EZEKIEL 32
32
Ijipt Nyu Rajagü Lo Rah Kendyü keshü
1Agun le me kazüki tinkela chen tseryü kenyhun shye tseryü kenyhun gü jonkeri nyü Npugü le aka zo. 2“Silakehü temi gü, Ijipt rajagü no petsü sa binlo tse zoshü lo. Ajo hi lope a-tsü lo: NLe senye dan dan nyu shünyho hontse tha thyü, ai nle rah hontseo züri nyu ho hü. Nle npha pe zü rhün kenuo züri dan nrhu hü, 3senye kechon kequen kelo ka ale ajoh nyu njelo-o anyugun no joh süsen-o züse ki chwiryü ti. 4Ale nsü pe kesin ki shü lo kazünyu tegü lo nyukhun dan zenryüo ntyü ti. 5Ale nkesimin keten pe kazüthun lo ketejon aphu yhoshü ti. 6Ale nzi tsun pe kazüthun lo rinyu dan sülo kemvuthen thyü ti. 7Ale n nke kethyü ka tsang jela lo shyenyü dan zen lati. Lo mmha le yhüko sun lo shye le ben mvu lati. 8Ale tsang ki kebin aphu no zünla lo nkazü no kezün nyu yü lati. Ale Aphu sokekvu Npugü, tsü zo laso.
9“Ale n nkekela rüla pe nle nyülo hü kemvu tsipwen dan nyu zo kezen keshü ka senye kechon le anyun kenjün thyü ti. 10Ale nge thyü nrün gü genyu senye kechon le kerü lati. Ale a zhethon kerü keshü ka rajadan le anyugun kerü pe ndün ti. Nle che kethyü nyü, anyugun aphu anyugun keyhun genyu nshvuo ndün ti.”
11Aphu sokekvu Npugü le Ijipt rajagü ka zo, “Nle Babilon nyu raja gü zhethon teno ti. 12Ale senye rigwakemvu dan ki shüpahü nyu no anyugun zhethon sütho pe ntemi aphu dushvu ti. N temi nle rüchün pe nsü thyü kehü aphu nke lati. 13Ale zü kebin bin aphuka nsenru dan dushvu lati. Temi nmvue senru nme-e no zübokenu sin mvu lati. 14Ale hagun zü dan no nyen-o nshün lo lo hagun züri dan no bwenye tse tsunti. Ale Aphu sokekvu Npugü, tsü zo lazo. 15Ale Ijipt no khekela bin thyüla, lo tsü nyu keyhun nyu aphu nkekela ka anyugun le ale Npugü letse shati. 16Petsü mvulo keshvu jo kensu higü hile kesun ge keron lü nme thyü ti. Kazü senye dan ka tenunyu dan le Ijipt lo a-temi aphu ge ron ti. Ale Npugü, tsü zo laso.”
Kesinyu Kazü
17Agun le me kazü ki tinkela chen tseryü kenyhun shye kerigü ka jonryü pvün nyü, Npugü le aka zo. 18“Silakehü temi gü, Ijipt nyu temi dan genyu chechülo. Tsü dan nipe senye kekvu kecha dan kesin-o kesinyu kazü ki shüla. 19Anyugun ka zolo:
“Hagun we hagun le temi aphu nyeki zegwa
letse hü le?
Hagun le kesinyu kazü ki tsü lati
tson-o tsünyu nshün kemvu nyu dan nyu bin ti.
20“Ijipt temi le teri nyu ga kela nyu zen-o che ti. Zhethon le anyugun aphu dushvula titse bin. 21Temi kepeche tsin dan Ijipt nopen-e teri thyü kehü Ijipt nyu sin pe kesinyu kazünyu shüti. Anyugun le sen: ‘Temi nshün kemvunyu terinyu ga kela dan le hinyu yüryü laso, lo anyugun le hinyu jübin!’
22“Assiria nyu le tsünyu a-shüpahü sika no ahunpvü tse bin. Anyugun aphu teri nyu ga kela nyu, 23lo anyugun sika le kesinyu kazü kentsuntsin gü ki bin. A-shüpahü aphu terinyu gala, lo anyugun sika le a-minsun hunpvü bin. Ai gwüngwa anyugun le kerhün nyu kazü kedün hü.
24“Elam le tsünyu a-shüpahü ju minsun no a-hunpvü bin. Anyugun aphu terinyu ga kelanyu, anyugun le girü mvuo kesinyukazü nyu yüla. Yhun ketse ka anyugun le me no anyugun nshvu hü, ai ntsoka we anyugun le silao kejo pvü laso. 25Elam le terinyu ga kelanyu dan nyu bin laso, lo a-shüpahü terinyu ga kela nyu sika le a-hunpvü bin. Anyugun aphu girü kemvu nyu, lo terinyu ga kela nyu nti. Anyugun le yhun ketse ka we me no nshvu hü, ai ntsoka we silao kejopvü terinyu ga kelanyu zen-o nme thyü laso.
26“Meshek lo Tubal hvu le tsünyu au shüpahü dan minsun no hunpvü bin. Anyugun aphu girükemvu, terinyu ga kela nyu nti. Ai anyugun le gwüngwa kerhün nyu kedün hü. 27Nduka kekvu nyu kerühvu hontse anyugun rühvuo sun mvu, tsü dan we teri kanyü pvüo kesinyu kazü nyu gü kethyü ka zhethon lope anyugun pe hensin shü lo gida lope anyugun min ge shü. Temi hidan le kvusa tse kerhün nyue kedün hü.
28“Tsü hontseo girükemvu nyu terinyu ga kelanyu dan nyu Ijipt nyu boshwe lati.
29“Edom le tsünyu a-rajadan lo kekvu kesen nyu zen-o bin. Anyugun le shüpahü kvusa kethyü dan me, ai ntsoka we anyugun le kesinyu kazü nyu girükemvu nyu terinyu ga kelanyu zen-o bin.
30“Teso kipon raja nyenyu aphu tsünyu bin, lo tsühontse Sidon nyu ko. Anyugun kekvu le gwüngwa we kenrin thyü ai ntsoka we anyugun le girükemvu, terinyu ga kelanyu zen-o kejopvü laso. Anyugun le kesinyu kazü nyu gü kelanyu hontse kejopvü laso.”
31“Terinyu ga kela hidan aphu kehyu genyu Ijipt rajagü lo a-rihü dan le rünyun lati,” Aphu sokekvu Npugü le zo.
32“Ale Ijipt raja thyü pe kerhün nyu kekerü thyü, ai a-le lo a-rihü dan boshvu lao gü girükemvu terinyu ga kelanyu zen bin tin lati.” Aphu sokekvu Npugü le zo laso.
Currently Selected:
EZEKIEL 32: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
