EZEKIEL 16
16
Jerusalem Le Joketsin Zokemvu
1Npugü le aka zoni. 2“Silakehü temi gü, Jerusalem le kentsükenchen tho thyükela tsin pe hishü lo. 3Aphu sokekvu Npugü jo pe Jerusalem ka zolo.
“Kanan kazü nyu nnyulo. Npvü le Amornyu, lo njvü le Hitnyu. 4N nnyukelo ka nme-e nhen ryü mvu nmvue zü pe nsü mvu nmvue tsi pe nnyen mvu nmvue phi pe nje shü mvu. 5Temi nme-e n njün ho tse tha hidan thyü nso mvu. Nkhipe phenchvünyu shwenla.
6“Tson-o ale nken gü laryü nle nzinyu yhon kebin hyu. Tezi le nje pfü bin, ai ale nno sila nyü mvula. 7Ale nthyü pe senbin kegwa hontse minlo. Nle min-o nko nkin lo thon pe lünyu nme thyülo. Nnyü no tsun chwiryülo, lo npehü le thonlo, ai nle nkenyhün lo nkenben.
8“Ale n nken nigü, lo nle keso keyhüdyü gwünkho le nkiryü kela hyu. Ale aminrün tesogü pe njelo lo nzen keso titse zoshwi shü. E, ale nzen-o sunkethyü kejoshü lo, lo nle ahon thyülo.” Aphu sokekvu Npugü le hi zoshü.
9“Tson-o ale zü pe nge tezi süla. Ale oliv ter ja pe n yün shü. 10Ale keshvu phi khipe n nben shü lo thyügi phaje kegwatsin, linen pe kephin nme lo silk pe minrün ketseyho keri nme tse pe ntsü. 11Ale kontyü- pingin pe ntsü. 12Ale hikonkebün lo nye lo raja perün gwasa pe ntsü 13Nle suna lo rakagi ronye le bin, lo nle a-zintse linen lo silk pe kedo phi ben hü. Nle thoshe kegwatsin pe kethyü tensü tyü, lo khuzü lo oliv ter tyü. N kezegwa le ben, lo nle rajagi thyü la. 14Nle zegwa kethyü genyu senye aphu nyu nzan chwi,ale nthyü kezegwa sa keshü genyu.” Hile Aphu sokekvu Npugü le zo.
15“Ai nle nkezegwa lo zan kechwi süpvüo nka keryü nmeme tse zen zhü. 16Nle nphi peha pe nle rüshvu kehü bin dan nthyü, lo keyüla nyu hontse nkhi pe temi aphu tsü. 17Nle ale pe nketsü rakagi lo suna kontyü dan khilo-o tsü pe pechenyu men zülo-o tsü dan zen keyüla hü. 18Nle ale khipe nketsü keshvuphi tsü khilo-o pe teromen dan ge shü, lo nle oliv ter lo rünkenyi ale pe nketsü tsü pe teromen rüshvu. 19Ale chvü, thoshe kegwatsin, oliv ter, lo khuzü pe ntsü, ai nle tsüpe teromen kenyü thyü nrün genyu kerüshvu tho thyü.” Hile Aphu sokekvu Npugü le zo.
20-21“Tsüsiki nnyu peche lo tenu nle nnyu pe aketsü dan lope kerüshvu thyü pe teromen dan tsü. Anyenyu khilo-o pe teromen rüshvu nmvue nle aka zoketsin zokemvu tsü le gwamvu mvu ola? 22Nle keyüla nyuthyüo kentsükenchen nyu yhun ketse ka gwüngwa-e n nche ka nle nyhün lo nkenyu zinyu yhon kehü rüchün shü mvu.”
Jerusalem Le Keyülanyu Hontse Keyhun
23Aphu sokekvu Npugü le zo, “N we thyü loso! Thyü loso! Nle gwakemvu dan tsü aphu thyü, tson-o 24tsonda aphu khoka teromen kershvubin thyü lo keyüla tho thyü. 25Nle n kezegwa pe dyükenbe nyu thuphen la. Nle nkhipe tsü nyu keryü nyu aphu tsü, lo khenyütsen keyüla nyu nyeki-e shvu. 26Nle nzen-o serikemvu thyü nyü kehü nkajon Ijipt nyu no nzen-o zhü ki güo nkeyüla tha thyü pe ano anyunta.
27“Ale shaja pe ntsü titse lo a jochü njün tsü khilo la nrün genyu aben penso loso. Ale nkhipe Filistian nyu, nkeyüla tho genyu n ntsü lo n ntsun kehü nyu ben nyu shü laso.
28“Nle kechanyu zen-o nkerünyu ndi kela genyu Assiria nyu then tinla. Nle anyugun zen-o keyüla kehü nyu, ai anyugun-e nkerünyun thyüshü mvu. 29Nle Babilon, hathyü kehü senye gü zen-o keyüla kehügi, ai tsü dan-e nkerünyun thyü shü lomvu.”
30Hile Aphu sokekvu Npugü le zobin nyo; “Nle kejokemvu keyüla nyu hontse hi aphu thyüla. 31Tsonda aphu nyu nle teromen kershvubin thyü lo keyüla tha thyü hü. Ai nle keyüla nyu kecha hontse pisa hü tinla mvu. 32Nle nyeginyu le anyepvü so mvuo temi kecha zen keyüla tho thyü kela nyu hontse. 33Me le tha pe keyüla nyu tsühü, ai n we jwe pe nsonyu aphu tsüo lihikie ryü nzenjü titse hü. 34Nle keyüla nyu kecha shü kethyü nme. Temi nme-e nno tsonlo tse tenge mvu. Nle nchün lomvu; nle pe anyugun tsü. Ele, nle nkecha.”
