EZEKIEL 39
39
Gog So Kvukelo
1Aphu sokekvu Npugü le zo, “Silakehü temi gü, Meshek lo Tubal hvu so kekvu gü Gog nkhin-o ale a-kenrhi gü letse zoshü lo. 2Ale a-tson tsin pe tson keshün ki shüo a-le Israel kazüthun dan ka ryülo kemvuthen teso kipon nithen ki a-zen ryüti. 3Tsüsiki ale a-ben njüzin thotsi lo ngwazin tholevü tse kekhüshe lati. 4Gog, a-rihü lo a-logwa dan le Israel kazüthun ge si lati, tson-o ale anyugun simin pe tegü lo nyukhu aphu chvü thyü lati. 5Anyugun le kendo nyu siti. Aphu sokekvu Npugü le zo laso. 6Ale mah pe Magog kazü lo a-tekehun zü se nyu temi le kevükeben ndio yhun kebin bin aphu nyu ro shüti, lo temi aphu ale Npugü letse shati. 7Ale a temi Israel no a zan kenshün sha tsentsü lo, lo a zan no kejopvü nila loho. Tsonlo senye dan ale ale Npugü Israel kenshün Sunggigü letse sha loti.”
8Aphu sokekvu Npugü le zo, “Ale zokeshü jon gü tsü le ryü tsentsü. 9Israel nyu nyida nyu keyhun nyu le chwio mah thyü nrün genyu terikanyü khekela dan kequen loti. Anyugun le gida, tholevü, tsotsi, mi, benkejeü dan pe mah thyü lo anyugun le chen tseryü zeü lo kegwa le bin ti. 10Anyugun le low ki kejeü sen lü nmvue tehen ki tesen phün mvue gwa lati, kechamvule terikanyü dan pe zeü lo kegwa kechon le bin lati. anyugun le mele anyugun hon seü lo lapvü tinkela nyu hon seü lo nilo lati.” Aphu sokekvu Npugü le zo laso.
Gog Kesun
11Npugü le zo, “Hidan aphu thyü ryülo ale Israel nyu kenjwen nyu kazü ketejon gü nyu Gog sun nrün kazü pe a-tsü ti, tsü le kesi zida nphozin. Gog lo a-rihü aphu pe tsünyu sun ti, lo ketejon tsü gü lope ‘Gog rihü kazü ketejon letse ko lati.’ 12Israel nyu le simin dan aphu sun lao kazü thyü kenshün niti. 13Kazü tsügü nyu temi aphu anyugun kecheo tsü dan sun ti, lo anyugun le ale kvukelo jon higenyu kerühvu pvü loti. Aphu sokekvu Npugü le zo laso. 14Shye tsenyü penkela siki, temi kejülo-o anyugun no kazü aphu ka ho-o simin sun ti mvu kebin dan fü pe sun lati. Tson-o anyugun le kazü gü thyü kenshün lati. 15Anyugun le kazü tsünyu nsin nsheo temi ru hyukelo bin ka tha zensü thyü pe bin njüo minsun ketso nyu le ryüo tsüdan pe Gog rihü dan kazüketejon ki sunla kegwa thyü ti. 16(Tsükho ka rihü dan zen ka tho kethyü rünyi nme le bin ti.) Tson-o kazü gü thyü kenshün ni lati.”
17Aphu sokekvu Npugü le aka zo, “Silakehü temi gü, lihizin tegü lo nyukhu aphu no ryüo ale anyugun genyu rora nda kebin gü tyü lotse koshülo. Tsü le Israel kazüthun dan ge keho keda thyüo tsünyu anyugun le thyü tyü lo tezi tsü loti. 18Anyugun le shüpahü nyu simin tyü lo kazü nyu kekvu kesen nyu zi tsü ti, anyugun aphu tenyü tse, tanyü nyu, tanyü nmvue thu tse kegwa hontseo ga kü lati. 19Ale kerüshvu tho kethyü hontse temi hidan boshvu shülo, tegü lo nyukhu dan le thyü a-keshvu anyugun le tyülo kegwathen tyü lo tezi tsü nzeülo kemvuthen tsüti. 20A miz nyu keru kezen nyu tsü ge kedun nyu, shüpahü lo teri temi zen-o tyütsü pe kesü thyü loti. Aphu sokekvu Npugü ale zo laso.”
Israel Zenni Ryükelo
21Npugü le zo, “Ale senye dan no a zan kechwi hyu ale dihontse a kekvu sen-o kenjü nyu rhikelo dan thyülo yo, pe anyugun hishü ti. 22Israel nyu le tsü gerho ale Npugü anyugun Sunggigü letse shalo lati. 23Lo senye dan le Israel nyu le mu pe a ntsun kela genyu me kazü ki tinla letse sha loti. Ale rani tin lao anyugun kenrhinyu no anyugun so kvulo-o teri nyu anyugun boshvula. 24Ale anyugun le nshün kemvu lo serikemvu genyu hyulo kezü pe anyugun tsüla, lo ale anyugun kipon ranila.”
25Aphu sokekvu Npugü le zo, “Ntsoka we ale Jakob tsipwen, Israel temi dan shwi njün shüo anyugun no gwakenye ni loti. Ale a zan kenshün gü ntsen loti. 26Anyugun le gwüngwa anyugun kazünyu kenshvu ndi lo nme-e anyugun kedün mvuo yhun nikelo ka, anyugun le dihontse a sa kela genyu kejo pvükela tsü nmhin lati. 27Senye kechon ka ale nshün tse kethyü pe hishü nrün genyu, ale a temi anyugun kenrhinyu kazü aphu ka yhun kebin dan zenni ryü lati. 28Tsüka atemi dan le ale Npugü, anyugun Sunggigü letse sha loti. Anyugun le tsü sha loti, kechamvule ale anyugun nipe dothyü tinlao ntsoka anyugun nme-e khela mvu tse zen niryü anyugun kazü nyu kequenlo kela genyu. 29Ale a kapu run pe Israel temi ge shüti, lo anyugun kheo rani tinla loho so. Aphu sokekvu Npugü ale zo laso.”
Currently Selected:
EZEKIEL 39: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
