EZEKIEL 17
17
Logi Lo Vain Jokejvü
1Npugü le aka zo, 2“Silakehü temi gü, jokejvü nme pe Israel nyu ka zo-o 3anyugun no Aphu sokekvu Npugü a higü le anyugun ka zobin letse sha lota: Logi keda a-hü le zegwasa nme le a-sükin khun pe keda thyü shü. A-le nye sen-o Lebanon kazüthun dan ki güo sedar senbin nme ra boselo-o, 4tsü pvüo hakethyü kazü ki tsü, lo tsü lope hada thyü kehü nyida gü nyu shüla. 5Tsüsika a-le Israel kazü nyu tehen kebwen nme khilo-o sen gü kazü kebwen low nme nyu sen shü, tsünyu zü le ntsen zin-o yhunlo kegwa le bin. 6Tehen tsügü le senchwiryü lo tsenyo-o a-yhun thonsa kethyü vain nme thyü la. A-ro dan le min-o logi denzin kü, lo a-men tsen ntsunlo. Vain tsügü le a-ro lo a-nyü le kesü thyülo.
7“Logi keda kecha nme ko a-sekin keda lo a-hü süsa kethyü le bin. Vain gü le a-men tsen pe a-ki shü lo a-nyü dan-e sen pe a-denzin shü, tson-o chwinyu tehen yhun kebin nyeki logi gü no zü pe a-tsü kenyü genyu. 8Ai vain tsü gü pe kazü kegwa nyu senla lo zü lope ne kegwa thyükela genyu a-nyü sen lo nshalo-o vain bin kegwa nme thyüla.
9“Tsügenyu Aphu sokekvu Npugü a higü le ketso: Vain higü le yhun-o minlo gwa le? Logi keri gü le a-men jwi, a-sha ryü lo a-ro dan boselao rügu kela thyü mvu ole? Tsü le kekvu kechon nmvue senye kenko no tsü jwi titse mvue gwa. 10E, tsü pe sen laso, ai tsü le yhun-o minlo gwa tile? Npho kipon tsang le nbu gü whün keshü ka tsü le rügula loho le? Tsü le a-le yhun kebin bin nyu tsü rügula kemvui le?”
Jokejvü Kon Zokeshü
11Npugü le aka zo, 12“Me nren kehü hidan ka jokejvü kon sha le nmvu yo ketso shülo. Babilon raja gü le Jerusalem nyu ryüo raja gü lo a-hensin keda dan tenzen-o Babilon ki güla letse zoshülo. 13A-le raja gü kaminyu nme zen-o gwatholo, lo a-no jokezen nyu bin titse swe la. A-le temi kentsen peha khinlo 14tson-o senye gü no nisoryü mvu nrün lo gwathojo tsü then nrün genyu tsü keshwi nyu thyü. 15Ai Juda raja gü le tsü ntsun-o Ijipt ki keru lo rihü danda zenryü nrün genyu lilonyu nishü. A-le gwalo tile? A-le tsü sen-o tinlo gwa le? A-le gwathojo gwünrho lao shaja hyumvu loho!
16“Aphu sokekvu Npugü le zo, Ale rhünkehü Sunggigü ketsin genyu raja higü le Babilon nyu siti, a-le a-keswe lo a-khipe rajakhün ge keshü Babilon raja gü zen gwaketho gwünrho kela genyu. 17Babilon le nnyon tsope khwen lo rikhun kü tso-o temi kechon ga titse keso ka Ijipt raja gü rihü kekvutsin dan-e terinyu a-che loho. 18A-le keswe lo gwatho jo thyü keshü gwünrho la. A-le hidan aphu thyüla, tsügenyu a-le tin loho so.”
19Aphu sokekvu Npugü le zo, “Ale rhünkehü Sunggigü ketsin genyu a-le azen nyu swe-o then titse gwathojo thyükenjü gwünrho kela shaja pe a-tsü ti. 20Ale thyükehü nyu joh süren shüo tsünyu a-min loti. Ale a-zen Babilon nyugüo tsünyu shaja pe a-tsüti, a-le aka zoketsin zomvu kela genyu. 21A-shüpahü kegwatsin dan teri nyu gala ti, lo a-sen dan le bin lihika nren nru tin lati. Tsüsiki nle Npugü a higü le zoshü letse sha ti.”
Sunggigü Le Sidyüjo Zokeshü
22Hile Aphu sokekvu Npugü le zo:
“Ale sedar sen kethon nme ra
lo a-kepfü chwen loti;
Ale tsü lope kazüthun ketetso ki sen ti,
23Israel kazüthun ketetsotsin gü ge.
Tsü le a-ro sen-o nshalo
lo sedar sen kegwa thyü lati.
Tegü aphu tsünyu yhun
lo tsü sun nyu hüti.
24Kazü tsügü nyu senbin aphu
ale Npugü letse shati.
Ale senbin kethon dan phenla
lo senbin kezü dan no min pe thon lohü.
Ale senbin kenjvü no rügula
lo senbin a-nyü kendi no njvü lohü.
Npugü a higü le zo laso, Ale thyü titse
zokela tsü thyü ti.”
Currently Selected:
EZEKIEL 17: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
