JEREMIAH 52
52
Jerusalem chekela
(2 Raj 24:18—25:7)
1Zedekiah le chen nki nme ka Juda raja thyülo, lo a-le chen tseryü nme Jerusalem nyu kekvu sen. A-jvü zan le Hamutal, Libnah nyida nyu yhun kehü Jeremiah nyugi. 2Raja Jehoiakim le kethyü tho hontse raja Zedekiah le mupe Npugü ntsun. 3Npugü le Jerusalem lo Juda temidan gen a-nyunta salao a-mhundyü nyu anyugun hüla.
Zedekiah le Babilon Raja gü Nebuchadnezzar ntsun sola, 4tsü genyu Nebuchadnezzar le a-rihü aphu zenryüo Jerusalem when, tsüle Zedekiah le raja thyükelo chen tekü ka shye tseryü gü jon tseryü nyü. Anyugun le nyida n gwen ki kensenbin thyü, lo chwida khwen pe tsü hunlo, 5lo tsü hontse khin bin-o Zedekiah keda chen tseryü nme ti. 6Tsü chen shye zigü jon tekü nyü chenda ketetsin, thyüsolao temidan le thame tyü nrün ndilao, 7nyida gü chwida dan runphe chwila. Babilon nyu le nyida gü hunbin-e shüpahü aphu kheje gwen tin küla. Anyugun le raja chwi tson nyu sen-o chwida hiehvu thyükensü kebin Khinrun gü nyu chwio Jordan ketejon kipon tinla. 8Ai Babilon rihü le raja Zedekiah hü gü Jeriko khoka kazü ketejon nyu a-tenlola, lo a-shüpahü aphu a-khela. 9Zedekiah zen gü Raja Nebuchadnezzar le Hamath lojvü nyu Riblah nyida nyu kebin a-tsüla, lo tsünyu Nebuchadnezzar le a-jünkera. 10Riblah ka Zedekiah yhühyu ka a-nyu dan boshvula lo Juda kedanyu dan ko pe hüla. 11Tsüsika a-le Zedekiah yhütyü tseritho lao ron pe a-dyüzen-o Babilon ki güla. Zedekiah le Babilon dokanyu bin-o a-kesi ti.
Kershvuka nke kethyü
(2 Raj 25:8-17)
12Babilon raja Nebuchadnezzar le raja thyükelo chen tseryüo tekü ka shye pvün gü jon ryü nyü, Nebuzaradan, raja tharhinyu lo a-rihü so kedagü le Jerusalem nyu yüla. 13A-le Kershvuka, raja ka, lo Jerusalem nyu temi kentsen nyu ka aphu rola; 14lo a-shüpahü le nyidagü chwida dan borhola. 15Tsüselo Nebuzaradan le nyida gü nyu kebin thathyü keshanyu lo Babilon kipon gü kela dan tenzen-o Babilon ki güla. 16Ai a-le rhokedyü tsin nyu, tha kendinyu peha khepe Juda nyu binla, tson-o a-le anyugun no vain chwi lo low nyu thathyü lotsela.
17Babilon nyu le Kershvu kanyu lazo kachon dan, lo lazo zükhun lo a-ketunbin dan lo lazo aphu pvüo Babilon ki güla. 18Anyugun le Kershvuka sho kenshün kethyü kanyü kekinkhun, lo kequenkehü la dan, mah kemben kanyüdan, senru dushvu pe kershvu zi shükehü khin, tharün kenyi rope kershvukhun, lo Kershvuka nyu senkehü lazo kenyü dan aphu pvü tinla. 19Anyugun le suna lo rükagi pe kethyü khun keshendan, mahgi kenhon kepen khindan, senru dushvu pe kerüshvu zi shü kehü khin, jonbü keshü khun, mah kenben bindan, tharünkenyü rope kershvukhun, lo zu pe kerüshvu ka senkehü khun aphu pvütinla. 20Raja Solomon le Kershvuka genyu kethyü lazo kanyüdan--tsüle kachon kenyhun, zükhin ketunbin, zükhin kedagü lo tsü rhunpvükebin methutse tseryü kenyhun dan--tsüle nsu rio sülomvu. 21-22Kachon kenyhun gü we shabin: kenyhun nren ketetso le meter 8 lo keda le meter 5:3. Tsühvu le a-küpvü lo tegi kesü le melimeter 75, kachon shahvu pe kesen lazo pe kethyü ketetso le meter 2:2, lo a-kehun aphu khüratyü sha thyü pe nthyü bin, lo aphu lazo pe kethyü. 23Kachon nmeme raki aphu kesin-o khüratyü tsinme le bin, lo henteküo tsero le kazü nyu bin-o hyuhü.
Juda temi zen-o Babilon ki güla
(2 Raj 25:18-21,27-30)
24Yie so kedagü Nebuzaradan le püshükedagü Seraiah, a-hensin kebin gü Zefaniah, lo Kershvuka nyu keda kentsen mishen tenzen-o tinla. 25A-le nyida tsügü nyu shüpahü so keda thyü kebin gü, raja tharhinyu mitsenyü tin mvuo nyida gü nyu kebin, lo keda thyü kebin gü kechegü, rihüdan tho kethu kipon kedagü, lo temi kentsen kecha mi hentsero dan tenzen-o tinla. 26Nebuzaradan le tsüdan zen gü Riblah nyida nyu Babilon rajagü kigü, 27tsüle Hamath lojvü nyu. Tsünyu rajagü le anyugun vüo boshvula.
Tson-o Juda temi dan anyugun kazü nyu anyu tenzen-o dothyü tinla. 28Higü hile Nebuchadnezzar le zen-o dothyü tinkela temi dan rüla thu kelo: A-le raja thyükelo chen tsenyü gü ka temi 3,023 zen tin; 29Chen tseryüo tetse güka Jerusalem nyu min 832; 30lo nki kenshen chen 745 zen tinla. Temi aphu kesin-o 4,600 zentinla.
31Evilmerodak le Babilon raja thyükelo chen Judanyu raja Jehoiachin shwi njün-o dokanyu a-khishwi shü. Tsüle Jehoiachin tenzen-o dothyü kegü chen shenryüo tsenyü gü shye tseryü kenyhun gü jon nkipvün nyü. 32Evilmerodak le a-shwi njün-o Babilon nyu dothyü kebin rajanyu kecha nyeki a-rühvu kvushü. 33Tsügenyu a-no donyu phinya senmvuo a-rhünthen raja gü miz nyu tyütsü tinla. 34A-le yhunkebin then a-no senmvulo keshvu pe a-tsüzin tinla.
Currently Selected:
JEREMIAH 52: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
