GALATIANYU 2
2
Paul Lo Apostel Kechanyu dan
1Tsüsiki chen tseryü pezi siki ale Barnaba lo Tita ko sin tseo Jerusalem ki ni nsin. 2Lo tsüle Sunggigü le ano gülo tse atesha keshü genyu ale nsin; tson-o ale Juda kemvunyu mhundyü ka jolokegwa gü zope senthyü keshü rüla anyugun ka zoshü. (Sharhinyu dan nti ka zoshü) ale senthyü kehü nmvue senthyü gunkeryü gü tsüno thajo thyüla lo kenshvu genyu. 3Ai azen kehü gü Tita le Griknyu yatse-e a-no girülo tse tenge mvu. 4Ai npvünyu ketsin kemvu kebu yüryü kebin dan tsüdan le nle Jisu Khrista genyu nkekhin ndila sele tsekethyü tsü shao tejvü pe nphinlo titse nkuo yüryü kebin gwünzin. 5Jolokegwa ketsin gü tsüno hagun zen binlo nrün genyu ale gwünkho keshanyu ka-e anyugun jo we zen shwi mvu.
6Ai teshwen keshanyu bin din kethyü dan, anyugun le lihi thyü bin-e awe anyugun kenkhin ndi; Sunggigü tsü le temi so kechacha thyüla hümvu; tha tsüdan tsü le age we tha keshün nme mvule. 7Ai tsonkethyü gü mvule jolokegwa pe gikerünyu dan ka zolo tse Pitor tenyen kela hontse, jolokegwa pe girükemvunyu ka zolo tse kethyü atenyen kela anyugun le hyu loso. 8Kechamvule gikerünyu genyu apostel tho lope Pitor tsükela gü le Juda kemvunyu dan genyu apostel tho tsülo pe atsükela genyu. 9Lo shwikenjün hi khipe atsü kela shalo ntsin Jakob lo Kefa lo Johan nyugun kachon dan hontse teshwen pvü kehü dan le a, lo Barnaba tse ayi no Juda kemvunyu ki gunlo tse lo anyugun le gikerünyu ki gunti tseo kengü nme kethyü zansü anyugun ben njüzin pe ayi ben sü. 10Lo anyugun le ayi no rhokedyünyu phin rüchün shü lotse shü, lo ako tsügü tsü thyüshü nnyü sa bin nyo.
Paul Le Antiok Nyu Pitor Kesü Keshü
11Ai Kefa le Antiok nyu keryü ka ale a-mhuntsun a-kemu zoshü; a-le mu kela genyu. 12Kechamvule temi peha le Jakob ki bin-o keryü mhundyü a-le Juda kemvunyu zen-o tyütsü bin, tson-o tsüdan le gunryü ntsin gikerünyu dan nshvuo rani gü a-npvü kecha thyü tin kela genyu. 13Tsühontse Judanyu kechanyue a-hontse ketsin thyü kemvu genyu ketsin kemvu tsünyu Barnaba ko kozen tinla. 14Ai ale anyugun le jolokegwa ketsin gü nyu joketsin zokemvu hyulo-o ale anyugun aphu mhundyü nyu Pitor ka, “Nle Judanyu yatselo Judanyu hontse yhunlo mvuo dihontse Juda kemvunyu no Judanyu jvü hontselo lotse zologwa ti la?” tsonshü.
Judanyue lo Juda kemvunyue Ketenyen ka Kenilo ti
15Ngun le ngun nnyulo nyemhun ka Juda kemvunyu mvule, Judanyu le la. 16Ai Jisu Khrista ketenyen genyu kemvu we tejvü nyu thyü mvulo keshvu thyü kelo genyu temi nme-e ntsenlo hümvu tsekethyü sha, Khrista ketenyen genyu ntsenlo nrün genyu ngun le Khrista Jisu tenyenlo laso, lo tejvü gü genyu kemvu so, kechamvule tejvü tho genyu temi nme-e thyü pe ntsenlo nrün ndi. 17Ai ngun yhenthyü keshü nyu Khrista ge ntsenlo hü yatselo, ngun npvü ngun le kemunyu, tsekethyü hyulo hü, tsüle Khrista le kemu lokethyü nyu letse logwa le? tsonlo shvu. 18Ale anpvü borho kela dan thyüni yatselo ale tejvü gü gwünrho kelanyu so. 19Kechamvule Sunggigü kipon rhünlo nrün genyu tejvü gü ge tejvü kipon si laso. 20Ale Khrista zen-o krus ge ahü laso; ale yhun sin bin mvu laso; ai Khrista le anyun nyu yhun bin nyo; lo ntsoka ale thyümin nyu yhun kebin keyhun higü hile, aso kehü lo agenyu aphou hoshü kela Sunggigü Nyugü ketenyen nyu kehü nti le. 21Ale Sunggigü shwikenjün gü pe a-kenrun thyüla hümvu; kechamvule ntsen kelo le tejvü gü genyu yatselo Khrista kesi le a-kon ndi laso.
Currently Selected:
GALATIANYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
