JEREMIAH 51
51
Babilon gen kenjün kethyü kecha
1Npugü le zo, “Ale kenke kemhün tsangkenbu zen-o Babilon lo a-temi ntsun ryü jünyo. 2Ale sinrünyi nishüo tsangkenbu le npenwhünla kehü hontseo Babilon nke lati. Kenke jon tsü güle keryü nyü, anyugun le kazü tsügü lihizin hunlolao tsü no nrun lati. 3A-shüpahü no levü kvukelo nmvue terironye senkelo gwünkho pe tsünya. Selo dan nsen nya! Rihü apentha nke lalo. 4Anyugun le jün lao anyugun nyida tsonda dan ka silati. 5Israel lo Juda le mupe Israel kenshüngü ahigü ntsunla yatse-e Kekvutsin Npugü le anyugun khela mvu. 6Babilon nyu tinlalo! Hagun rhünlo nrün genyu tinlo! Babilon nyukemu genyu meno hagun dushvu la nya. A-le hyulo zü kethyü hontse ale ntsoka a khünlo lo shaja pe tsübin nyo. 7Babilon le aben nyu suna honpen hontseo kazü apentha no tsünyu tsü nzeü hü. Senyedan le a-zu tsü nzeülo-o anyugun nyun ntsen mvu la hü nyo. 8Babilon le whütse chelao nkelaso! A-chechülo! A-tejünshvu dan genyu dawa khilo, tsonlo gwalo-e shaloho. 9Sinrünyi tsünyu keyhun nyu le zoshü, ‘Agun le Babilon cheti tse ndo, ai ntsürila. Ngun a-khelao kaki ranila tile. Sunggigü le a-kekvu nyu shaja pe Babilon nyu tsüo nkebu laso.’ ”
10Npugü le zo, “Atemi le sen-o, ‘Ngun le njü letse Npugü le pe hishü laso. Ngun Jerusalem ki güo temi dan ka Npugü Ngun Sunggigü le thyükeshü pe zoshü tile.’ ”
11Npugü le Media raja dan nyun thukeyhun shü, a-le Babilon nkela nyü kebin genyu. Tsühontseo a-le a-Kershvuka kenke khün loti.
Teri sharhidan le zo, “Hagun tho tsidan ra sülo! Hagun gida ndolo! 12Babilon chwida when nrün zansü thyü shülo. Rikhun nyu thyü pechelo! Rikhun nyu no a-bin ka binlo! Temi dan no tson jwen binlo.”
Npugü le a-le Babilon temi dan gen thyüti tse zokenjü tsü thyü laso. 13Kazü tsügü züri kechon lo kenya le binsa, ai a-gwünkho le penla lo a-keyhunron düthü laso. 14Kekvutsin Npugü le a-npvü swe-o tsekhvu dan hontse temi kechon zen ryüo Babilon when lo anyugun le kvukelo khwen thyü titse laso.
Sunggigü keshwen lü
15Npugü le a-kekvu nyu kazü thyüshü;
a-thakesha nyu kazügü rhen
lo tsang sükhun shü.
16A-johokeshü nyu tsang ki zü le nho;
A-le kazü keniki nmha zenryü hü.
A-le tsangkechwü no tsangkenri nyu chwiryü
lo a-thakhin nyu tsangkenbu nishü hü.
17Tsü kehyu nyu temi le kepin nyu hontse
lo tharüchünlo shamvu lahü;
teromen kechanyu le kejola
anyugun le thyükelo tero dan tsüle
ketsinmvu lo kerhün ndi.
18Tsüdan le a-min ndi kethyü genyu
khela mvulo shvu;
Npugü le anyugun zen-o thathyü keryü
ka anyugun nke lati.
19Jakob Sunggigü we tsüdan hontse mvu;
a-le tha aphu rhen keshügü,
lo a-le Israel pe a-npvü a-temi thyü titse kejü lo.
Kekvutsin Npugü tsü le a-zan.
Npugü Kejonvü
20Npugü le zo,
“Babilon, nle akejongi, ateri ronye.
Ale nsen-o senye lo kedaphen dan boshwen,
21keru lo tsüdan gen kedun nyu vüren,
terigari lo tsüdan keranyu vüren,
22Peche lo tenunyu dushvu,
peshü lo nche duthü,
ponyu lo lünyu dushvu,
23Tanyü kekhwenyu lo anyugun tanyü duthü,
low ketsünyu lo jakethyü keru dan duthü,
lo kekvu kesen nyu lo kedanyu boshwen nrün genyu.”
