IBRINYU 6
6
1Tsügenyu Khrista rüla senkethyü jo keri dan nken sen-o gü gwati penlo tinu.Tson-o kesi tho nyu nyunkelulo lotse, lo Sunggigü ketenyen, 2Baptism lo nben shwe pe me ge keshü, lo kesinyu le rhünni so nrün lo kethonthen genyu ketso nrün rüla senkethyü jo dan binzen si mvulo nu.
3Lo Sunggigü le nno hi thyülo tselo thyü ti. 4Kechamvule peha le himhundyü ki Sunggigü keben hyulo, lo tsangge jochü-e ntsin shwi, lo me zen-o Kenshün Kapu-e kerhün hon thyü. 5Tson-o Sunggigü jo kegwa gü-e lo siki keyhun nyu kekvu gü-e ntsin shwi, 6tson-o ranila yatselo temi tson kethyü nyu no nyun kelunilo nrün genyu anyugun thyü kenshün nilo nrün ndi. Kechamvule anyugun le Sunggigü nyugü pe krus ge hüni lo me mhundyü nyu a-lope kejokepvü thyüni kethyü genyu.
7Lo kazü le tsangri pe gwünshü zin bin kehü kazü le zütsülo-o sen mvulo keshvu dan nyhun pe low tsü kebin nyu tsüshü lo Sunggigü kanyu jochü hyulo hünyo. 8Ai kazü tsügü le tsehü lo nyhe nyhun shüla yatselo, tsüle thaja thyü laso, lo meno swe tsü gü zhü laso; lo siki a-rola nrün gwünzin lati.
9Lo akesonyu ju, ale hihontse zoshüe ale hagun rüla tha tsünyeki kegwa dan me sha tsentsü bin nyo, lo tsüle hagun kenilo nrün rüla le. 10Kechamvule hagun le Sunggigü zan nyu Kenshün nyu Lotho thyü lo so keryü lo ntsokae thyü kehü Sunggigü le njü mvu sabin kemvu genyu tsü nmhinla loho. 11Tson-o akenrin gü tsüle hagun lihigüe no hagun yhen kethyü tsüno a-gwünzin gungü hagun sidyü bin tsentsü kethyü fü zin gungü a-keni tilo nyü bin nyo. 12Tsügenyu ale hagun no hagun shesela nyü mvu ai tenyen hü lo nyhenhi hüo Sunggigü le zope bin kenjün gü hyulo kela dan hontse lonyü.
Sunggigü Le khishü Titse Zo Tsentsü Kenjü
13Lo Sunggigü le tha zope Abraham ketsü ka, a-le zo-o swelo kegwa a-nyeki gonkvu kethyü ndi kela genyu a-npvü a-zan nyu swe-o zo, 14“Ale jochü pe ntsü ti lo nthyü pe chvükenye shü tsentsü ti.” 15Lo Abraham le nyhenhi gungü zope a-tsü kenjü gü tsü hyulo la. 16Ketsin, temi-e a-nyeki kedagü zan sen-o keswe thyü hünyo, tson-o keswe gü lope jo kekera lihie kera penla hünyo. 17Tsühontse Sunggigü ko tha zope tsü titse zo kenjü gü hyulo nrün nyu dan ka a-jo kelula lo keho anyugun no sha ntsenlo nyü kethyü genyu keswe no anyugun jaka shü pe binla. 18Tsügenyu a-jo kelula loho tsekethyü jo tsühvu ge Sunggigü le thame kae nku lalo nrün ndi. Tsügenyu ngun tin sen-o a-hensin nyu kegun dan no a-mhundyü zin kebin sidyü gü tezen tsekho sen-o n kepeche no binlo nrün genyu le. 19Nle n sidyü higü hile n keyhun no kelu kenyonla mvu nrün genyu dyütun hontse kethyü, lo tsüle kenshün bin nyu phi lope khin kenjü nyu zin yü kela hontse kethyü n sidyü nme. 20Jisu le Melkizedek hontse kethonthen peshükeda thyülo-o ngun sunka nmhundyü rio tsünyu yü laso.
Currently Selected:
IBRINYU 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
