JONAH 3
3
Jona Le Npugü Jozen
1Gwengwa Npugü le Jona ka zoni. 2A-le zo, “Nyida gü Nineve ki güo ale pe nketsü jo tsü pe temidan ka zolo.” 3Tsügenyu Jona le Npugü khwen nyüo Nineve nyidagü jonshen tsonchüo pvüthülo kehü ki tsü gü. 4Jona le tsonchü sen-o nyida lvu nyu gü khenyüme penkelo siki zo, “Jon henzi jaka Nineve le nke lati!”
5Nineve nyu temidan le Sunggigü jo tenyenlola. Tsügenyu anyugun le temi aphu nyün mvulo shvu letse rhilo, lo kedatsingü ka gü keshentsin keti temi aphu nyunkelula sele tse kethyü zensü ronphi benlo.
6Nineve nyu raja gü le tsünyü kelo ka, a-rajakhün gen solo njüo a-mirün thola, ronphi benlo-o kenphü nyu yhon tinla. 7A-le jo nipe Nineve temi aphu tsüshü. “Hile rajagü lo a-hensin kedadan jo: Temi nme-e thame tyütsü loho, temi aphu, methu lo tanyü metse tyü nmvue tsünya lotse khi laso. 8Temi lo senru aphu ronphi benti. Temi aphu ketsin thyüo Sunggigü ka hilo a-serikemvu jvü khela lo a-tho gwakemvu dan khela mvulo shvu. 9Sunggigü le a-kerüchün kelu lae sha loho; a-le a-nyunkenta khela da sha loho, lo n gun le simvu loti!”
10Sunggigü le anyugun tho hyu; anyugun le serikemvu jvu khekela a-le hyu. Tsügenyu a-le a-kerüchün sünilao shaja pe anyugun tsü titse kebin khela.
Currently Selected:
JONAH 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