Babilon Shaja
24Npugü le zo, “Babilon lo a-temi le Jerusalem gen gwa kemvu thyükeshü aphu genyu ale kethuni kebin hagun le hyu loti. 25Babilon, nle kazüthun nme hontseo kazü apentha nke hüle, ai Npugü ahigü le nrinyu le. Ale nsüshe pe kazünyu shüla,, lo kemphü nyu nkhelati. 26N-nke kethyü bin nyu tso nme-e pe ka kethyü nyu sen niloho so. Nle kethonthen kazü kesi hontse lati. Ale Npugü, tsü zo laso.
27“When nrün genyu zansü khishü! Senye dan no nyülo nrün genyu shu gü khun shülo! Senyedan ndo pe Babilon zen teri thyü lo! Ararat, Minni, lo Ashkenaz rajaphen dan ka zo-o no when lo! Kedanyu nme kejü pe when kebin gü sharhi thyülo. Tsekhvu dan hontse keru zen chwiryülo. 28Senye dan ndo pe Babilon whenlo. Media nyu rajadan, anyugun sharhidan, lo kedanyu dan, lo anyugun le ketsenkehü kazü nyu rihüdan koshülo. 29Kazü le ndün lo nnu kechamvule Npugü le a-le rhikelo sen-o Babilon thyü pe tehen kazü kesi bin thyüo temi nme-e no yhun mvula. 30Babilon nyu shüpahü dan le teri thyü mvulao anyugun chwida ki suntin laso. Anyugun kepeche ndi lao tenunyu hontse laso. Nyida Khinrun dan le nrenla, lo mah le ka dan robin laso. 31Jolonyu le tin sen-o Babilon rajagü ka a-nyida le bin aphu ka nren binla sele tsezo nini lola. 32Kenrhinyu le züri pvükethü tson khinlo-o mah pe chwida roshüla. Babilon shüpahü le nshvu sala. 33Thonmvutse shwikerhüchün nyu le anyugun dushvu lo kedü pe shye kenyu bin ki hontse shüti. Kekvutsin Npugü, Israel Sunggigü ahigü le tsü zo laso.”
34Babilon rajagü le Jerusalem dushvulao tsü tyüla.
A-le nyida gü nke pe lagi kenrun hontsela;
züringü hontse a-le tsü nyila.
A-le lokenyü dan khilo-o kecha dan pe shwenla.
35Zion temi dan no zolo,
“Babilon nyu no anyugun le gwakemvu
thyükeshü khvu gü pvülo!”
Jerusalem temi no zolo, “Babilon no ngun le
kenjün thyü kela khvu pvülo!”
Npugü le Israel cheti
36Tsügenyu Npugü le Jerusalem temi ka zoshü, “Ale hagun nopen-o jokera lo tson-o hagun kenrhinyu no hagun gen thyü keshü pu thoti. Ale Babilon nyu zü kepen bin lo züri dan-e no sin lati. 37Kazü tsügü no nkelao nyukhu keyhun bin thyüti. Tsü le shwikenshvu thyülao temi nme-e tsü nyu yhun mvula, lo tsü kehyu nyu aphu kerüshvuti. 38Babilon nyu aphu shünyho hontse nho lo a-nyu hontse khunti. 39Anyugun le tsenshvu le? Ale anyugun genyu keho nme ndo shüo anyugun no nzeü lo anyugun kenyüti. Anyugun le jütsü-o soryü mvu lati. 40Ale anyugun zen gü tanyü nyu, tenyü lo tenyü tse hontse dushvu lati. Npugü ahigü le zo laso.”
Babilon rüla
41Npugü le Babilon rüla zo, “Kazü apentha a-shwen kehü gü tsüle mele lo laso! Babilon le senye dan mhundyü dihontse shwikenrin thyü layo! 42Zida le Babilon so tsüryü a-kentyü khwen le tsü süla. 43Rünyidan le shwikenshvu thyü lo zükendi bin kazükesi temi nme-e yhunmvu lo njwen-e hü kemvu hontse lati. 44Ale shaja pe Bel, Babilon terogü tsü, lo a-no a-le rühu kelo hoshüla; lo senyedan le a-rüshvu sin mvu lati.
“Babilon chwida le che laso.
