EZEKIEL 30
30
Npugü Le Shaja Pe Ijipt Tsüti
1Npugü le aka zoni. 2“Silakehü temi gü, Aphu sokekvu Npugü ale zokebin hi lope sidyü zo-o tesha shülo. Nle jo hidan pe sen shü:
Ketetsin kethyü jon le ryüti!
3Jon gü le khonni laso, Npugü le thathyü
nrün jon gü le,
Senye dan genyu khelukesü lo kenjün
kethyü jon.
4Ijipt nyu teri le bin ti
Shekese keda le Sudan nyu ryüti.
Ijipt nyu kechon boshvu lati;
Anyugun kenya lapvü tin la
Lo Kazü-e nke lati.
5“Teri tsü gü nyu Sudan, Lidia, Libia, Arabia, Kub, dan ka a-jonshe zen kehü shüpahü lo a-temi dan ko boshvu lati.”
6Aphu sokekvu Npugü le zo, “Tesozin Migdol ka tsü gü tesinzin Aswan keti Ijipt nopen kehü nyu aphu terinyu si lati. Ijipt rihü ketekho kehü dan nke lati. Aphu sokekvu Npugü ale zo laso. 7Kazü tsü gü le kazünyu kenke tsin gü thyü ti, lo a-nyida dan nke shü lati. 8Ale mah pe Ijipt ge shü lo a-nokepen nyu aphu boshvu kela ka, anyugun le ale Npugü letse sha loti.
9“Jon tsü gü le ryüo Ijipt nke kela nyü, ale zürun jolonyu nipe rüchün nshvukemvu Sudan temi dan thukeyhun shüti, tsüka anyugun le kerüshvu ti. Tsü jon le ryüjü laso!”
10Aphu sokekvu Npugü le zo, “Ale Babilon raja gü Nebuchadnezzar sen-o Ijipt kenya no kenithyü lati. 11A-le lo me njünkemvu a-rihü dan le ryüo kazü tsü gü nkeshü lati. Anyugun le zhethon pen-o Ijipt whe-o, kazü tsü gü ka simin le sü lati. 12Ale Nile züri thyü nsin lao Ijipt lope temi gwakemvu nyu hensin shü lati. Sinrünyi le tsipwen tsü gü apentha nke lati. Ale Npugü, tsü zo laso.”
13Aphu sokekvu Npugü le zo, “Ale Memfi nyu teromen lo tero kenku aphu nke lati. Ijipt kekvu kesen nme-e ndila, lo temi aphu no kerüshvu ti. 14Ale Ijipt tesinzin no nkela, lo mah lope tesozin Zoan nyida ge shüti. Ale Thebes nyida gü tsü shaja pe tsü ti. 15Ale Pelusiun nyida, Ijipt chwida kenko gü no anyun kenthün shati. Ale Thebes kenya nke lati. 16Ale mah lope Ijipt roshü, lo Pelusiun le nyun kenjün thyü loti. Thebes chwida le nren lati, lo nyida gü le nke lati. 17Heliopolis lo Bubastis nyida hvu ka selo dan le terinyu siti, lo kecha dan tenzen-o dothyü tin lati. 18Kezün le Tahpanhes ge ryü lati, ale Ijipt kekvu borho lo anyugun süthyü kehü kenko no a-kenithyü kela siki. Nmha le Ijipt sun lati, lo a-nyida dan temi aphu tenzen-o dothyü tin lati. 19Ale hihontse shaja pe Ijipt tsü kethyü ka, anyugun le ale Npugü letse sha loti.”
Ijipt Raja Kekvu Borhokela
20Agun le me kazü ki tinkela chen tseryü nme gü shyekerigü jon tsenyü nyü Npugü le aka zo. 21“Silakehü temi gü, ale Ijipt rajagü ben bose laso. Temi nme-e tsü phinshü mvu, tsüno gwalo-o zhethon tezenlo nrün genyu phinketsüe mvu. 22Tsügenyu ale Aphu sokekvu Npugü, ale hi zobin nyo: Ale Ijipt rajagü kenrhi gü. Ale a-ben kegwa gü lo bosekela gü tse kenyhun nren bose lati-tson-o zhethon gü le a-ben nyu che lati. 23Ale Ijipt nyu hükezen pe kazü aphu nyu shü lati. 24Tsüsiki ale Babilon kekvu thyü nkoshü lo a zhethon pe a-ben ka shüti. Ai ale Ijipt raja gü kekvu borho lati, tson-o a-le a-kenrhinyu mhundyü nyu nho-o siti. 25Ele, ale a-no kvumvula lo Babilon raja gü thyü nkoshü ti. Ale azhethon pe a-tsüo a-le pe Ijipt ge shü lo temi aphu ale Npugü letse shati. 26Ale Ijipt nyu hükezen pe kazü aphu nyu shüti. Tsonlo anyugun le ale Npugü letse sha loti.”
Currently Selected:
EZEKIEL 30: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
