IBRINYU 8
8
Jisu Le N Peshükedagü
1Lo ale zokebin kongü le higü hile nle tsangge keda tsingü keda bingü nzhüzin binkela tsühontse kethyü nme pe n peshükeda thyü bin laso. 2Lo tsüle temi no mvule Npugü le a-npvü thyü keshü kershvu phika ketsin gü nyu lo kenshün bin gü nyu lotho thyü bin laso.
3Kechamvule peshükeda lihigüe no tha hoshü lo rotho thyüshü nrün genyu kejü shü hünyo; tsügenyu peshükeda higü hi ko tha peha sen gunryüo rüshvu mvulo shvula. 4Lo a-le kazü nyu bin yatse kethyü we, a-le peshükeda thyülo nrün ndi lati, kechamvule tejvü gü hontse tha khisen ryü rüshvu kehü peshükeda ju le kebin genyu. 5Tsüdan tsü le tsangge kebin dan rokethyü nme lo a-shye hontse thyü kebin gwünzin. Tsühontse Mosa-e kershvu phika gü penso shü titse keso ka Sunggigü le a-ka, “Kazüthun ge tsin pe a-hi keshü tsü joja gü gwünzin tse tha lihi-e thyülo nye,” tsonshü. 6Ai tsühontse Jisu we a-le a-ja nyu kebin gü thyüo kejopen kejozen kelo gü le gwakvu kethyü hyulo laso, kechamvule tsüle tha zope ntsü kenjü gü nyeki gwakvu kethyü gü ge chwikeryü genyu.
7Kechamvule kejopen kejozen kelo kerigü le thyü kezü ndi yatse kethyü we, kenyhun gü no bin nrün-i ndi. 8Ai a-le anyugun nmu-o:
“Npugü le zohü nyo, jon dan le ryüjü nyo,
ale Israel nyu kami dan zen-o,
lo Juda kami zen-o kejopen kejozen kelo
keshün nme thyü shüti.
9Tsügü we ale Ijipt kazü nyu
anyugun bon nyu dan ben sülo-o
anyugun tsonri chwiryü kelo jon nyü
anyugun zen-o kejopen kejozen kelogü
hontse mvu.
Anyugun le tsüka azen-o kejopen kejozen
kelogü nyu bin mvula,
tsügenyu ako anyugun shwishü mvula le.
10Tson-o Npugü le zo, tsangkeben jon tsüdan
siki ale Israel tsipwen dan zen kejopen
kejozen nrün gü le higü tile:
Ale ajvü dan khipe anyugun nyun nyu shü shü ti,
Lo tsüdan thu pe anyugun nyu ge shü shü ti.
Lo ale anyugun Sunggigü thyü ti,
lo tson-o anyugun le atemi dan thyüti.
11Lo anyugun lihigüe a-temi ka
nmvue a-sikezen gü ka
‘Npugü shalo lo,’ tsekethyü zope
kesenthyü mvula ti.
Kechamvule tsüdan aphu keshen tsin
ka gungü keda tsin keti asha küla nrün genyu.
12Kechamvule ale anyugun gwakemvu
kethyü tsü shwinjün lati lo ale anyugun
kemu dan rüchün sin mvu lati.”
13A-le kejopen kejozen kelo keshün nme tson kethyü tsüle a-le kerigü lope a-whegü thyü laso. Ai a-whe thyüla lo a-ren thyü kelagü tsüle ndi güzhü laso.
Currently Selected:
IBRINYU 8: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
