EZEKIEL 27
27
Tur Genyu Kesi Lü Keron
1Npugü le aka zo, 2“Silakehü temi gü, Tur ge kesun lü ronlo, 3nyida tsü gü le zida seki bin-o zida kehun ka kebin temi dan zen-o hathyü hü. Aphu sokekvu Npugü le zokebin jo pe a-ka zolo:
Tur, nle zegwasa kethyü genyu
nsü thyü hü.
4N ka le zida.
N thyükeshü nyu le nthyü pe zürun
kezegwa hontse shü;
5Anyugun le Hermon kazüthun ki fir senbin
lope anyugun zürun thyü.
Lo Lebanon kipon sedar sen lope zürun ge
kedun bin dan thyü.
6Anyugun le Bashan ki teshosen lo pe
kejenvü thyü;
Anyugun le Sepra ki sahümane pe
nkela thyü
Lo chunhü lope a-nyuki la.
7Linen pe ntsangkenbu kenophi thyü,
Ijipt ki linen pe kedo,
Nithen kie sha whülo kegwa hon,
Nkesun le linen kegwatsin,
Lo Sepra zükehun kazü ki phi kemeren
pe thyü.
8Zürun kejen nyu le Sidon lo Arvad nyida dan
ka temi.
Nge kebin thathyü keshanyu le zürun
kejen nyu.
9Zürun kechanyu le
Biblos kipon senthyü salo kelanyu.
Zida nyu gü kehü zürun aphu ge njwen
kehü nyu aphu
N tha kejwe bin nyu hathyü.
10“Persia, Lidia lo Libia kipon shüpahü le hagun rihü nyu thyü. Tsü dan le anyugun gida lo perün dan pe hagun kanyu bin hü. Tsü dan le zan kegwa chün pe hagun tsü hü. 11Arvad kipon shüpahü le nchwida rikhun, lo Gamad kipon temi le ntsokhwen dan rikhun hü. Tsü dan le anyugun gida pe nchwida ge hü lahü. Anyugun le nthyü kezegwa shü kehü dan.
12“Nle Spain nyu hathyü lo nkanyü kechon dan sunka rakagi, tegi, tin lo tegivü khilo. 13Nle Greece, Tubal, lo Meshek nyu hathyü lo nkanyü dan pe donyu lo lazo pe kethyü kanyü dan kelu. 14Nle nkanyü dan pe Beth Togarmah nyu hon kanyü kepvü keru, terikethyü keru lo gada dan hei. 15Rhodes temi dan le nzen-o hathyü; züje ki kebin nyu kechon le tsunhü lo ebony sen pe nkanyü kelü. 16Siria temi le n ha lo nle thyü kelo kechon heilo. Tsü dan le tso kenjvü, Phikemeren, tejvü kekhi phi, linen kegwa, coral, lo rubi dan pe n ha kelu. 17Juda lo Israel le tho, khuzü, oliv ter lo rünkegwa pe n ha hei. 18-19Damaska temi le Helbon ki zu lo Sahar ki thyühü pe n ha lo nle thyükelo kelu. Anyugun le tegi pe kecha kanyü lo rünkegwa lope nkanyü hei. 20Dedan temi le nyukhu ge lao kedunbin thyülo kegwa phi pe nkanyü kelu. 21Arab nyu lo Kedar kazü soge kehü nyu le tanyü nyu, tanyü, lo tenyü pe n ha thyü. 22Nkanyü genyu Sheba lo Raamah ki hada kethyü nyu le kontyü lo suna, lo rün kegwatsin dan pe n ha kelu. 23Haran, Canneh lo Eden, nyida dan, Sheba nyu hada kethyü nyu, Asshur lo Khilmad nyida, tsü dan aphu nzen-o hathyü. 24Anyugun le phinya kegwa, phikemeren, lo tejvü kekhi phi, kelaphi rhi kechacha kethyü, nitsü kenko lo nikenlü pe dosa kela phi dan pe nka jwe shü. 25Kanyü kepvü zürun kedatsin dan no n ha kethyü kanyü pvüo kethen.
Nle Zida nyu zürun hontse
kanyü kensu pvü hü.
26Zürun kejen nyu le npvü ryüo zida
nyu shükelo ka
Nphoki tsangkenbu le nwhün sen-o
zü kentsun ki güla.
27N ha kanyü aphu,
Zürun nyu thatho thyüo kenjwen nyu aphu
Zürun kechanyu lo hada kethyü nyu,
Zürun nyu kehü shüpahü aphu-
Aphu, aphu zida nyu nmhenla.
28Kenjwen nyu zü nyu si gü kejü dan
kenra le pere ki-e gwün kebon la.
29“Zürun aphu ntsoka we nrunla,
Tsünyu kehü nyu aphu zida seki chwiryü laso.
30Anyugun aphu nchechüsa bin,
Kemphü pe anyugun pe ge shülo
jonbü nyu yhon.
31Anyugun le ngenyu anyugun pe thu la
Lo ronphi ben.
Anyugun nyun kenjün thyürio chü.
32Anyugun le n ge kesun lü ron:
`Segü lope Tur zenkendyü lomon,
Tur le ntsoka we zida nyu ma tsela ti sele?
33N hakethyü le zida nkenkelo ka,
Nle senye aphu sen mvulo keshvu pe sülo.
Raja le nnya lo
Nkanyü kenya genyu.
34Ntsoka we nle zida nyu nke laso;
Nle züda kentsun nyu che laso.
Nkanyü lo ngenyu tha thyü kehü nyu aphu
Nzen-o zida nyu nmhen laso.'
35“Züje ki yhun kehü nyu aphu nkenke rüla sha pe kekerü thyü laso. Anyugun rajadan-e nshvuri laso, lo anyun mhun ge kenshvu hyu laso. 36Nle ndi laso, kethonthen ndi laso, lo kazü aphu nyu hada kethyü nyu le kerüshvu laso, anyugun le nkenke hontse kela nshvu bin nyo.”
Currently Selected:
EZEKIEL 27: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
