EZEKIEL 38
38
Gog Le Sunggigü Kanyü
1Npugü le aka zo, 2“Silakehü temi gü, Magog kazü nyu Meshek lo Tubal senye hvu so kekvu kedagü Gog nkhin shülo. A-nkhin shü, 3lo a-ka Aphu sokekvu Npugü a higü le a-kenrhinyu letse zo shülo. 4Ale a-sü pe rahun shü, hükhuvü pe a-sapha ka shü, tson-o a-le lo a-shüpahü aphu sü pe shwen lati. A-rihü dan, anyugun keru lo tsü dan ge kedun nyu phinya keme kepvü dan, tsü dan le chonsa, lo gida pvü kehü shüpahü lo zhethon pen kebin aphu. 5Persia, sudan lo Libia kipon keryü nyu le a-zen bin, lo aphu gida lo tegi perün pvü hü. 6Teso kipon Gomer lo Beth Togarmah kazü kipon terikethyü temi aphu a-zen hü, lo tsü hontse senye kecha kechonka temi-e sin. 7A-no gwün ndolo lo a-shüpahü no a-johokeshü zen-o ndo külo lotse zoshü chi. 8Chen kethon siki ale a-no senye nme, senye kechon khi ka temi dan zen ni ryüo kequen lo teri kenshvu ndio yhun tin kela nyu whelo tse zoshü ti. A-le Israel kazüthun, chen kethon khela, ai ntsoka temi aphu nyunkhimvuo yhun hükela bin when ti. 9A-le lo a-rihü lo a-zen kehü senye kechon dan le tsangkenbu terhi hontse kazü tsü gü when lo khelukesü hontse kazü hen lati.”
10Higü hile Aphu sokekvu Npugü le Gog ka zobin: “Tsü gwünkho le keryü ka, nle tedo gwakemvu rhi soti. 11Nle temi a-rünyi a-keno lo chwida kendi nyu anyunbwen lo nyunkhimvuo yhun kebin a-kekvu kendi tsü kazü hü titse rhi loti. 12Nle temi, gwüngwa nkekela nyida nyu yhun kebin temi dan hon seü lo lapvü loti. Tsü dan le senye dan ki kequen ryülo, lo ntsoka anyugun le senru lo kenya-e hyulo-o kazü lvu nyu yhun bin. 13Sheba lo Dadan nyu temi lo Spain rünyi dan hada kethyü nyu le nketso ti, “Nle nrihü dan kequenlo-o me when lo mehon seü lo lati tse ole? Nle rakagi lo suna, senru lo kenya khilo-o tsü dan sen-o tsonchü tiya bin le?”
14Tsügenyu Aphu sokekvu Npugü le Gog ka zokebin gü pe a-ka zolo tse anishü: “Atemi Israel nyu le nyunkhimvuo yhun ketse ka nle tsonchü shüti 15teso nithen ki senye kechon ka rihü kvusa kethyü danda aphu no keru ge bin-o zen ryüti. 16Nle tsangkenbu terhi hontse kazü kesü thyü a temi Israel when ryü ti. Gwünkho le keryü ka ale nnipe a kazü hüti, ale segü yo pe senye dan tesha lo ale hagun zen-o thakethyü nyu a kenshün pe senye dan teshashü nrün genyu. 17Nduka ale zokehü gü tsü, ale a gonyu, Israel nyu sidyükeshanyu ge bin-o zokeshü le, ale ryükejü jon ki temi peha zenryüo Israel nyu when ti tse shü.” Aphu sokekvu Npugü le zo laso.
Sunggigü Le Shaja Pe Gog Ketsü
18Aphu sokekvu Npugü le zo, “Gog le Israel hü kethyü nyü, ale nthün sati. 19Ale anyuntao kezo le, tsünyü Israel nyu kazü le nnu sati. 20Tsehü lo tegü, nyukhu keda keshen, lo kazü so kebin temi aphu a kenshvu genyu ndün ti. Kazüthun le che tsokhin le nren lo kabon le nla ti. 21Ale kenke kemhü aphu pe Gog kedün ti. Aphu sokekvu Npugü le zo laso. A-temi le zhethon pe khinyunyu du ti. 22Ale keho kenyü lo tezi ketsun pe a-shaja thyü shüti. Tsangri sa, tegwün che pe mah lo mah tso kesin rope age, a-rihü dan lo a denzin kehü senye kechon dan ge shüti. 23Hi hontse kethyü nyu ale gon lo nshün letse pe senye aphu tesha ti. Tsüsiki anyugun le ale Npugü letse sha ti.”
Currently Selected:
EZEKIEL 38: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
