EZEKIEL 28
28
Tur Raja Gü Genyu Sidyüjo
1Npugü le aka zo, 2“Silakehü temi gü, ale Kekvutsin Npugü, ale zokebin hi lope Tur kekvugü ka zoshü: Nle tero nme letse nrüchün ngon-o ketekho hü nyo. Nle teronyu nme hontse rajakhün ge dun-o zida no n hun bin letse zohü. Nle tero ro thyü hü, ai nmvu, nle sikelai, teronyu kemvu. 3Nle Daniel nyeki nsüo thame pe nmhundyü ki kebu loho letse rüchün hü. 4Nthakesha lo thathyü kesha le nno suna lo rakagi nnya lo. 5Nle kelekeluo hathyü pe chwilo hü. Nle n kenya genyu ditsüki thyü ketekho bin yo!
6“Tsügenyu, Kekvutsin Npugü ale zobin: Nle tero nyu hontse nsü letse kehü genyu, 7ale shwikenjün kendi rinyu zenryüo nwhe ti. Tsüdan le nle thakesha lo thathyükesha sen-o hyukelo kezegwa dan aphu nke lati. 8Tsü dan le n boshvu pe zü le kebin sika nyu shü lati. 9Anyugun le nboshvula titse keryü ka-e nle tero letse zo tile? Nle ndushvula nrün nyu teno kelo ka we nle temi a-me teronyu thyü loho lati. 10Nle Sunggigü shakemvu sinrünyi kecha ben nyu tehi hontse si lati. Ale Kekvutsin Npugü, ale johoshü laso.”
Tur Rajagü Chekela
11Npugü le aka zoni, 12“Silakehü temi gü, kenke le Tur rajagü khwen kebin genyu nyungwamvu lo. Ale Aphu sokekvu Npugü ale zokebin hi lope a-ka zolo; Nle gwüngwa ka we gwapen kethyü tsinhi thyü hü. Nle dihontse nsü lo zegwa hü yo! 13Nle Sunggigü chwi Eden nyu yhun, lo tso minketsen hidan pe nronye thyü hü: Rubi lo diamond; topaz, beril, karnelian, lo jasper, safir, emerald, lo garnet. Nle suna ronye le bin. Tsü dan tsü le n nyhun keshü nyü ngenyu thyü keshü. 14Ale kenrin kethyü jolonyu nme nipe nrikhun shü. Nle a kazüthun kenshün ge yhun-o tso minketsen nshwen kehü dan nyu hohü. 15N nyhun keshü ka ryüo nle gwakemvu thyüso kela keti we njvü le gwapen. 16Nle rao thahei lo jwe, tsontseo tsü le nthyü pe gwamvu sa lo la. Tsügenyu ale nno a kazüthun kenshün khela lotse shü, lo nrikhun kehü jolo gü le tso minketsen kenshwen dan nyu nhüshwi la. 17Nle n kezegwa genyu ketekho hü, lo nzan kechwi le nthyü pe kepin nyu hontse la. Higü genyu ale nsü pe kazü nyu shüo nno raja kechanyu no petsü mvulo keshvu genyu tsinhi nme thyü. 18Nle tha hei lo jwe kethyü nyu gwamvu pe tsü hontse lao n kershvubin dan-e nrhula. Tsügenyu ale mah lope nyida gü rope kemphü thyüla. N nrikehü nyu aphu ntsoka we nle mahchu thyükela hyu laso. 19Nle ndi laso, kethonthen ndi laso, lo n nkekela rüla kesha senye aphu kerüshvula lo nkenjün kethyü hontse kela nshvu bin laso.”
Sidyüjo Pe Sidon Kenkhin
20Npugü le aka zo, 21“Silakehü temi gü, Sidon nyida nkhin shülo. 22Ale Aphu sokekvu Npugü, ale anyu rüla zokebin hi lope tsünyu temi dan ka zolo: Sidon, ale nkenrhi gü le; temi dan le ale nge thyükeshü tho genyu a shwen ti. Ale shaja pe nge keyhun nyu tsüo ale dihontse nshün yo tse kethyü pe anyugun hi keshü ka anyugun le ale Npugü letse sha loti. 23Ale keho nipe nge shüo tezi no ntsonda nyu tsun ti. Lizin hizin mele nwhe ti, tson-o ntemi ga lati. Tsüselo ale Npugü le tse nle shati.”
Israel le jochü pvü nrün
24Npugü le zo, “Israel kehun senye dan a-shwinyü kehü nme-e tsehü lo nchonra hontse Israel nthyü loho so. Lo anyugun le ale Aphu sokekvu Npugü le tse shati.”
25Aphu sokekvu Npugü le zo, “Ale Israel nyu hükezen pe senye dan ki shükela aphu zen niryü lati. Lo senye aphu ale nshün letse shati. Israel temi le anyugun kazü, ale pe a gogü Jakob ketsü kazü nyu yhun loti. 26Anyugun le tsünyu kenshvu ndio yhunti. Anyugun le ka thyü lo vain low tsüti. Ale a-kazon nyu, a-shwinyü kehü dan aphu shaja pe tsü lati, tson-o Israel le nshvu mvu lati. Tsüsiki anyugun le ale anyugun Npugü Sunggigü letse sha loti.”
Currently Selected:
EZEKIEL 28: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