Jerusalem Ge Sunggigü Kenyükethyü Khikeshü
35Tsügenyu keyüla gi Jerusalem! Npugü ale zokebin nyülo!
36Hile Aphu sokekvu Npugü le zo, “Nle nphi yhünla lo keyüla nyu hontse nkhipe nsonyu lo kentsükenchen teromen aphu tsü lo nle nnyenyu kechon dushvu pe teromen kerüshvu thyü. 37Tsügenyu ale himhundyü ki nsonyu nkenyü kehü lo nle ntsü kehü aphu kequen shüti. Tsü dan zenryüo nhun pfülo lo ale nphi yhünlao anyugun no nkenyhün hyu ti. 38Ale nkeyüla lo dukeshvu genyu n nmuti, lo anyunkenta lo nthün-o kesi lope n shaja thyü shüti. 39Ale nkhipe anyugun kekvu nyu shü, lo tsü dan le nle keyüla lo teromen rüshvu kehü bin dan sürho lati. Anyugun le nphinya lo nkontyü dan sentin lao nno nkenben shü lati.
40“Anyugun le temi danda thukeyhun-o tsope njon, lo anyugun le zhethon pe duthürü lati. 41Anyugun le nka dan rola lo tenunyu danda no nle shaja thyü kebin hyu ti. Ale nno keyüla, lo jwe pe nsonyu tsümvu lati. 42Tsonlo anyunkenta ndilao, ale matse lati. Ale anyunta nmvue ayhüthyü bin loho. 43N selo ka ale nge thyü keshü dan nle nmhin laso, lo ntho aphu nyu ano anyunta la. Tsügenyu ale nno tsü aphu tho. Nyuthyüo nle kentsükenchen tho kethyü nti mvule keyüla tho thyüsin hü nla?” Aphu sokekvu Npugü le zo.
A-nyugi Le A-jvü Hontse
44Npugü le zo, “Jerusalem, temi dan le nrüla jokejvü hidan zoti, ‘A-nyu ko a-jvü hontse.’ 45Ketsin nle njvü nyugi le. A-le a-nyepvü lo a-nyenyu khela. Nle ntsagi dan hontse, tsü dan ale anyugun nyepvü lo a-nyenyu ntsü la. Nle lo ntsagi dan nyida dan jvü le Hitnyu lo anyugun pvü le Amor nyu.
46“N tsagi le Samaria, a-le tesoki a-rünyi dan zen-o bin. Nsikezengi le tesinzin a-rünyi dan zen kebin Sodom. 47Nle anyugun phanyu then lo anyugun kentsükenchen tho dan hontse tiya hü le? Nmvu, gwünkho keshanyu jaka hagun le hagun tho aphu nyu anyugun nyeki shvukvu laso.
48“Aphu sokekvu Npugü le zo, Ale rhünkehü Sunggigü ketsin genyu, nsikezengi Sodom lo a-rünyi dan le ntho gwakemvu hontse thyü mvu. 49A-le lo anyugi dan le ketyüketsü kechon le bin-o bwe lo rüyüo yhunkelo genyu ketekho hü, ai anyugun le rhokedyü nyu lo kendinyu nshwe n shwimvu. 50Anyugun le ketekho lo nyun rüo ale ntsükehü dan thyü, tsügenyu ale anyugun nkela, nle tsü shasa bin.
51“Samaria le nle thyükela kemu ponha-e thyü mvu. Nle a-nyeki kentsükenchen thyü. N tho gwakemvu pe n sikezengi kendyü yatselo a-le mumvu. 52Tsügenyu nle nkejokepvü nhen mvu loshvu. N tho dan le ntsagi tho nyeki gwamvuri kela genyu anyugun nri keshü we anyugun le mukemvu hontse le. Tsügenyu kejo-o nmhun nhon lo, n genyu ntsagi nri pe nshün kela genyu.”
Sodom Lo Samaria Zenni Loti
53Npugü le Jerusalem ka zo, “Ale au no gwakenye ni loti- Sodom lo a-rünyi dan lo Samaria lo a-rünyi dan. Ele, ale nko no gwakenye loti. 54Nle n npvü ngenyu kejo lati, lo n kejokepvü rüchün keshü ka n sikezengi nyu dan we gwasa letse lati. 55Au le gwakenye ni loti, lo nle lo n rünyi dan ko gwa ni loti. 56Nle ketekho kehü gwünkho ka Sodom zo keyü thyü mvule 57nle gwakemvu kethyü pe hishü kemvu ka? Ntsoka we nle a-hontseo Edom nyu, Filistian nyu lo n kajonyu kecha dan n kenrhinyu mhundyü nyu keyü kethyü nme thyü laso. 58Nle nshün kemvu lo kentsükenchen tho thyü kela dan genyu kenjün thyü mvu loshvu.” Npugü le zo laso.
Kethonthen Binkehü Kejozenkelo
59Aphu sokekvu Npugü le zo, “Nle pvüzü kebin hontse ale n ge thyüti, kechamvule nle zoshwikeshü pe lihi kemvu thyü lo kejozenkelo gü gwünrho la. 60Ai a we n nche ka nzen kejozenkelo rühvu, lo kethonthen bin nrün nzen-o kejozen ti. 61Nle dihontse thyü layo rüchün loti, lo n tsagi lo n sikezengi zen nikeryü ka kejo lati. Tsü le ale nzen-o kejozenkelo nme kemvu, ai ale au no nnyugi hontse shüti. 62Ale nzen-o kejozenkelo thyükeshün niti, lo nle ale Npugü letse sha loti. 63Ale nle thyüzü kela dan aphu jüshü ti, ai nle tsü rüchün nikelo ka kejori lao nra mvu lati.” Aphu sokekvu Npugü le zo laso.
Currently Selected:
EZEKIEL 16: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
