GALATIANYU 3
3
Tejvü Nmvue Ketenyen
1Hire, kepin Galatianyu! Segü no hagun kebula ola? Kemvu we hagun mhundyü nyu Jisu Khrista pe krus ge hükela tsin tsentsü pe hagun hishü laso! 2Ale jo higü hi hagun ka shanyü bin nyo, kha hagun le Kenshün Kapu hyukelo, tejvü gü nyu thyü mvulo keshvu dan genyu le ketenyen jo kesha genyu la? 3Hagun le pin pe hihontse hü ole? Kapu kendo nyu binzenlo-o ntsoka temi kendo nyu kekhin thyüla ti ole? 4Hagun le thaja nyu kenjün thyü pe hihontse gunryüla se ole? Hagun le thaja thyü kehü tsüle ketsin se ole? 5Kapu khipe hagun tsü, lo hagun dan nyu tha ndun kethyü thyüshü kehü gü, a-le tejvü nyu thyü mvulo keshvu dan sen-o thyü hü le ketenyen jo kesha sen ola?
6Abraham ko Sunggigü tenyenlo, tsügenyu a-le ntsen letse lo. 7Tsügenyu lihigüe ketenyen nyu yhun kehünyu tsünyu le Abraham nyenyu ju letse kethyü shalo nye. 8Tsüntimvule ketenyen genyu Sunggigü le Juda kemvunyu dan-e thyü pe ntsenlo ti tsekethyü nchwen nyu shao ketsin lesü le nchwen ki Abraham ka, “Ngenyu temi aphu no jochü hyu loti,” tsokethyü jolokegwa gü le zoshü. 9Tsügenyu ketenyen nyu yhun kehünyu le, tsüdan ketenyen le Abraham zen-o jochü hyulo hü. 10Ai tejvü genyu thyü mvulo shvu letse kehünyu aphu swetsü laso, kechamvule temi lihigüe tejvü lesü nyu thu pe kenjü thyü, lo zen hü kemvunyu aphu swetsü laso, tson thu kenjü genyu. 11Ai tejvü genyu temi nme-e Sunggigü mhundyünyu ntsenlo hü mvule tsekethyü sha tsentsü bin nyo, kechamvule ketenyen genyu kentsennyu le rhünlo nrün genyu. 12Tejv'u tsüle ketenyen nyu kemvu, ai tsü thyü külo kehünyu le tsügenyu rhünlo ti.
13Jochü pe Abraham tsüti letse kehü tsüle Jisu Khrista genyu Juda kemvunyu no hyulo nrün, lo ngun ko tenyenlo yatselo zope bin kenjü Kapu gühyulo nrün genyu Khrista swentsü la. 14Tson-o tejvü gü nyu swetsü kelagü nyu nrhinhilo laso, kechamvule san ge hü kelanyu aphu swetsü laso, tsonkethyü thu pe bin kenjü genyu.
Tejvügü Lo Zokenjügü
15Apvünyu ju, ale temi rüla ge tha nme zoshü ti, temi hi-e tha nme kejozen pe bin njülo, temi nme-e tsü gwünrhola hümvu, nmvue zokenye-e lahü mvu. 16Lo tha sope kenjü tsüle Abraham tsipwen nyu genyu. A-le kezole, kechon rüla kezo hontse, “Lo a-tsipwen dan,” tson mvu, ai a-npvü a-rüla kezo hontse, “Lo ntsipwen gü,” tsonzo; lo tsüle Khrista gü. 17Lo a-kezo we hihontse,Sunggigü le nchwenki tha nme zope kenjü gü tsüle, gungü chentsizio shenryü siki nyu hyukelo gü tsüle nduka zope kenjü jo tsügü zo ndi pe tsüno thaja thyüla lo nrün ndi. 18Lo gwenlo nrün kenya tsüle tejvü gü genyu yatselo, jo tsü zope kenjü gü genyu mvuso; ai Sunggigü le zope kenjü gü genyutsü khipe Abraham tsü.
19Tsonlo tejvü gü le nyu genyu la? A-tsipwen genyu zope kenjü gü, tsüle ryülo kemvuka tejvü gwünkerho genyu tsü khikeshü le. Lo tsüle tsangge jolonyu khipe a-jaka jolonyu temi ben nyu kenye keshü le. 20A-jaka jolo thyü kehü gü tsü senmvu-e gwa temi nme nti la kethyü we, lo Sunggigü le nme.
Tejvü gü Le Nyu Genyu Yo Tsekethyü
21Lo tejvü gü le Sunggigü le zope kenjü zen kerhün kemvu nme hontse le? Tsonlo shvu! Nthyü nrhünlo kegwa tejvü khishüla sele tselo tejvü tsügü genyu ntsen loti. 22ai Jisu Khrista ketenyen genyu zope kenjü gü tsü pe a-ketenyen nyu tsülo nrün genyu ketsin lesü le tsü aphu pe kemu no khin pe bin laso.
23Ai kekhin ki teshashü nrün ketenyen gü genyu, ketenyen le keryü mhundyü, nle ketenyen gü hensin nkhin pvü binti. 24Tson-o tejvü gü tsüle nzen-o Khrista ki gun ti letse kethyü n ncheka n leyi kethyü nme thyü ti; ketenyen nyu nthyü ntsenlo nrün genyu. 25Ai ntsoka we ketenyen le gunryü kela siki nle ncheka nleyi kethyü gü hensin bin mvu laso.
26Kechamvule Jisu Khrista ketenyen genyu hagun aphu Sunggigü nyu thyükelasi genyu. 27Lo Jisu genyu baptaiz thyü kelonyu aphu Jisu khibenlo laso. 28Judanyu letse lo Griknyu letse kehü tsü aphu kecha thyü loho, me do kethyü nyu lo medo thyü kemvunyu aphu kecha thyü loho; kechamvule hagun aphu Jisu Khrista genyu nme thyülo kelasi genyu. 29Tson-o hagun le Khrista hon thyükelo siki we nduka zope kenjü hontse, hagun le Abraham tsipwen, lo a-kenya gwen kelo ju thyülo ti.
Currently Selected:
GALATIANYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
