EZEKIEL 26
26
Sidyüjo Pe Tur Kentsun
1Agun le me kazü ki gü kethyü chen tseryü nme gü shye keri gü jonkeri nyü, Npugü le a nthon. 2“Silakehü temi gü, higü hile Tur nyida nyu temi dan le sherhün kebin kon. Anyugun le sen-o, ‘Jerusalem le kara laso! Tsügi hakethyü tson gü le ndi so! A-le ngun nren lo hoso!’
3“Tsügenyu Aphu sokekvu Npugü ale zobin: Ale hagun kenrhi gü le, Tur nyida gü. Ale senye kechon zenryüo n when ti, lo anyugun le zida kentyü hontse ryüti. 4Anyugun le hagun nyida kehun dan nkela lo hagun tsokhwen dan boketo lati. Tsüsika ale kemphü sho sentin lao tsonye nti lati. 5Zida nyu tsü tsehü keten nyu le anyugun joh pe tsü ge pho ti. Aphu sokekvu Npugü ale zo laso. Senye dan le Tur kenya sentin la, 6lo anyugun zhethon lope kazü tsünyu rünyi dan ka yhun kebin nyu dushvu lati. Tsüsiki Tur le ale Npugü le tse sha loti.”
7Aphu sokekvu Npugü le zo, “Ale raja aphu so Kedagü, Babilon raja Nebuchadnezzar senryüo Tur when ti. A-le tesoki rihü danda no keru lo kerugari lo kerukezen nyu zenryü ti. 8Kazü tsügü nyu rünyi nyu yhun kebin nyu le kega kethyü nyu si lati. Kenrhinyu le kü tso lo rikhunbin khwen ti, lo chwida khwen nko-o nzen kenren ti. 9Anyugun le chwida vüren nrün dyüshwe cha pe hagun chwida vü lo tegi khincha lo hagun tsokhwen vüshe lati. 10Anyugun keru le cho kephu keshü tsü le hagun sun ti. Anyugun le nkekela nyida khinrun nyu yü kethyü ka anyugun keru kanyü kepvü gari lo teri kerugari ketin khwen le hagun chwida-e pvü keni ti. 11Anyugun keru kezen nyu le hagun tsonda nyu kenrin thyü pvüthüo anyugun zhethon pe hagun temi dan dushvu ti. Hagun kachon kenko dan phen pe kazü nyu shü lati. 12Hagun kenrhinyu le hagun kenya jwe pe anyugun keche loti, tsü dan le hagun chwida lala lo ka kegwa dan borenla. Anyugun le tso lo tesen lo tha kechakela dan aphu pe zida nyu shwen shü lati. 13Ale hagun lü aphu no a-keni thyüla, lo hagun harp khwen aphu khin lati. 14Ale tsehü keten nyu no joh pe pho lo kegwa tsonye nti khela ti. Nyida gü thyüni lo mvu lati. Aphu sokekvu Npugü ale zo laso.”
15Aphu sokekvu Npugü le hi lope Tur nyida gü ka zo nrün le bin: “Mele n nkhen kelo ka ntehun kebin nyu le kerüshvu pe mele dushvu kebin nyu kenra khwen hontse ti. 16Tsüselo zida nyu nsin nshe kehü senye raja dan aphu anyugun rajakhün ge tsenryü ti. Anyugun le mirün ketseyho lo tejvü kekhi phi yhola lo ndün-o kazü nyu thun tsüti. Anyugun le n rüla sha pe kerüsa lao ndün kethyü khinlo mvuti. 17Anyugun le kesun lü higü ron ti:
Nyida kentsen gü le nke laso!
Zida nyu a-zürun dan sen
tin laso.
Nyida hinyu temi le zida dan ketsen
Lo a-tekehun ka bin kehü aphu ketsun hü.
18Ntsoka we, a-le chekela nyü,
Zükehun kazü dan le ndün bin,
Lo anyugun temi le kenke tsü gü nripe
nshvusa laso!”
19Aphu sokekvu Npugü le zo; “Ale hagun thyü pe nkekela nyida mele yhun mvukela hontse shüti. ale züda kentsun zü lope hagun kemin lati. 20Ale hagun nipe tesinki kesinyu kazü ki nduka keyhun nyu kerhün lati. ale hagun thyü pe kazü hensin kethonthen kenke dan nyu kesinyu zen-o bin ti. Tson kela genyu hagun le kerhün nyu kazü nyu hagun bin thyüo yhunlo mvu lati. 21Ale hagun lope me kerükeshvu tsinhi nme thyü, lo tsü le hagun genyu keni thyü lati. Temi le hagun füe hyulo mvu lati.” Aphu sokekvu Npugü le zo laso.
Currently Selected:
EZEKIEL 26: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
