GALATIANYU 1
1
1Temi kanyu mvu, nmvue temi genyu kemvu, ai Jisu Khrista lo Npvü Sunggigü, kesinyu dan nyu Khrista thyü nrhün kelo gü. 2Lo azen kehü apvünyu ju aphu azen kengüo kelu keshü khipe Galatianyu kehun aphu tsüshü le.
3Npvü Sunggigü lo Jisu Khrista no shhwikenjün lo nyun kebwen pe hagun ketsügü thyülo.
4Npvü Sunggigü kendo hontse hizon ka serikemvu kazü hinyu nkenchwilo titseo nkemu genyu a-le a-phou hoshü. 5A-no kethonthen zankechwi gü thyülo. Amen.
Jolokegwa Le Nme Nti
6Khrista le shwikenjün genyu hagun ko kelogü, hagun le whütse tsü nrhio jolokegwa kechaki güzhü laso. 7Lo tsügü tsü le jolokegwa kecha le bin kethyü genyu mvu, ai temi peha le hagun ketekhio Khrista jolokegwa gü zo nshvu kehü gwünzin. 8Ai agun metse nmvue tsangge jolonyue ale nduka zope hagun senthyü keshü gü mvuo jolokegwa kecha pe hagun senthyü hülo tsünyu no gwa tsenyü khü. 9Agun le nduka hagun ka kezo hontse ale ntsoka-e tsü zoni hünyo, temi lihigüe hagun le nduka hyukelo gü mvuo jolokegwa kecha zope hagun senthyü hü yatselo, a-no gwalo tsenyü khü.
10Kha, ale temi so fühü le, Sunggigü so fühü nla? Lo ale temi kenyü thyü titse ayhen thyü hü nle? Ale ntsokhin temi kenyü thyü hü yatselo ale Khrista go thyülo nrün ndi.
Dihontse Paul Le Apostel Thyülo yo
11Apvünyu ju, ale senthyü kehü jolokegwa gü tsüle temi kanyu ryü mvu tsekethyü hagun no shalo nyü bin nyo. 12Kechamvule ale temi kanyu tsügü tsü hyulo mvu, nmvue mele tsü zope asenthyü shümvu, ai Jisu Khrista le a-npvü tsü tsinpe ahi keshü genyu.
13Lo hagun le nduka ale Judanyu jvü gü zen kehü ka ajvü arüla-e sha hü ti, ale Sunggigü kehun gü shwirüchün-o tsü bokemhüla titse ayhen thyüsa hü. 14Tsügenyu ale apvü abon nyu nyünnyü jvü sen-o ayhenthyü-o a-sü a-dan nyu Judanyu jvü nyu keritsin nyu nme thyü soryü.
15Ai Sunggigü le shwikenjün nyu a nnyukelo mhundyü ano a-lothyü titse akhipe kecha thyüo akolo laso. 16A-le a-nyugü pe ahishüo ano arüla jolokegwa pe Juda kemvunyu dan nyu zoshü lotse kethyü ka dihontse tiyo tse ale temi nme ka-e shün mvu. 17Nmvue a mhundyü ki apostel thyülo kerinyu dan fü, Jerusalem nyue nsin mvu, ai ale Arabia nyu nshyela, tson-o Damaska nyu nigun. 18Tson-o tsüsiki ale Kefa zen ketenoshü titseo Jerusalem ki nsin gü jonryü pvün a-zen bin. 19Ai Npugü sikezen gü Jakob kehyu nyeki apostel kechanyu nme-e hyumvu.
20Ale thu pe hagun tsüshü kebin dan le, Sunggigü yhühyu ka zoshü. Jo hile kenku jo kemvu.
21Tsüsiki ale Siria lo Kilikia kazü kipon ryülo. 22Lo tsü keti tsüle ale Judia nyu dan zen kemhun hyuo kesha mvu. 23Ai anyugun le, “Nduka ngun nshwen kehügü le ntsoka we a-le bokemhüla titse kehü ketenyen gü zope me senthyü tinla sele tsekethyü mele kezo nyülo.” 24Tson-o anyugun le agenyu Sunggigü shwen sala.
Currently Selected:
GALATIANYU 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
