IBRINYU 3
3
Jisu Le Mosa Nye Gonkvu
1Tsügenyu apvünyu kenshün nyu dan, tsangge ko kebin nyu kerhün kebin dan, ngun le zoshwi kehü gü apostel gü lo npeshü kedagü Jisu rüla rüchün shülo. 2Mosa le Sunggigü kami aphu dan nyu joketsin zo kethyü hontse Jisu ko a-kejü kelogü mhundyü nyu joketsin zoshü. 3Ai ka thyü keshü gü le kagü nyeki teshwen le bin kvu kethyü hontse Jisu ko Mosa nyeki a-zan chwi kenye kvulo laso. 4Lo ka lihi-e a-thyü keshü nyu le bin hü, ai tha aphu thyü keshü gü le Sunggigü. 5Lo Mosa we Sunggigü kaminyu joketsin kezo gonyu nme thyüo siki zoshü nrün jo pe zoshü. 6Ai Khrista we nyutsin nyu thyüo Sunggigü kaminyu dan nyu joketsin zoshü. Lo nle nsidyü nyu n kepeche lo nkenjü gü tezen tsekho bin yatselo ngun hile A-ka.
Sunggigü Temi dan Genyu Kerüyü
7Tsügenyu Kenshün Kapugü le kezo hontse,
“Hagun nthu akhwen nyülo yatselo,
8nduka Sunggigü ntsun kethyü hontse
nmvue tehenyu a-semen shwi kethyü nyü
hontse hagun nyun rüla nya.
9Hagun bon nyu le tehen tsünyu asemen
lo tson-o chen henzi atho dan hyu laso.
10Tsügenyu ale temi tsüdan ge akenyü
mvula,
tson-o anyugun le kethonthen rüchün
kezü nyu bin hü, anyugun le thame ka-e
anyugun tson shalo mvula so.
11Tsügenyu ale anyun ntao swe-o,
‘Anyugun no akerüyü nyu yüryü loho!’ ”
12Apvünyu ju, hagun dan nyu peha le serikemvu lo tenyen kemvu nyun pvüo rhün kehü Sunggigü ben nyu chela nrün kenshvu genyu petsülo nye. 13Ai kemu mesa kehügü no hagun peha nyun thyü pe rü kela kenshvu genyu “Nthu” tse kebin then khenyütsen hagun khinyunyu thu keyhun binlo. 14Kechamvule nle binzen ka tenyen tsentsü kelogü tezen nko sen bin-o kekhin gü tilo yatselo nle Khrista zen-o kerhün hon thyü bin kelanyu genyu.
15Ketsinlesü le hihontse zohü nyo:
“Hagun nthu a-khwe nyülo yatselo,
nduka Npugü ntsun kethyü hontse
hagun nyun rüla nya.”
16Senyu le a-khwe nyülo-e a-nyun rüla la? Mosa no Ijipt nyu anyugun zen chwi keryü nyu aphu mvu ole? 17Lo senyu ge a-le chen henzi a-kenyü mvu hü la? Mula-o sikelanyu ju genyu mvu ole? 18Lo a-jo zen mvu kela dan kemvu we senyu no a-kerüyü bin nyu yü loho letse swe ola? 19Tsügenyu nle hinyu hyukelo le anyugun le tenyen kemvu genyu tsünyu yü loho kela gwünzin.
Currently Selected:
IBRINYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
