EZEKIEL 40
40
SIKI KERSHVUKA KEHYU
(40:1—48:35)
Israel Zen-o Jerusalem Ki Gükela
1Tsü le a gun zen-o dothyü tinkela chen nkipvün ka lo Jerusalem so kvulo kela chen tseryü pezi chen keshün gü jon ryü nyü. Tsünyü ale Npugü kehü kekvu shalo, lo a-le a pen-o tinla. 2Tsemin ki tsü Sunggigü le a zen-o Israel kazü ki güo a khipe kazüthun ketetso nme ge shüla. Ale amhundyü kipon ka dan me nri pe nyida hontse hyushü. 3A-le azan tsü khonni gü, lo ale temi nme le ben pe lazo hontse kethyü hyu. A-le linen pe tha kendoron kethyü lo tha kendovü nme tse sen-o khinrun tson ka sobin.
4A-le aka zo, “Nrilo, Silakehü temi gü, ale pe nhi kebin hi aphu nyü petsülo lo rüchün nyu yhün salo, kechamvule hi genyu nzen hi nyu ryü le. Nle nkehyu aphu pe Israel temi ka zoti.”
Npho Khinrun
5Ale kehyu gü tsü le Kershvuka, lo chwida khwen pe tsü hun bin. Temi gü le a-tha kendovü meter kenshen tsü khilo-o chwida kehun tsü nda. Tsü le meter kenshen tetso lo a-kesü le meter kenshen. 6Tson-o a-le chonrha npho ntsun kebin gü ki npha. A-le phalvu dan ki küo a-so kibin-o keyü tson ndo; tsü le meter kenshen. 7Tsünye ka tson nme le bin, a-tezin rikhun katsen kenshen le bin. Katsen tsü dan aphu kethon keda ketun, aphu meter kenshen shen, lo katsen tsü dan jaka kabon kesü le meter kenyhun-o peha. Rikhun katsen dan nyeka tson nme a-kethon meter kenshen le bin, tsü le Kershvuka kentsun kipon katsen keda nme ka yü bin. 8-9A-le tsü ndo, lo tsü le meter pezi ntsun. Tsü ale Kershvuka kho kenitsin gü chonrha tson keni thyü laso, lo chwida kehun gü a-te ki tsü le a-kesü meter nme. 10(Tson te lihizin rikhun katsen dan tsü le kethon keda aphu kenme, lo tsü dan katsen jaka hükethü aphu a-kesü le ketun.)
11Tsüsika, temi gü le chonrha keyü nyu tson gü kemhun ndo. Tsü le aphu kesin-o meter tsero-o peha, lo chonrha jaka nrun kebin le meter pvün. 12Katsen aphu mhundyü ka chwida kekhwen le sentimeter henpvün tetso lo a-kesü le sentimeter henpvün. (Katsen dan le kethon keda meter kenshen shen kü.) 13Tsüsiki a-le tsonte nme zin katsen sika gü tsonte kecha kipon katsen siki keti ndo, lo tsü le meter tsenyü kenyhun-o peha. 14A-te ketsin katsen gü nyu kamhun ki kechwi tson le bin. A-le katsen tsügü ndo laryü a-kenmhun le meter tseryü. 15Chonrha ngwen gü ka gü katsen kenkhin gü chonrha keti tson kethon le meter nki pvün. 16Katsen aphu nyu kabon ngwen zin lo katsen dan ja hü kethü aphu ge a-kü kenshen shen fükephe le bin kü. Kabon nyuzin tson denzin kentsun aphu kvubin men yhen njü.
Kamhun Ngwen Gü
17Temi gü le a zen-o chonrha tson zen-o kamhun ngwen gü nyu yüla. Tsünyu katsen shenryü thyü pe chwida ngwen gü ntsun bin lo tsü dan mhundyü ki bin nme ka tso pe la njü, 18Tsü le kamhun gü keti hun gun bin. Kamhun ngwenzin tsü le a-nyuzin gü nyeki tsenyo kvu.
19Lo tsü nye ketetso ki chonrha tson le kamhun nyuzin gü ka yüryü bin. Temi gü le chonrha tson kenyhun ja ndo, lo tsü le meter henpvün.
Chonrha Teso Gü
20Temi gü le chonrha teso kipon kamhun ngwen zin keyütson ndo. 21Tson lihizin rikhun katsen kenshen le kebin dan, tsü dan ja hü kethü dan, lo katsen kedagü tse aphu kethon keda le nphozin chonrha gü zen-o kenme. Chonrha tson kethon aphu le meter nkipvün, lo a-kemhun le meter tseryü kenyhun-o peha. 22Katsen kedagü, kafüphe lo kvubin yhen kethyü dan tsü le nphozin chonrha kenme. Hinyu phalvu tsenyü thyü kü chonrha ti bin, lo a-keni ki katsen kedagü le kamhun tsen gü ntsun bin. 23Nphozin hontse tesozin chonrha kentsun kipon chonrha nme le kamhun nyuzin yübin. Temi gü le chonrha hihvu ja kethon ndolo, lo tsü le meter henpvün.
Khinrun Tesin Gü
24Tsüsika, temi gü le azen-o tesinzin nshe, tsüki ayi le chonrha kecha nme hyu. A-le tsü ndo, lo tsü le kecha dan kenme. 25Chonrha tson higü nyu katsen dan ko kecha dan hontse kafüphe le bin kü. Chonrha tson kethon aphu le meter nkipvün, lo a-kemhun le meter tseryü kenyhun-o peha, 26phalvu tsenyü thyü kü gü tsü tibin, lo tsünyu katsen keda gü ko a-tezin kamhun le bin. Lo kabon nyuzin tson denzin kipon kvubin men yhen njü. 27Hinyu ko chonrha tson thyü sen-o kamhun nyu gü ki yü bin. Temi gü le chonrha kenyhun gü ja kethon ko ndolo, lo tsü le meter henpvün.
