EZEKIEL 41
41
1Tsüsika temi gü le a zen-o katsen lvu gü kenshünbin gü ka yü. A-le tsünyu keyü tson ndolo; tsü le meter kenshen ntsun, 2meter pvün nmhun tsü le a-te lihizin hükethyü a-kesü meter kenyhun-o peha le bin. A-le katsen tsü gü ndolo: tsü le meter nki thon, lo meter tseryü nmhun.
3Tsüsika a-le kanyutsen kentsun tsin gü ka yü. A-le tsünyu keyütson gü ndolo: tsü le meter nme ntsun lo meter kenshen nmhun. a-te lihizin hü kethyü a-kesü le meter kenshen-o peha. 4A-le katsen tsü gü ndolo, a-kethon keda le meter tseryü ketun. Tson-o a-le aka zo, “Higü le KENSHÜNTSIN BIN.”
Katsen dan Thyü Pe Kershvuka Bon Nsü Kethyü
5Temi gü le Kershvuka gü nyuzin ndolo, tsü le meter kenshen. Kershvuka kabon kensü katsen kenshen shen a-kemhun le meter kenyhun thyü pe bin njü. 6Ka hidan le hie shen shen, lo he nme ka katsen shenryü. Kershvuka kehun ngwenzin kabon gü tsü le kahe tesingü nyeki rüpvü kvu, tson-o katsen dan tsü no Kershvuka kehü gü minren mvuo sunlo nrün genyu. 7Tson-o Kershvuka kabon tsü le tegwen ki bin-o hyulo a-pe keti a-kesü le akenme la nrün genyu. Kershvuka ngwen ki kabon, denzin, katsen dan ngwenzin, tesoki kekü tson kamhun kenyhun thyü njü, tson-o ketsenyo ki bin-o a-lvu gü lo tesogü ki külo nrün genyu. 8-11Katsen hidan kehü ngwen gü, le meter kenyhun-o peha; khenpvü nme le Kershvuka tesozin katsen dan ki yü, lo nme le tesinzin keyü tson. Ale tesoki ketejon meter kenyhun-o peha le Kershvuka hun kebin hyu; tsü le kazü soki meter kenshen. Lo tsü le Kershvuka kabon nsüo katsen dan binkezen zen-o kentsin. Ketejon gü lo Püshükeda dan ale bin kehü ka dan jaka bin kenrun meter tseryü le kehun ka rhon bin.
Nkhünzin Ka
12Bin kenrun gü keniki Kershvuka nkhünzin ka nme a-kethon le meter henzipvün a-keda meter shenryü pvün le bin; a-kehü kesü le meter kenyhun-o peha le hun keti bin.
Kershvuka Aphu Ndokelo
13Temi gü le Kershvuka ngwenzin ndolo, a-kethon le meter henpvün. Lo Kershvuka sikipon, bin kenrun ka gü nkhünzin keti meter henpvün, 14Kershvuka mhundyüzin bin kenrun gü lihizin kesin-o a-kethon le meter henpvün. 15A-le nkhünzin ka kethon lope lihizin tson tse ndo kesinlo, tsü le meter henpvün.
Kershvuka Rüla Aphu
Kershvuka nyu keyü tson katsen, Kenshün Bin gü, lo Kenshüntsin Bin gü 16aphu kela ka tsü kafüphe keti tesen pe thyüzegwa kübin. Kafüphe hidan le khinlo hü. 17Kershvuka nyuki kabon ge khenpvü so keti 18kvubin lo cherubim nyukhu men yhen njü. Kvubin nmeme lope cherubim kenyhun jaka shü njü, tsü le kabon gü kehun aphu. Cherubim nme le a-mhun kenyhun yhun; 19nmezin le temi mhun hontse kvubin ntsun, lo kecha zin le shünyho mhun hontse pe senbin kecha gü ntsun. Tsü hontse pe kabon aphu hun njü, 20kazü ka kü khenpvü so keti. 21Kenshünbin gü khenpvü kekho kethon keda kenme.
Tesen Pe Kerobin
Kenshüntsin gü Bin nyu keyü tson mhundyü tha nme nri pe 22tesen pe kethyü kershvubin hontse. Tsü le meter nme-o peha tetso lo meter nme nmhun. A-qün ka ketun, a-sin, lo a-kehü aphu tesen pe thyü. Temi gü le aka zo, “Miz higü le Npugü le kehü bin nyu shükehü gü tsü le.”
23Kenshün Bin nyu keyü tson keni ki kakhin nme, lo Kenshüntsin Bin nyu keyü tson keni ki ko nme tse bin. 24Kakhin tsü hvu tsü le ponhvu thyüo a-lvu nyu khinshe hü. 25Kenshün Bin kakhin tsühvu ge ko kabon ge kebin hontse kvubin lo cherubim men yhen njü. Keyü tson katsen ngwenzin tesen pe sunnjü. 26Katsen tezin kafüphe le bin, lo kabon dan ge kvubin dan zü pe nthyü njü.
Currently Selected:
EZEKIEL 41: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
