IBRINYU 2
2
Kenikelo Keda
1Tsügenyu nle nyülo kela dan nle tsüdan nrhi kela kenshvu genyu nyhen thyüo tsüdan rüchün kegwa thyü kvulo mvulo shvu. 2Tson-o tsangge jolonyu mün nyu chwikeryü jo-e thyü kelulo nrün ndi lo tejvü gwünkerho-e lo jo zen kemvu aphu a-shaja kho hyu tsentsülo hü yatselo; 3kenikelo le gon pe hitsülaki kethyü gü zenlo mvula yatselo nle dikipon tinlo tila? Tsüle Npugü le a-npvü zo teri gunryü, lo jo tsügü nyü kelonyu le nka-e jünzo shü. 4Lo Sunggigü le a-npvü a-kendo thyüo tha zansü lo ndun kethyü tho, kekvu shaseni lo Kenshün Kapu jochü pe jo tsügü nyü kelonyu che-o jünzo shü.
Sharhi Thyüpe Kenikelo Nyu Keshü
5Lo Sunggigü le nle a-rüla zo kehü siki ryü nrün kazü gü khipe tsangge jolonyu hensin shüla mvu. 6Tsonkethyü gü mvule ketsinlesü peha ka zo keshü le:
“Temi hile nyu letseo nle a-phin
rüchün hü nla;
nmvue temi nyugü hile nyu letseo
nle a-shweshwi hü nla?
7Nle a-gwünkho keshanyu ka genyu a-thyü pe
tsangge jolonyu nyeki tsenyo din laso;
nle zankechwi lo teshwe pe a-keda perün
thyü shü laso,
8nle tha aphu khipe a-pha hensin shü laso.” “Lo a-le tha aphu pe a-hensin shükela ka a-hensin shümvu kebin nme ndi so”; ngun le ntsoka tha aphu a-hensin shü kü kela hontse hyu mvu bin nyo. 9Ai tsangge jolonyu nyeki keshanyu jaka genyu a-thyü tsenyo din kela gü Jisu tsüle si-o kenjün thyü kelo genyu zankechwi lo teshwen pe a-keda perün hontse thyülo kela nme nle hyu bin laso, tson-o Sunggigü shwikenjün genyu a-no temi lihigüe sun thyüo si nrün genyu. 10Kechamvule tha aphu thyü keshü gü lo a-genyu tha aphu yhun kebin gü, anyenyu zen-o zankechwi nyu ryü kejü gü no anyugun kenikelo sharhi gü thyülo nrün genyu kenjün thyüo gwatilo kethyü le a-zü kela genyu.
11Lo anyugun thyü nshün kehü gü lo nshünlo kela dan-e tse kengüo nme ge chwiryü kü. Tsügenyu a-le anyugun lope a-sikezen nyu dan letse ko kejo mvuo 12zo,
“Ale nzan zope asikezen nyu dan
tesha shü ti;
ale süda gü dan nyu nshwe ti.” 13Lo “Ale aketenyen pe a-ge shüti.” Lo ntsoka-e hire, “Ale lo Sunggigü le khipe aketsü ntsenyu dan le re.”
14Lo nyu tsüdan le a-thyü a-zi thyü pvü kethyü genyu a-ko tsühontse a-thyü a-zi thyü pvü; tsüle kechamvule a-le si-o kesi kekvu kesen gü, tsüle tero serikemvu gü kekvu bo kemhenla nrün genyu le. 15Tsüntimvule kesi nshvuo a-keyhun then a-do thyü tinkela nyu hoshülo nrün genyu. 16Ketsin, a-le tsangge jolonyu ju ntsenlo titse mvule Abraham tsipwen dan ntsenlo titse tsentsü laso. 17Tsügenyu a-no Sunggigü lokethyü denzin me shwinjün lo joketsin püshükeda gü thyüo temi dan kemu ro thyüla nrün genyu tha lihi nyue a-sikezen nyu dan hontselo mvulo shvula. 18Lo mele a-semen-o a-le kenjün thyü kelo genyu a-le mele semen kebin nyu keche shü logwa.
Currently Selected:
IBRINYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
