JEREMIAH 44
44
Npugü le jolo khipe Ijipt nyu kebin dan Israel nyu tsü
1Npugü le Israel temi Ijipt nyu kebin aphu genyu aka zo, tsüdan le Migdol, Tahpanhes, Memfis nyida dan ki bin, lo kazü tsügü tesinzin kipon bin. 2kekvutsin Npugü, Israel Sunggigü le zo, “N-npvü ale kenke zenryüo Jerusalem lo Juda nyida kechadan gen keshü hyu laso. Ntsokae tsüle nke binzun, lo nme-e tsüdan ka yhun hümvu 3kechamvule anyugun temi le gwa kemvutho thyüo ano anyuntala. Anyugun le kershvu tho thyü pe anyugun, nmvue hagun lo hagun pvübon nyue rüshvu hükemvu tero tsüo tsüdan lothyü. 4Ale agonyu sidyükeshanyu nipe hagun ki shüzin, lo tsüdan le hagun no tha ketetsin ale ntsü kehü dan thyü nya lotse zo, 5Ai hagun le nyümvu, nmvue rüchün shümvu. Hagun le tha khipe tero kecha kershvu tho gwakemvu dan ketsü khela nyümvu. 6Tsügenyu ale a nyunkekhü kenthün jape Juda rünyi dan lo Jerusalem tsonda dan gen shüo mah pe rola. Tsü dan le kecha pe binla lo nthu keti-e shwi kenshvu thyübin.
7“Tsügenyu Kekvutsin Npugü, Israel Sunggigü ale hagun le nyuthyüo tha gwakemvu tsü hontse kethyü thyüpe hagun gen shü hüyo tse ketso bin nyo. Hagun le kenke zenryüo peche, tenu, ntsenyu lo nyuhonyu dan gen shüo hagun nme-e bin mvula nyü bin ole? 8Nyuthyüo hagun le ryüo yhunkebin Ijipt nyu hi tha pe tero kecha rüshvu lo teromen kezü rüshvuo ano anyunta hü nla? Hagun le hihontseo hagun npvü hagun nkela, tson-o kazü nyu senye aphu no hagun shwinyü lo hagun zen zope shochün hontse nyü bin le? 9Hagun le Juda rünyi dan ka lo Jerusalem tsonda dan ki hagun bonnyu, Juda raja dan lo tsüdan nunyu, hagun lo hagun nunyu dan le gwakemvu thyükela tsü aphu nmhinla sele? 10Ai nthu keti hagun thyüketsenyo mvuzun. Hagun le ale tejvü khipe hagun lo hagun bon nyu ketsü hontse arühvu, nmvue yhunlo mvuzun.
11“Tsügenyu Kekvutsin Npugü, Israel Sunggigü ale, hagun ntsun-o Juda aphu nke lati. 12Juda temi hinyu kebin Ijipt nyu gü yhuntinla titse kebin nyu ko, ale anyugun aphu no nkela nrün thyü shüti. Anyugun keda-keshen aphu Ijipt nyu tsü teri nmvue kekhün genyu si lati. Anyugun le nri kenshvu nme thyülao; temi no anyugun shwinyü lo anyugun zan lope shochün hontseo zoti. 13Ale teri, kekhün lo kethyükenyü shaja pe Jerusalem ketsü hontse, Ijipt nyu yhun kebin nyu ko tsüti. 14Juda temi nsenkelo Ijipt nyu ryüo yhun titse kebin nme-e tinlo nmvue rhün loho. Anyugun nme-e anyugun le gwengwa niryüo yhun nyü kebin Juda ki ryülo kemvui so. Khinthü kelo temi dan kerho nyeki kecha le niryü loho.”
15Tsüselo, pelünyu anyugun nunyu le kershvu thyü pe tero kecha tsüla sele tse shakebin nyu aphu, lo tenunyu tsüki so kebin nyu aphu lope Ijipt tesinzin yhun kehü nyu aphu kesin-o temi danda le aka zo, 16“Agun le nle Npugü zen nyu agun ka zokeshü jo nyü loho. 17Agun le nyu thyü titse hüyo tsü thyü ti. Agun le kershvu thyüpe agun terogi, tsang kedagi tsüti, lo agun lo agun bonnyu, agun raja lo agun sharhidan le Juda rünyidan lo Jerusalem tsonda dan ka thyü gun keryü hontse agun le zu kershvu thyüpe a-tsüti. Tsü kae agun chvu kechon le bin, agun le gwakenyesa, lo thame kenjünkethyü ndi. 18Ai agun le kershvu thyüpe Tsang rajagi tsü mvula lo zu pe a-kershvu tho thyü mvu kela genrho thame ndila, lo agun temi dan le teri lo kekhün genyu sila.”
19Lo tenu nyudan le zoni, “Agun le tensü thyü pe Tsang rajagi joja hontseo pe a-rüshvu lo zu jape a-rüshvu tse kethyü ka agun nyepvünyu le anyugun kenyü hü.”
20Tsüselo ale pelünyu lo nyeginyu tsü hontseo aka kezonyu aphu ka zo, 21“Hagun lo hagun bon nyu, rajanyu lo sharhinyu, lo temidan le Juda rünyi lo Jerusalem tsonda dan ki kershvu tho kethyü dan tsü hagun kerüchün we Npugü le tsü sha mvula nmvue nmhinla letse hü ole? 22Nthu hi hagun kazü le nke lao nme-e tsünyu yhun mvuso. Tsüle shwikenshvu thyüla lo temi dan le a-zan lope shochün hontse zobin, Npugü le hagun serikemvu lo gwakemvu thodan nyhen nilo hoso. 23Hi jonka kenke higü hile hagun le Npugü johokeshü dan aphu zenmvuo kershvu thyü pe tero kecha tsü lo mupe a-ntsun kethyü genyu.”
24-25Ale temi aphu ka zo, Nyeginyu genyu nchon-o Kekvutsin Npugü, Israel Sunggigü le Juda temi, Ijipt nyu yhunkebin nyu ka kezo jo pe zo: “Hagun lo hagun nunyu le keswe keda thyüpe Tsang Rajagi tsü laso. Hagun le kershvutho thyü pe tsügi tsü, lo zu jape a-rüshvu titse keswe thyüo hagun jo then hü laso, gwasa! Hagun le zoshwikeshü dan zenlo! Hagun le swe kenjü thodan thyülo! 26Ai ale Npugü, azan kekvu nyu Ijipt nyu kebin Israel nyu aphu genyu sweh kebin gü hi nyülo: Hagun nme-e no azan nyu hihontse swe loho, ‘Ale Rhünkehü Aphu so kekvu Npugü, zan nyu swe bin!’ 27Hagun no gwakenye mvuo nkela nrün genyu nriti. Hagun aphu teri nyu nmvue kethyükenyü pvüo sibula kemvuthen siti. 28Ai hagun kerho nti no simvulo-o Ijipt nyu rani Juda ki ryü loti. Tsüselo rhünkelo nyu le ajo le, anyugun jole ketsin thyüla yo sha loti. 29Ale Npugü, ale shaja pe bin hinyu hagun gen shü nrün lo kenke zenryüo hagun tsü titse kethyü tsüle ryü ketsin thyü nrün hagun no sha tsentsü loti. 30Ale Juda rajagü Zedekia lope a-nrhi lo a-boshvula nyü kehü gü Babilon raja Nebuchadnezzar ben nyu shükela hontse Ijipt rajagü Hophra lope a-kenrhinyu lo a-boshvula nyü kebin nyu ben nyu shü lati.”
Currently Selected:
JEREMIAH 44: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
