IBRINYU 7
7
Melkizedek Peshükeda Jvü
1Lo Melkizedek hile Salem nyu Raja thyü, lo ketetso tsin gü Sunggigü peshükeda-e thyü; Abraham le raja nyu dan me gala-o gunryü kezhü ka Melkizedek le a-zen keteno-o jochü pe a-tsü. 2Lo Abraham le teri nyu tha hyu kelo tha lihie jün tseryü thyüo jünme pe Melkizedek tsü. Temi tsügü zan a-kon keri güle, “Kentsen Raja.” lo a-le Salem nyu raja ko thyü sin, a-kon le, “Gwaketho Raja.” 3A-le a-pvü ndi, a-jvü-e ndi, lo a-bon nyu-e ndi, a-le yhunso keryüe lo a-keyhun keni-e ndi, ai Sunggigü nyugü hontse a-le peshükeda thyü zin hü.
4Lo nbon Abraham le teri nyu hyukelo aphu jün tseryü thyüo jünme pe a-ketsü temi tsügü tsü le ditsü laki thyü gon yo rüchün shwi ta. 5Lo tejvü gü nyu johokeshü le peshükeda tho hyukelo Levi tsipwen dan no temi ju ka, tsüle anyugun tsagü sikezen ju Abraham tsipwen da ka jün tseryü jünme khilo lotse shü. 6ai anyugun tsipwen nyu yhun kemvu temi higü le jün tseryü jünme Abraham ka khilo-o jochü pe a-tsü kenjü dan hyu kelo gü tsü. 7Lo keshen gü le a-nye kegon gü ka jochü hyulo hü tsekethyü temi nme-e tsüle a-kemvu letse loho. 8Hika we sila nrün nyu no jün tseryü jünme khilo, ai ligü nyu we rhün hü n letse a-rüla zo kehü gü no lo. 9Lo jüntseryü jünme hyulo kehü gü Levi le kon me ka a-le Abraham ge bin-o jüntseryü jünme pe tsüla. 10Kechamvule Melkizedek le a-bon zen keteno kethyü tsüle a-le a-bon ge bin zun kethyü genyu.
11Lo Levi peshükeda jvü nyu gwapen kelo thyülo gwala yatselo (kechamvule tsü hensin temi le tejvü gü hyukelo genyu) nyu thyüo Aaron le kethyü hontse mvule Melkizedek le kethyü hontse peshükeda kecha nme no soryü mvulo shvu ti la? 12Lo peshükeda kethyüe kelula yatselo tejvü güe kelu mvulo shvu laso. 13Kechamvule a-rüla jo hidan zope bin kenjü gü le tsipwen kecha nduka temi nme-e kershvubin nyu lotho thyü shwi hü kemvu nyu kelasi genyu.
Melkizedek Hontse Kethyü Peshükeda Kecha Nme
14N Npugü le Juda tsipwen ge yhun gunryü tsekethyü sha tsentsü bin nyo; lo Mosa le tsipwen tsügü no peshükeda kethyü rüla thame zomvu.
15Lo Melkizedek hontse kethyü peshükeda kecha nme le soryü kethyü le tsü kon gü le ntsen kvu laso. 16A-le thyü min nyu yhun sokeryü tson kipon thyüzü kethyü kon genyu mvu, ai keni thyüla lo keho keyhun kekvu kipon peshükeda thyülo. 17Lo tsü rüla hihontse zo njü, “Nle Melkizedek le kethyü hontse kethonthen peshükeda thyü laso.” 18Johokeshü kerigü le kvumvu lo a-kechwi kendi genyu khe laso. 19Kechamvule tejvü gü pe thame thyü pe no gwapenlo kemvu genyu; lo kechagü nyu nsidyü gwakvu kethyü gütsü sen nyü laso, lo tsügü nyu nle Sunggigü kho nni gunlo hünyo.
20Lo tsüle keswe nme-e sen mvuo thyü mvu. Himhundyü ki kethyü dan we keswe sen mvu tse peshükeda thyü gunryü; 21ai higü we a-rüla zokeshü gü le swe-o peshükeda thyülo,
“Npugü le swela,
lo a-le anyun kelu loho: ‘Nle kethonthen peshükeda thyü laso.’ ” 22Higü hile Jisu thyü pe jopen jozen kelo gwakvu kethyü khi keshü gü thyü shü.
23Lo a-kon kecha nme le: peshükeda kecha tsüdan we kechon, kechamvule anyugun le sila-o peshükeda tho gü thyü gunlo mvula kehü genyu. 24Ai tsügü we kethonthen rhün bin kela genyu a-peshükeda tho tsü kelu loho so. 25Tsügenyu a-zan sen-o Sunggigü kho nni gunkeryü nyu kenilo lo tse zin binlo gwa so; a-le rhün zin bin-o tsüdan genyu hi zin bin hü kela genyu.
26Kechamvule n gun le peshükeda tsühontse, nshün, kemu ndi, rhula mvu, kemunyu zen kekho, tsanggenyu nyeki-e gonkvu kethyü sen mvulo keshvu genyu. 27Lo a-we peshükeda kechanyu dan hontseo a-npvü a-kemu genyu ri lo tsüsika a-temi kemu genyue tse khenyütsen rotho thyümvue gwa so; kechamvule a-le a-phou pe me rothyü kela ka gwüngwa thyüo tsü aphu thyü pen kü kelasi genyu. 28Lo tejvü gü we gwapen kemvu temi kejü pe peshükeda thyü hü; ai tejvü gü siki keswe jo gü we kethonthen gwapen kela nyu gü kejülo laso.
Currently Selected:
IBRINYU 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