Kamhun Nyuzin Gü Khinrun Tesin Gü
28Temi gü le azen-o tesinzin chonrha gü nyu kamhun nyu gü ki yü. A-le chonrha ndolo, lo tsü le kabon ngwenzin chonrha ketun kü. 29-30Tsünyu rikhun katsen dan, katsen kedagü, lo kabon nyuzin le chonrha kecha dan zen ketun kü. Lo chonrha higü nyu katsen dan ko kafüphe le bin kü. A-kethon aphu le meter nkipvün lo a-kemhun le meter tseryü kenyhun-o peha. 31Tsü gü katsen keda gü le kamhunkecha gü ntsun bin, lo tson kethon aphu kabon ge kvubin men yhen njü. Phalvu tetse thyü kü chonrha higü ti bin.
Kamhun Nyuzin Khinrun Npho Gü
32Temi gü le azen-o npho chonrha tson gü nyu kamhun nyugü ki yü. A-le chonrha tsü gü ndolo, lo tsü le chonrha kecha dan zen kenme. 33Tsünyu rikhun katsen dan, katsen kedagü, lo kabon nyuzin le chonrha tson kecha dan kenme ndolo. Tsünyu kafüphe le aphu ka bin, lo katsen kedagü ka ko a-kethon le meter tseryü kenyhun-o peha. 34Katsen kedagü le kamhun ngwenzin ntsun. Tson then kabon ge kvubin men yhen njü. Phalvu tetse le chonrha tsü ti bin.
Kamhun Nyuzin Khinrun Tesogü
35Tsüsiki temi gü le azen-o chonrha tesogü ki nsin. A-letsü ndolo, lo tsü le chonrha kecha dan zen kenme. 36Tsü dan hontse tsü ko, rikhun katsen dan, kabon nyuzin nthyü bin, lo katsen keda nme, lo a-kehun aphu kafüphe le bin. A-thon aphu le meter nkipvün lo a-kemhun le meter tseryü kenyhun-o peha. 37Katsen kedagü le kamhun ngwen gü ntsun bin. Tson then kabon ge kvubin men yhen njü. Phalvu tetse le tsü ti bin.
Khinrun Tesogü Khoka Ka Kethyü
38Kamhun ngwenzin nyuki ka nme le a-nyuzin chonrha tesogü nsü bin. Tsü le kamhun ntsun kebin katsen kedagü zen kephe bin, anyugun le rope kerüshvu thyü nrün nyukhu dan dushvu pe tsü nyu sü hü. 39Katsen keda higü nyu miz pezi le bin, katsen lihizin shahvu le bin. Miz hidan ge anyugun le rüshvu nrün nyukhu pe dushvu hü nyo, apentha pe rola nrün, kemu kejü kerüshvu genyu lo thyükezü pu tho nrün-e. 40Katsen ngwenzin miz tsü hontse kethyü pezi le bin, chonrha teso gü nyu keyü tson lihizin kenyhun yhun le bin. 41Rüshvu nrün nyukhu pe a-ge dushvu kehü miz tetse le bin: pezi le katsen nyuki lo pezi le kamhun ngwen ki bin. 42Ka tsü gü nyu nyukhu apentha rope rüshvu nrün genyu ketsülo kehü tso rhe pe kethyü miz pezi le bin. Tsü dan aphu a-ketetso le centimeter henpvün, a-kethon le centimeter hentsenyüpvün lo a-keda-e centimeter hentsenyüpvün. Nyukhu pe rüshvu nrün dushvu kehü kanyü aphu pe miz hidan ge shü hü. 43Lo miz tekekho a-keda milimeter hentsenyüo pvün pe hun njü. Lo kerüshvu thyü nrün thyü aphu pe miz dan ge shü hü.
44Tsüsiki a-le azen-o kamhun nyugü kipon yü. kamhun nyuzin ki katsen kenyhun khinshe bin, nmele tesin chonrha tson tesogü denzin ntsun bin lo kecha gü le tesozin chonrha tesingü tson denzin ntsun bin. 45Temi gü le aka zo-o, tesinzin ntsun kebin katsen gü tsü le Kershvuka kanyu lotho thyü kehü püshükedanyu genyu, 46lo tesozin ntsun kebin katsen gü tsü le kershvubin ka lotho kethyü püshükedanyu genyu. Püshükeda tsü dan aphu Zadok ge tsükeryü; tsü dan le Levi tsipwen ge anyugun no Npugü kehü bin ki güo a-lothyü lokegwa khinshe keshü nyu nti.
Kamhun A-nyuzin Gü Lo Kershvuka Kethyü
47Temi gü le kamhun nyuzin gü ndolo, lo tsü le meter henpvün ketun kü. Kershvuka tsü le nkhünzin, lo tsügü mhundyü ka kershvubin nme le bin. 48Tsüsiki a-le azen-o Kershvuka keyü katsen gü nyu yü. A-le tsünyu keyü tson gü ndolo: tsü le meter kenyhun-o peha ntsun lo meter tsenyü nmhun, lihizin a-te kabon kesü le meter nme-o peha. 49Phalvu tson meter tseryü nmhun lo meter tsero ntsun kethyü le gü keyü tson tsü gü ti bin. Keyü tson lihizin kachon nmeme le bin.
Currently Selected:
EZEKIEL 40: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
