JONAH 1
1
Jona Le Npugü Khwen Jo Zenmvula
1Khenyüme Npugü le Amittai nyugü Jona ka zo. 2A-le zo, “Nineve nyida gü ki jo zope tsü ntsun shülo; tsünyu temi le serimvu kebin ale shabin laso.” 3Jona le Npugü kebu titseo tson keba ki tinla. A-le Joppa ki güo tsüki zürun le Spain ki gü titse kebin hyulo. A-le a-kenjwen chün pe tsülao Npugü kebu sen-o Spain ki güla titse bin. 4Ai Npugü le tsangkenbu kekvu nipe Zida ki shü, tson-o tsangkenbu le gin ritsin-o zürun gü le jonrenla nrün hontse lola. 5Kenjwenyu aphu kershvulao a-npvü pvü a-terogü ka hisola. Tsüselo zürun khvu thyü nshenlo titseo anyugunle kanyü jün pe kewhen sola. Tsü ka Jona le zürun gü quen ki jüsa bin.
6Captain gü le a-hyulo-o a-ka, “Nle jüo nyu thyü bin nla? So-o nterogü ka hilo. A-le ngun genyu nyunkenjün thyüo kenishüe logwa le.”
7Kenjwenyu le khinyunyu ka, “Segü genyu ngun le kenshvu nyu binlayo whenshwi tile.” Anyugun tsü thyüo Jona zan le chwiryüla. 8Tsügenyu anyugun le a-ka, “Agun ka zoshülo! Hi genyu n-nmula kezü le bin ole? Nle hinyu nyu thyübin nla? Nle nyu kazü ki ryüla? N kazü zan le nyula?”
9Jonah le zonishü, “Ale Ibrinyu, ale Tsangge kebin Npugü Sunggigü, kazü lo Züda thyükeshü gü rüshvu hü nyo.” 10Jona le a-le Npugü mhundyü nyu tinjü letse anyugun ka zo.
Zürunkejenyu le kershvulao a-ka zo, “Tsüle thyü nshvu kethyü nme sele!” 11Tsangkenbu terhi gü le gwamvu ketsin sola, tsügenyu anyugun le a-ka, “Tsangkenbu terhi khinla nrün genyu agun no ngen nyu thyüla mon?”
12Jona le zonishü, “Apen pe zida nyu kewhen shüla lo, tson lo terhi le ndi lati. Akemu genyu hagun le terhi gwakemvu teno binla letse ale shabin.”
13Ai zürunkejenyu le jen sen-o züseki chwikethyü ndo-o anyugun kekvu thyü. Ai tsangkenbu terhi le kvuketsin-o thame thyülo mvula. 14Tsügenyu anyugun le kehithyü nra Npugü ko-o, “O Npugü, agun le nka hibin nle, temi higü pvükehü genyu kesi shaja thyüpe agun tsü nyalo! Npugü, hi aphu nkhvu le; hile ntho le.” 15Tsüsika anyugun le Jona penlo-o zida nyu kewhen shüla, lo terhi le ma tsela. 16Higü genyu kenjwenyu dan le Npugü nshvusalao anyugun le kerüshvu thyü pe a-tsü lo a-lothyü titse zoshwi.
17Npugü johokeshü genyu tsehü keda nmele Jona nyilo la, lo a-le tsehü ginda nyu tsangkeben lo tsangkezen kenshen bin.
Currently Selected:
JONAH 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
