo ka nhenhi kethyü higü
shalo kela le gwatsin.
28Ngun le kenjün thyükelo ka, n npvü ma tse
nhenhio dun tinla mvu loshvu;
29Ngun le tsenyo tsüla mvu loshvu,
nsidyü le bin zun logwa kethyü genyu.
30A-le nvü lo n nshwen la-e tsü aphu
tsonzü le tsela mvu loshvu.
31Npugü le shwinjün sa, tsügenyu kethonthen
ngun khela loho.
32A-le nyun kenjün kethyü senryü ngun tsüe logwa,
ai a-le ngun keso le tsentsü lo nko.
33A-le ngun no nyungwamvu lo kenjün thyü
kethyü le a-kenda mvu.
34Doka nyu ngun kapu boshwen kela ka
Npugü le sha;
35A-le kenjü pe ngun ketsü gü tsü mele
kenilae a-le shabin;
36Jokerabin nyu kenjü jo kekhün lae
a-le shabin.
37Npugü kendo gü tsü le a-zin thyülo
hü nyo.
38Kegwa lo keshvue a-jo nyu penla
hü.
39Nyuthyüo nkemu genyu shaja hyukelo ka
a-zin tse kenyo mon?
40Ngun tson dan rüchün shwio Npugü ki
rani gü tinu.
41Ngun nyun khinshe pe tsangge
Sunggigü tsüo hi tile,
42“Agun le mula, lo n nrenla, lo nle
agun kemu jüshü mvula le, O Npugü.
43“Nle agun hü lo agun boshvula;
nnyunkenta nyu nshwikenjün kebula,
44Nnyunkenthün khelukesü le süri kela
genyu agun kehi le pvüphelo mvula.
45Nle agun thyü pe kazü no khekela
nyu thyüla.
46“Agun kenrhinyu aphu agun nshwen lo
shwinyü.
47Agun le kenke lo kenjün kethyü nyu hü;
agun le kenshvu lo nyun nkhi kethyü nyu yhunryü.
48Atemi kenke genyu ayhüphu le züri
ketsun thyü.
49“A yhüphu le rinyu zü tsun thükemvu
hontse bin ti.
50Npugü le tsangge bin-o nrishüo
ngun hyu kemvuthen.
51Ale nyida gü nyu tenunyu dan ge thyü
keshü kehyu ka anyunkenjün thyüla.
52“A nrhilo kegwa kon kendi nyu ashwikerüchün
nyu chwa nyu ano tegü kemin hontse la.
53Anyugun le akerhün shwen pe tekhün
nyu shwenshüo tso pe khinla.
54Zü le aso tsun tsüryü, lo ale kesi
le khonni la sele tse rüchün la.
55“O Npugü, tekhün kentsun ki bin-o
ale nka hi,
56Lo ale nno akehi khwen nyü shü
lo tse nka hikeshü ka, nle nyüshü.
57Nle akehi kenishü lo ano nshvu nya
lo tse aka zo.
58“Npugü, nle akenishwi titse ryüo
akeyhun kenishü.
59Npugü, ajün zo shüta, njü kemvu
pe a ntsun kela tsü le nle shabin.
60Nle ashwikerüchün nyu le dihontse
a nrhio tedo rhipe a ntsun hü yo sha.
61“O Npugü, anyugun le akenshwen nle nyülo;
lo nle anyugun do aphu sha le.
62Jon gwün anyugun le arüla kenthon-o
tedo rhibin hü.
63Lonyü gun gü kheje keti anyugun le azo
pe keyü thyü.
64“O Npugü, anyugun tho genyu shaja pe
anyugun tsü ta;
65Shochün pe anyugun tsüo shekese pe
sü shüta!
66Anyugun hüo kazü nyu anyugun nke shü
lata!”
Currently Selected:
CHEKECHÜ 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