45Israel temi dan, tsünyu tin lalo! Rhünlo nrün genyu tin-o anyunkenthün nrhilo. 46Hagun nyun shenla nya, nmvue hagun le jobon nyükelo dan genyu nshvunya. Chenkechwi jobon nyülo hü-- tsüle kazü gü nyu gwakemvu lo raja nme le kecha gü zen kega kethyü jo. 47Gwenkho nmele ryüti, tsünyü ale shaja pe Babilon nyu teromen dan gen shüti. Kazü apentha no kejo pvü, lo a-temi aphu dushvu la ti. 48Babilon le tesozin a-nke titse keryü nyu ben nyu yükela ka tsangge lo kazü nyu tha aphu shekerhün genyu sen ti. 49Babilon genyu kazü aphu nyu temi no si, lo ntsoka we Babilon le cheti, kechamvule a-le Israel nyu kechon no sila. Npugü, ahigü le zo laso.”
Npugü le Israel nyu Babilon nyu kebin genyu kezo
50Npugü le Babilon ki a-temi dan ka zo, “Hagun le kesi nrhi laso! Ntsoka gunlo gwen! Sun nya! Hagun le ka zen-o nithen ki hü yatse-e hagun Npugü, arüchün lo Jerusalem rüchün shülo. 51Hagun le zo, ‘Hagun le kemeni lo kejo pvü laso, agun le keche ndishü kela hontse laso, kechamvule sinrünyi kecha le Kershvuka gü nyu kenshün bingü lolola.’ 52Tsügenyu ale zobin nyo, gwünkho nme ryüjü tsünyü ale shaja pe Babilon tero dan gen shüti, lo jünkelo nyu le kazü tsü gü aphu nyu nho chüti. 53Babilon le tsangneki küo tsünyu chwida kenko thyüloe, ale temi nishüo tsü nke lati. Npugü ahigü le zo laso.”
Babilon nke sin nrün
54Npugü le zo,
“Babilon nyu kechü khwen nyülo,
kazü tsügü nyu kenke chechü kebin.
55Ale Babilon nkela
lo tsü no matse lati.
Rihüdan le zü kentyü khwen hontse tin
lo anyugun khwen ginsa tse when bin nyo.
56Anyugun le Babilon nke titse ryü,
a-shüpahüdan tenlo,
lo anyugun tholevü dan bose laso.
Ale shaja pe gwakemvu nyu tsükehü Sunggigü,
lo Babilon le pvükezü hontse a-gen thyü shüti.
57Ale a-kekvu kesen dan no nzeü lati--
tsüle thakeshanyu, sharhinyu, lo shüpahü dan.
Anyugun le jütsüo somvu lati.
Raja, ahigü le zo laso.
Ale Kekvutsin Npugü.
58Babilon chwida kenko le kazü nyu chela,
lo a-Khinrun ketetsodan roshye lati.
Senyedan tho le lihi kemvu laso;
anyugun yhenkethyü tho le ro laso.
Kekvutsin Npugü, ahigü le zo laso.”
Jeremiah jolo nipe Babilon nyu ki nishü
59Raja Zedekiah lokethyügü le Neriah nyugü Seraiah, a-bon le Mahseiah. Zedekiah le Juda raja thyükelo chenzi gü ka, Seraiah le a-zen-o Babilon ki gü jü, lo ale tsonketsin jo peha pe a-tsü. 60Ale kenke le Babilon gen ryü nrün lo Babilon rüla kecha dan-e aphu pe lesü nme nyu thulo. 61Ale Seraiah ka zo, “Nle Babilon tilo yatselo, hinyu thukenjü jo aphu swü tetso pe temi dan zenshü tsentsülo. 62Tson-o hihontse hilo, ‘Npugü, nle bin higü nkelao thame tsünyu yhun mvulati, temi lo nyukhue bin mvu lati, tson-o tsü no kethonthen kazü kesi hontse lati.’ 63Seraiah, nle lesü higü swüpen pe temi dan zen kelo siki tsüpe tso nme gen phinlo-o shwen pe Eufrates züri ki shüla, 64tson-o hihontse zolo, ‘Babilon gen thyü n nrün le hi-- tsüle yülao niso mvu lati, kechamvule kenke gü tsüle Npugü le zenryüo a-gen shü titse kebin genyu.’ ”
Jeremiah jodan le hinyu pen la.
Currently Selected:
JEREMIAH 51: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
