2 KORINTHIANYU 13
13
Petsülo Lotse Kethyü Lo Kelukeshü Kekhin gü
1Ale hagun ki ryü titse kebin hile gwünshen gü so. Me nmu kethyü lihi-e mihvu nmvue mishen le shabin yatselo tsüle ketsin. 2Ale hagun ka gunkeryü gwünhvu ge güka hagun no petsü binlo tse zokeshü hontse nthu-e hagun dan nyu bin kemvu ka zonishü bin nyo. Hagun ligühigüe himhundyü kemu thyü kelanyu lo kechanyu dan-e ale nigunryülo temi nme-e hoshü loho. 3Kechamvule Khrista le anyun nyu bin-o jozo kehü ketsin le mvuyo tsekethyü hagun le sha nyü bin kethyü ale sha kebin genyu. A-le hagun zen-o tha thyü kethyü le kvumvu lamvu, ai hagun nyun ki we kvusa bin nyo. 4Kechamvule a-le kvu kemvu nyu krus ge a-hüla, ai a-le ntsoka we Sunggigü kekvu genyu rhün tinla so. Lo a-zen keme thyüo ako kvu mvu, ai ale hagun ki keryü ka ale a-zen-o Sunggigü kekvu gü nyu yhun ti.
5Hagun le ketenyen gü nyu yhun bin le mvuyo tse kethyü hagun npvü hagun rüla rüchün shwi; tson-o hagun le njü bin le mvuyo rüchün shwi. Jisu Khrista le hagun nyun ka bin tse kethyü sha tsentsü bin le mvu la? Nmvu yatselo hagun le ketenyen nyu bin mvu laso. 6Aketenyen we hagun le ale a-zümvu lamvu tsekethyü shalo ti ado tse rüchün bin nyo. 7Ai hagun no thyüzüla mvu nrün genyu ale Sunggigü ka hibin hünyo; tsügü tsüle ale a-kezügü thyü kehü meno hyu titse mvule ale a-zü kemvu hontse-e hagun no a-kezü gü thyülo nrün genyu le. 8Kechamvule ale thame thyüo ketsin gü ntsunlo nrün ndi ai ketsin gü genyu tha thyü hünyo. 9Tsügenyu ale kvu mvu lo hagun le kvu tse kebin ka asherhün hünyo. Ale kehi thyü kehü le hagun no gwakenyelo nrün genyu le. 10Ale hagun kepen ki bin ketseka higühi thu shü bin nyo; lo tson-o ale gunkeryü ka Npugü le ano borhola lotse mvule thyü nkoshü nrün genyu kekvu khipe aketsü gü sen rüchela mvu nrün genyu.
11Jo kekhin gü, apvünyu ju, kegwa thyü bin tanye, gwapen kelo hü gunlo, ajo dan nyülo, kenyun rhünlo, kengü gwa binlo, tsonlo yatselo keso lo nyun kebwen Sunggigü le hagun zen bin loti.
12Kenshün kembo kethyü jvü sen-o khinyu khinyu kelushü le nye.
13Kenshün nyu dan aphu hagun kelu küshü le nye.
14Npugü Jisu Khrista shwikenjün lo Sunggigü keso gü, lo Kenshün Kapu nzen kepvüshen kehü gü no hagun aphu zen bin kelo gü thyülo.
Currently Selected:
2 KORINTHIANYU 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
