CHEKECHÜ 1
1
Jerusalem Tha Kerüchün
1Gwengwa temi yhun sü kehü Jerusalem,
tsü le dihontse rin layo!
Gwengwa kazü le a-rühvu hü, ntsoka we
a-le magi nyu hontse laso;
Nyida aphu nyeki kegwa gü le gonyu
hontse laso.
2A-le khensin chüo yhüphu le a-jon
ki tsun tsü.
A-pvünyu when dan nme-e bin-o a-nyunthyü
nbwe nrün ndi so.
A-zen-o kerhün kehü nyu le a-kekhün lao
aphu a-ntsun tin laso.
3Kanyu Juda temi dan hüshwi lao njün keho
donyu thyü laso.
Anyugun le kazü kecha ki yhun-o, anyugun
hon letseo kokelo bin thame ndi-
Shwikerüchün nyu no hunlo lao thame
chwikelo tson ndi so.
4Temi nme-e kenshün jon nyü Kershvuka
nyuryüo rüshvu titse mvula.
Lünyu tsünyu lüthyü kehü dan le ho, lo
püshükedanyu le kenjünthyü nrakelo nti.
Nyida khinrun dan le nrun lao Zion le
kenjün kethyü nyu bin laso.
5A-shwikerüchün nyu le gwalo la, lo a-khipe
anyugun kekvu nyu shüla.
A-le kemu kechon thyükela dan aphu genyu
Npugü le a-no kenjün thyüla;
A-nyenyu dan tenlo-o zentin laso.
6Jerusalem gingvü kethyü tsü le
gü kela hon laso.
A-sharhidan le thyüzhe le nnyon-o
kvumvu kela hontse,
Anyugun kehünyu mhundyü tin kethyü
le kekvu ndi shüla.
7Nke pe rinryü kela gü, Jerusalem le
nduka gingvü kethyü rüchünlo.
A-le shwikerüchün nyu ben nyu yü kethyü
ka nme-e a-keche min ndila;
A-sokvu kelo nyu le a-le chekela shwi nyü.
8A-kerühvu le ndi so; a-le a-kenben lao
kejo pvü laso.
A-le nho lo kejo-o a-mhun kebu.
Jerusalem le kemu ketetsin thyü pe
a-npvü a-nrhu.
9A-nshünkemvu le hyu nnesa, ai a-le a-tho
genyu a-nyun kenkhi shamvu.
A-le chekela tsüle ketetsin; a-nyun thyü
nbwen keloi nme-e ndi.
A-shwikerüchün nyu le kvulo la, lo a-le
Npugü ka shwikenjün hi.
10A-shwikerüchün nyu le a-kenya aphu
selo la.
Tsüdan le Npugü le Juda kemvu nyu no gü
nya lotse kehü Kershvuka nyu yü kethyü
ale hyu.
11A-temi dan le tha tyü titse fü bin
nsen kenjün kethyü khwen thyü;
Anyugun le yhunlo nrün genyu
kenya lope ketyüketsü kelu.
Nyida gü le nrao, “Npugü, a nri
shülo,
ale rhokedyü thyükebin hi che shüta.”
12A-le tsü nken kegü nyu aphu ka nrao,
“A nrishü lo!”
“Nme-e ahontse kenjün thyü mvule,
kethyü higü le Npugü le a-nyun
kenta gwünkho ka senryüo agen keshü.
13“A-le tesoge mah nishü, lo tsüle
anyun ki aro hü.
A-le chwa nme pe a nsen lo-o asüsen
tsü ryü kazü nyu shüla.
Tsüselo a-le akhelao ano kenjün thyü
zin tinla.
14“A-le akemu aphu shalo-o tsüdan aphu
phin kesü la;
A-le tsüdan pe agunda ka hüshü, lo ale
kensu tsügü hensin kvumvu ketsin sola.
Npugü le akhipe shwikerüchün nyu tsüla,
lo ale anyugun ntsunlo nrün ndi.
15“Npugü le ashüpahü kenkotsin dan
shwinyü la;
A-le atemi selo dan nkela nrün genyu
rihü dan me nishü.
A-le atemi lope zu kethünbin nyu
vainsha hontse boshwela.
16“Tsügenyu ayhüphu tsun sa.
Nme-e anyun thyü nbwen lomvu so; nme-e
kepeche pe atsülo kemvui so.
Ashwikerüchün nyu le asokvulo laso;
atemi dan le thame ndi laso.
17“Aben keta shüe nme-e ache kemvui.
Npugü le lihizin shwikerüchün nyu
lope a ntsunlo laso;
Anyugun le alope tha kerhu nme
hontse bin.
18“Ai Npugü we njü, ale a-jo zenmvu
kela genyu.
Akhwe nyülo, lihiki temi aphu;
akenjün kethyü nyu a nrishü lo.
Atemi selo, peche tenunyue zen-o
dothyü tin laso.
19“Ale apvünyu dan ko, ai anyugun le
achemvu letse la.
Püshükeda lo sharhinyu le rhünlo
nrün genyu ketyüketsü fü hüo
nyida gü tsonda nyu sila.
20“Npugü, akenjün kethyü, lo akapu
kenjün kethyü nrishülo!
Akemu genyu anyun gwamvuo anyun
boren laso.
Tsonda nyu me dukeshvu le bin;
kanyuki-e kesi le bin laso.
21“Akenjün kethyü khwe nyü shülo;
nme-e anyun thyü nbwenlo kegwa ndi.
Nle kenke senryüo age keshü genyu
ashwikerüchün nyu le kenyü bin.
Nle zo kenjü jon gü senryü lo;
akenrhinyu no ahontse kenjün thyüla.
22“Anyugun gwakemvu aphu genyu a-nyu
nmula ta;
Nle akemu genyu shaja pe aketsü hontse
pe anyugun tsü ta.
Ale agwün kendi thyüo nra, lo ale kenjün
thyü a tesü kendi thyü bin nyo.”
Currently Selected:
CHEKECHÜ 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
