EZEKIEL 18
18
1Npugü le a nthon-o, 2aka zo, “Israel nyu kazü nyu temi dan le jokejvü zonini kehü tsü le nyu la?
‘Me Pepvünyu le Vainsha keshon tyü,
Ai a-nyenyu dan le a-hü ntsenlo.’
3“Aphu sokekvu Npugü le zo, Ale rhün kehü Sunggigü ketsin genyu hagun le Israel kazü nyu jokejvü higü zoni loho. 4Temi keyhun ronzin aphu ahon, me pepvünyu lo me nyenyu keyhun ronzin metse. Kemu thyü kehü gü tsü le siti.
5“Keshanyu laka temi kegwa, kentsen lo joketsin kezonyu nme le bin. 6A-le Israel nyu teromen rüshvu nmvue khin kehü kershvubin nyu rüshvukela hon tyü hü mvu. A-le a-kazonyu nu thyü nshvu mvu, tenunyu nshünkemvu gwünkho ka zen-o peche tenu thyü mvu. 7A-le me sa nmvue rühu njü mvu. A-le a-pukepvünyu le tha pe a-tsüe ranila; a-le nnyon kehü nyu gin thyü lo phinya pe ben nya kemvunyu tsü. 8A-le kechwi genyu pisa pe tepu hü mvu. A-le gwakemvu kenila lo kekevü lihikae joketsin nyu penshü hü. 9Temi tsü hontse kethyü nyu le ajozen lo nyu yhünsao ajvü then hü. A-le kentsen nyu, tsügenyu a-le yhun hüti.” Aphu sokekvu Npugü le zo.
10“Tsünyeki temi higü le a-nyu peche nme le bin, a-le rühu, me dushvu, 11lo a-pvü le thyü kemvu aphu thyü. A-le khin kehü kershvuka nyu kerüshvu hon tyü lo kechanyu nu thyü nshvu. 12A-le rhokedyü nyu sa, rühu, a-pu kepvünyu le tha pe a-ketsü khilo. A-le tero kerüshvu kanyu güo kentsükenchen teromen dan rüshvu, 13lo kechwi genyu pisa pe me tepu. Tsonlo a-le rhün lo gwa le? Nmvu, a-le rhünlo kemvui. A-le kentsükenchen tho hi aphu thyü, tsügenyu a-le siti. A-le sila nrün a-nmu lati.
14“Lo temi kenyhun gü hile a-nyu pechenyu nme le bin. A-le a-pvü le thyü kehü kemu aphu hyu, ai a-tho hontse thyü mvu. 15A-le Israel nyu teromen rüshvu mvu nmvue khin kehü kershvubin nyu kerüshvu hon tyü mvu. A-le kechanyu nu thyü nshvu mvu, 16temi nme-e nshwen nmvue rühu mvu. A-hon ketepu nyu le pe a-ketsüe rani la. A-le nnyon kehü nyu gin thyü lo phinya pe ben nya kemvu nyu tsü hü. 17A-le gwakemvu thyü nyü mvu lo kechwi genyu pisa-e pe me tepu mvu. A-le ajvü then lo a johokeshü zen. Tson yatselo a-le a-pvü kemu genyu si loho, ai a-le rhünlo tsentsü ti. 18Tson mvuo a-pvü le mesa, rühu, lo khenyütsen temi aphu ge gwakemvu thyü. tsügenyu a-le a-npvü a-kemu tho genyu sila.
19“Ai nle shün shüta; nyugenyu a-nyu no a-pvü kemu genyu sila zü mvula? Tsü kenikeshü yatselo nyugü le kenjü lo kegwa thyü kethyü genyu. A-le ajvü zen lo nyuyhün sao tsü dan then tsügenyu a-le rhünlo tsentsü ti. 20Mu kehü gü le si lati. Nyu nme no a-pvü kemu genyu sikemvui, nmvue a-pvü no a-nyu kemu genyu si loho. Kegwa nyu le kegwa kethyü chün hyu loti, lo gwakemvu nyu le gwakemvu kethyü genyu kenjün thyü ti.
21“Gwakemvunyu nme le mu mvulao ajvü zen, a-le kenjü gü lo kegwagü thyülo a-le si loho; a-le rhünlo tsentsü ti. 22A-kemu aphu jü pe tsü lati, tson-o a-le rhün loti, a-le kenjü gü thyü keshü genyu. 23Aphu sokekvu Npugü le zo, nwe le ale gwakemvu nyu kesi nrio akenyü hü ado tse hü le? “Nmvu, ale a-no nyun kelu lo-o rhünkelo hyu nyü.”
24“Ai kentsen nyu nme le kegwa thyü mvulao gwakemvu aphu lo gwakemvu nyu le thyü kehü kentsükenchen tho thyü tinla yatselo, a-le rhün bin tile? Nmvu! A-le kegwa tho thyü kenjü nme-e rüchün mvu lati. A-le joketsin zokemvu lo a-kemu genyu si lati.
25“Ai nle zo, ‘Npugü le thyü kehü tsü le njün mvu.’ Akhwen nyülo, hagun Israel nyu. Hagun le ale tha thyü kehü tsü le njümvu letse rüchün hü le? Njükemvu gü tsü le hagun le. 26Kentsen nyu nme le kegwa thyü mvulao gwakemvu thyü tinla yatselo a-le sila hü, a-le gwakemvu tho thyü keshü genyu sila hü. 27Lo gwakemvu nyu nme le mu mvulao kenjü lo kegwa thyü tinla lo a-le a-keyhunkenilo hü. 28A-le a-tho gü shalo-o mu mvula, tsügenyu a-le sila loho, ai rhün bin loti. 29Ai hagun Israel nyu le kezo le, ‘Npugü le thyü kehü gü tsü le njü mvu letse hü.’ Hagun tho le njü ole? Njü kemvu gü tsü le hagun le.
30“Tsügenyu Aphu sokekvu Npugü a higü le hagun Israel nyu dan ka hagun nmeme tse a-tho thyü keshü jünkera titse zoshü bin. Hagun le thyü kehü gwakemvu aphu nyu ranila lo, tson-o hagun kemu no hagun nkela nya. 31Hagun le thyü kehü gwakemvu aphu khela, lo nyunkeshün kerüchün keshün khilo. Nyuthyüo hagun Israel nyu dan le sila nyü bin nla? 32Aphu sokekvu Npugü le zo, `Ale nme-e no sila nyümvu.' Hagun kemu nyu ranio rhünlo lo.”
Currently Selected:
EZEKIEL 18: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
