EZEKIEL 33
33
Sunggigü Le Ezekiel Kejü Pe Rikhun Nme thyü
(Eze 3:16-21)
1Npugü le aka zo. 2“Silakehü temi gü, ntemi dan ka ale teri zenryüo kazü nme ge shü lo dihontsela hüyo zolo. Kazü tsünyu temi dan le anyugun dan nyu nme kejü pe rikhun hü, 3a-le kenrhinyu ryü kejü hyu lo temi aphu tephu shü hü, 4temi peha le tsü tselo-e anyun nkhimvu lao kenrhi gü le ryü a-boshvu lalo, a-kesi le a-npvü a-khvü. 5A-kesi tsü le a-thyü kezü genyu, a-le petsü binlo tsekethyü jo rüchün a-nyun nkhimvu kela genyu. A-le petsülo yatselo, tsü nrhilo nrün. 6Lo rikhun gü le kenrhinyu hyu shüe tephu shümvu lao kenrhinyu le ryü kemu nyu tsü dan boshvu lalo, ale temi tsü dan kesi genyu rikhun gü nmu ti.
7“Tsügenyu silakehü temi gü, ale nno Israel nyu rikhun thyü shü bin nyo. Ale petsü bin lo tse kezo jo pe nketsü nle pe anyugun ka kela shü mvulo shvu. 8Ale temi gwakemvu nme le sila titse zoshü, ai nle pe a-ka zomvuo a-no a-tho gwakemvu kelu lomvuo a-keyhun kenilo mvulao kemu nyu sila lo, ale a-le sikela genyu n nmu ti. 9Nle temi gwakemvu nyu nme ka zo-o a-le a-kemu kekhe lomvuo kemunyu sila yatse-e nkeyhun we keni shü ti.”
Nmeme Tse A-khvü Kepvü
10Npugü le aka zo. “Silakehü temi gü, Israelnyu le zokehü jo tsü pe anyugun ka zoni shülo: ‘Ngun kemu lo thyüzü kela pe ngun kvu kensu thyü bin. Ngun kenthyü bin laso. Ngun le dihontse yhunlo mon?’ 11Anyugun ka zolo, ale Aphu sokekvu Npugü, ale rhün kehü Sunggigü, ale kemunyu nme le kesi hyuo akenyü mvu le.Tson kethyü gü mvu le a-no mu mvulao rhün kelo le a kenyü. Israel, nle thyü kehü gwakemvu gü tsü khela lo. Nyuthyüo nle sila nyü hü nla?
12“Tsügenyu silakehü temi gü, Israelnyu ka zoshü lo, temi kegwa nme le mula lo, a-le tha kegwa thyü kenjü tsü le a-keni loho. Lo temi gwakemvu nme le kemu thyü sinmvu lalo, a-le shaja hyu loho, lo kegwanyu nme le kemu thyü tinla lo, a-keyhun nrho shü loho. 13Ale temi kegwa nyu ka jochü pe tsü ti tse zolo gwa, ai a-le gü kela ka a-tha kegwatsü nti-e gwa letse rüchün-o mu tinla lo, ale a-tha kegwa dan tsü rüchün mvu lati. A-le kemu genyu siti. 14Ale temi gwakemvu nme le sigü jüla sele tse zoti, ai a-le mumvulao kenjü lo kegwa thyü so lalo- 15keshanyu laka mele tepu genyu zope a-ketsü khikelo lo mehon rühu kelo rani pe tsülao kemu thyü mvu lo kerhün khishü kehü jvü gü then hü yatselo a-le si loho, ai rhün loti. 16Ale a-kemu dan jü pe tsü ti, lo a-le rhün loti, a-le kenjü lo kegwa thyü tinkela genyu.
17“Ntemi dan le atho dan tsü le njü mvu letse hü! Nmvu, anyugun tho dan le njü mvu. 18Kemitsin nyu nme le kegwa thyü mvulao gwakemvu thyü tinla lo, a-le tsü genyu siti. 19Gwakemvu nyu nmele kemu thyüsin mvulao kenjü lo kegwa thyü tin lalo, a-le a-keyhun keni lo laso. 20Ai Israel, nle ale thyü kehü tsü le njü mvu letse hü. Ale ntho genyu njün kerati.”
Jerusalem Le Chekela Jolo
21Agun le me kazü ki tinkela chen tseryü kenyhun shye tseryü ka jonpvün gü nyü Jerusalem nyu tinkelo nyu nme le ryüo aka nyida gü le chela sele tse zo. 22A-le keryü mhundyü ngwün ki ale Npugü kekvu kvusa kethyü shalo. Temi tsü gü le lonyü gü ryü kethyü ka, Npugü le jo kekvu pe atsü nishü.
Temi dan Kemu
23Npugü le aka zo. 24“Silakehü temi gü, temi Israel nyida kechakela kazü dan ka yhun kebin nyu le zobin: ‘Abraham le temi nme nti, ai kazü tsü apentha pe a-tsü. Ngun we temi kechon, tsügenyu kazü higü le ngun hon so.’
25“Anyugun ka Aphu sokekvu Npugü ale zobin letse shülo: Hagun le thyü a-zi le bin-e tyü hü. Hagun le teromen rüshvu hü. Hagun le me boshvu hü. Nyu genyu hagun le kazü tsü gü le hagun hon letse rüchün lola? 26Hagun le hagun zhethon sü pvü hü. Hagun tho le kentsükenchen. Aphu keyüla hü. Tsonlo nyu genyu kazü tsü le hagun hon letse rüchün lola?
27‘ Anyugun ka Aphu sokekvu Npugü, ale rhün kehü Sunggigü ketsin, ale anyugun no petsü bin lotse shü le, nkekela nyida nyu yhun kebin dan boshvu lati. Kazü tsünyu yhun kebin dan tsü le tehenthyü le tentyü lati. Kazüthun lo kazü kü ki kebu kebin nyu le keho genyu siti. 28Ale kazü tsü gü nyu me no yhun mvu shü lati,lo anyugun süthyü kehü kekvu gü tsü no kenithyü lati. Israel kazüthun dan le tehenthyü lao nme-e tsü pvüthüo njwen lomvu lati. 29Ale temi dan kemu genyu shaja pe anyugun ketsü ka kazü tsü gü pe khekela thyü lati, tsüsiki anyugun le ale Npugü letse shati.”
Sidyükesha Gü Le Kezo Hontse Kela
30Npugü le zo, “Silakehü temi gü, ntemi dan le nyida chwida ki lo anyugun katson nyu keteno kelo ka nrüla kenthon bin nyo. Anyugun le khinyu nyu kazo, ‘Ngun gü Npugü kanyu jo nyu le ryüyo nyü tile.’ 31Tson-o a temi dan le kequen sen-o nle nyu zo tiyo nyü titse bin nyo, ai anyugun le nle anyugun no thyü lotse kezo then hü mvu. Anyugun mün ka we jo kegwa nti, ai anyugun le tsenkeshvu tson nyu bin hü gwünzin. 32Nle anyugun mhundyü nyu kesokeyhüdyü lüthyü nmvue harp vüo temi nsü kehü nyu nme hontse gwünzin. Anyugun le nkhwen aphu nyü shü hü, ai tsü dan nme-e then hümvu. 33Ai njo aphu thyü pen lalo- tsü dan thyü tsentsü ti sidyükeshanyu le anyugun dan nyu bin hü letse sha loti.”
Currently Selected:
EZEKIEL 33: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
