JEREMIAH 46
46
Karkhemish ka Ijipt so kvulokela
1Npugü le senye dan rüla pe aka zo, 2Ijipt ka binzenlo. Higü hile a-le Ijipt raja Neko rihü rüla pe aka kezo, tsügü le Babilon raja gü Nebuchadnezzar le Jehoiakim le Juda raja thyükelo chenzi gü ka Eufrates züri khoka Karkhemish ka a-so kvu lola:
3“Ijipt kedanyu dan sen lo,
‘Hagun gida ndalo
lo tsonchü teri nyu gülo!
4Hagun kerudan ketsenlo-o a-gen külo!
Kethenlo-o hagun perün pvülo!
Hagun mih yi thyülo!
Hagun teri ronye pvülo!’
5Npugü le ketso, ‘Ai ale nyu hyula?’
“Anyugun le nshvuo rani bin laso.
Anyugun shüpahü dan vü laso;
anyugun le nshvuri lao, yhenthyüo
tin bin
lo ranio siki nri mvu.
6N mhesa kehünyue tinlo kemvui;
shüpahü nyu le nrhilo kemvui.
Teso kipon Eufrates ka,
anyugun pha nsüo che lati.
7Nile hontse soryü,
zürizhe ki-e da tsü kebin tsüle segü la?
8Tsüle Ijipt, Nile hontse soryü,
züri a-zhe ki-e da tsü bin.
Ijipt le zo, ‘Ale so-o kazü kesü thyü shüti;
Ale nyida dan lo tsünyu yhun kebin dan-e nke lati.
9Kerudan no gülo
lo terigari dan no hülo!
Shüpahü dan nishwi shü:
Sudan lo Libia kipon gida kepvünyu
lo Ludia ki tholevü pen keshanyu.’ ”
10Hile Kekvutsin Npugü jon:
a-le nthu a-khün loti;
nthu a-le shaja pe a-kenrhinyu tsüti.
A-zhethon güle a-gin nyülo kemvuthen anyugun tyü,
lo anyugun zi tsüo ryünyun lo kemvuthen tsüti.
Nthu Kekvutsingü le a-jon penlo mvu
kelanyu pe kershvu thyü bin;
tesoki Eufrates züri ka.
11Ijipt temi dan, Gilead ki gülo
tson-o dawa fülo!
Hagun dawa aphu senmvue kegwai thyü laso;
thame pe nthyü ngwa lohoso.
12Senyedan le nkejokepvü nyülo;
temi aphu nkechü khwen nyü laso.
Shüpahü nmele kechanyu nrhülo
tson-o mihvu nren kazü nyu che.
Nebuchadnezzar le keryü
13Babilon raja Nebuchadnezzar le Ijipt when ryü kethyü ka Npugü le aka zo. A-le zo,
14“Ijipt rünyi, Migdol, Memfis lo Tahpanhes
dan ka hilo pe tephu shülo:
‘Hagun npvü hagun ketsenlo nrün ndalo;
hagun hon aphu teri nyu nke lati!
15Nyuthyüo hagun tero kekvugü Apis le chela la?
Npugü le a-vüshe laso!’
16Hagun shüpahü le pha nsüo nto laso;
nme le nme ka zo-o,
‘Nmhenlo! Kaki ngun temi ki gun lao
kenrhinyu zhethon nrhila tile!’
17“Zen keshün nme pe Ijipt rajagü tsülo--
‘Nra nrio gwünkho gwenzüla kehügü.’
18Kekvutsin Npugü, ahigü le raja.
Ale rhünkehü Sunggigü.
Tabor thun le kazüthun dan nye tetso
lo Karmel kazüthun le zida nyeki tetse
kvu kethyü hontse,
hagun whenkehü kekvu le tsonti.
19Meno hagun tenzen-o dothyü tinla nrün ndolo,
Ijipt temi dan!
Memfis lope yhunkemvu bin,
nkelao mele hükemvu bin thyü lati.
20Ijipt le methulü kezegwa hontse,
ai tesozin khu le when tsüryü jünyo.
21A-le jonshye zenkehü shüpahü dan-e
kekvu ndi pe methu nyu hontse laso.
Anyugun le so-o nren mvula;
aphu ranio tinlaso.
Anyugun dyükezün jon,
lo anyugun kenke gwünkho le ryü laso.
22Kenrhinyu rihü le kho nni keryü ka,
Ijipt nyu ketin khwen le peri khwen hontse.
Anyugun le nri lope a-when,
temi le senbin phen kebin hontse
23lo chün kentsun nke kethyü hontse.
Anyugun temi le chonrio swülo mvu;
anyugun shüpahü le tsekhvu nye chon.
24Ijipt temi dan le kejo pvüla;
teso kipon temi no anyugun so kvula.
Ale Npugü, tsü zo laso.”
25Kekvutsin Npugü, Israel Sunggigü le zo, “Ale Amon, Thebes terogü lope Ijipt lo a-tero lo raja dan gen shaja pe tsüti. Ale Ijipt raja lo a-tenyen kehü nyu aphu tenlo, 26tson-o tsüdan lope anyugun boshvula nyü kebin nyu Babilon raja Nebuchadnezzar lo a-rihüdan tsü lati. Ai kenkhin ki himhundyü hontseo temi le Ijipt nyu yhun niti. Ale Npugü, tsü zo laso.”
Npugü le a-temi Keniloti
27“Atemi dan, nshvunya,
Israel temi, hagun kerü la nyalo.
Ale kazü nithen ki tsü hagun keni shwi shüti,
hagun le je tse bin-o nme-e hagun thyü nshvu loho.
28Ale hagun ki ryüo hagun keni shüti.
Ale hagun hüpe keshübin senyedan aphu nke lati,
ai hagun we nrho shüti.
Ale hagun no shaja thyü mvutse tin loho;
ai ale shaja pe hagun ketsü ka, joketsin nyu thyüti.
Ale Npugü, tsü zo laso.”
Currently Selected:
JEREMIAH 46: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
