EZEKIEL 31
31
Ijipt Lope Sedarbin Kendyü Keshü
1Agun le me kazü ki yhun tinkela chen tseryü nme gü shye shen ka jon keri nyü Npugü le aka zo. 2“Silakehü temi gü, Ijipt rajagü lo a-temi aphu ka zolo:
Hagun le ditsüki kvula!
Ano hagun lope nyu zenkendyü mon?
3Hagun le Lebanon ki sedar bin nme hontse,
A-ro gwasa, lo a-kengü le bin,
Thon pe nmha-e tihü,
4Tsüno minlo nrün genyu züe bin hü,
Lo kazü hensin ki züri le bin-o tsü leyi hü.
Tsü dan le senbin le sen kebin bin nyu
ntsen shü
Lo rinyu dan no chün nyu sen bin aphu
ntsen shü.
5Tsü le zü pe nekegwa thyükeshü genyu,
Min-o senbin kecha dan nyeki thonlo.
A-ro le sen pe sü lo thonlo.
6Tegü kechacha kethyü aphu a-ro dan
ka anyugun seü thyü;
Tehenthyü dan le a-kengü ka anyugun
nyu nche;
Kazü senye dan le a-hensin ryüyü lo.
7Senbin tsü gü le ditsüki zegwa la-
Thonsa, lo a-ro-e kethonthon.
A-men le sen ntsun yügü zü kebin bin ti.
8Sunggigü chwinyu Sedar nme-e tsü
kendyü lomvu.
Fir bin nme-e a-ro tsükho ndi,
Lo chonkhübin kecha nme-e a-ro
tsükho bin mvu.
Sunggigü chwinyu senbin nme-e tsü
hontse zegwa mvu.
9Ale a-ro sen kenjen pe zegwasa shü.
Sunggigü chwi Eden nyu kebin aphu tsü
tepen hü.
10“Tsügenyu, ale Aphu sokekvu Npugü, ale senbin min kü gü mmha tikemvuthen min kü kethyü tsü ge nyuthyüla tiyo ale nka zoshüti. Tsü le min tetso lo ketekho kvu hü; 11tsügenyu ale tsü kenilao sinrünyi kecha kekvu nyu no tsü lo lati. A-le senbin tsü gü serikemvu genyu nyu hyulo züyo pe tsü ti. 12Me njün hü kemvu sinrünyi kecha nyu le tsüphen pe kazüthun lo kazüketejon aphu ge chetsü lati. A-shye hensin yhun kehüsenye aphu tin lati. 13Tegü dan le ryüo senbin pen kela ge sun, lo tehenthyü dan le a-ro so nsin nshe ti. 14Tsügenyu ntsoka gerho, zü le ntsensa hü metse senbin nme-e thon pe tsü gü hontse thyüni loho nmvue a-ra no mmha tio tsükho tetso loho. anyugun aphu temi hontse sila tiso, kesinyu kazü ki güla kehü nyu kerhünla tiso.”
15Higü hile Aphu sokekvu Npugü le zo: “Senbin tsü gü le kesinyu kazü nyu gü kela nyü, ale kazü hensin zü no nyungwakemvu zansü chwiryü kazü so ndan lati. Ale züri dan süni lola lo rinyu kechon no tsunchwiryü mvu lati. Senbin gü le sikela genyu, ale kezün zenryüo Lebanon kazüthun ge shü la lo chün nyu senbin aphu no rügu lati. 16Ale tsügü nipe kesinyu kazü ki shü kethyü ka, a-keche khwen le senye dan pvü kenu ti. Eden nyu sen dan aphu lo kegwatsin aphu, Lebanon nyu senbin zü ntsen kegwa thyü hüo kazü hensin ki gü kela nyu aphu a-le chekela genyu sherhün ti. 17Anyugun le chekela nyu zen kerhün la nrün genyu tsü gü zen-o kesinyu kazü nyu gü lati. Lo a-she hensin yhun kehü nyu le senye dan nyu nren nru tin kü lati.
18“Senbin gü tsü le Ijipt raja lo a-temi aphu. Eden chwi nyu-e senbin nme thonsa nmvue nkenyüsa kethyündi. Ai ntsoka we Eden nyu senbin dan hontse tsü le kesinyu kazü nyu güo temi nshünkemvu lo terinyu ga kela nyu zen-o kerhün lati. Ale zo laso.” Aphu sokekvu Npugü le.
Currently Selected:
EZEKIEL 31: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
