OBADIAH 1
1
1Higü hile Obadiah sidyüjo: tsüle Aphuso kekvu Npugü le Edom senye genyu kezo.
Npugü Le Shaja Pe Edom Tsüti
Npugü le a-lilogü nipe senyedan ka shü,
lo ngun le a-jo nyü loso:
“Gwen ndalo! Ngun gü Edom zen-o teri thyüti!”
2Npugü le Edom ka zo,
“Ale nno kvumvu lati;
temi aphu nsümvu lati.
3N ketekho le nsa laso.
Nyida chwida le tsonye ketsü no hunpfü bin;
nka le kazüthun ketetso dan ki,
tsügen nle n npvü nka zo-o,
‘Segü le asüshelo gwa tila?’
4Nle nka lope ketetso ki logi seü hontse njü,
tson-o tsüno shyenyü dan nyu kebin hontse,
ai ale nsüshe lati.
5“Kheje ki kerühu nyu le ryülo,
anyugun le lonyü kebin gü nti khilohü.
Temidan le vainsha lülo kerho nti khelahü.
Ai nshwikerüchün nyu le n nke shü laso.
6Esau tsipwen dan, hagun kenya le mele khilo laso.
7Hagun pvünyu ju le hagun sa laso;
anyugun le hagun kazü nyu hagun hü laso.
Hagun zen-o gwatho kehüdan le hagun so kvulo laso.
Hagun zen-o tyütsü kehü hagun pvünyu
dan le hagun nsenbin;
anyugun le hagun ka zo, ‘A-le kelikelu
kehü tsü le dikipon la?’
8“Ale shaja pe Edom ketsü jon nyü,
ale anyugun dan nyu kelikelu kehü aphu nkela
lo anyugun kensü aphu khi lati.
9Teman nyu teri thyükehü nyu le kershvu lati,
lo Edom nyu shüpahü aphu boshvu lati.
Shaja Pe Edom Ketsü Kon
10“Nle nsikezen nyu Jakob tsipwen dan
hon rühu lo boshvu kethyü genyu,
n-nkelao kethonthen rühvumvu lati.
11Shwikerüchün nyu le anyugun khinrun
bola ketseka tsüjon nyü hagun le bin.
Hagun le gwamvu pe Jerusalem kenya
pvütin-o pe anyugun dan nyu kenjün lo
kela tesin tsüdan hontse le.
12Hagun le Juda kazü ki hagun tsasizen nyu
hengwa kemvu keteno tsü hagun kenyüo nrizü mvu.
Anyugun kenke jon nyü hagun kenyüla zümvu.
Anyugun le shekese keteno ka
a nyugun shwinyü zümvu.
13Hagun le atemi nyida nyu yüo anyugun
kenjünkethyü nripe hagun kenyü,
lo anyugun kenke jon nyü anyugun
hon khinti tse zümvu.
14Hagun le tsoncho ka bin-o
tinkejü ten zümvu.
Hagun le anyugun shekese jon nyü
anyugun lope shwikerüchün nyu
benyu shüla zü mvu le.
Sunggigü le Senyedan Jünkerati
15“Npugü ahigü le senye aphu jünkera
nrün jon le ryüjü.
Edom, nle thyükeladan tsüpe ngen thyü shüti.
Nle pe ketsü gü tsü hyuni loti.
16A temi dan le arincho kenshün gen
shaja honpen gü tsü nzeü laso.
Ai tsükehun senyedan aphu shaja honpen
tsü nyeki kekhü tsüti;
anyugun le tsülo-o ndi lati.
Israel Kvukelo
17“Ai Zion kazüthun gen peha le tin loti,
lo tsü le bin kenshün thyüti.
Jakob temidan le kenjü nyu
anyugun kazü thyülo kezü gütsü lolo ti.
18Jakob lo Josef temi le mah hontse ti;
mah le npenkon rola kehü hontse
anyugun le Esau temi nke lati.
Esau tsipwen nme-e rhün loho.
Npugü ahigü le zo laso.
19“Juda tesin kipon temi le
Edom nkhenlo lati;
nkhün kipon rinchopha ki kebin nyu
le Filistian lolo lati;
Israel nyu le Efraim lo Samaria lo lati;
Benjamin temi le Gilead khilo lati.
20Israel tesoki nyu rihü, me kazü ki tin
kela nyu le niryü lo Phoenicia kagü
Zarephathe tesozin keti kvulo lati.
Jerusalem temi Sardis nyu kebin nyu
le Juda tesinzin rünyi dan nkhenlo lati.
21Jerusalem nyu kvusa kethyü dan le
Edom when-o tsü so gonti.
Lo Npugü le Raja gü thyüti.”
Currently Selected:
OBADIAH 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
